Formannsskipti í Framsókn

Formannsskipti í Framsókn falla nánast í skuggann yfir gleðileik stjórnarfjölmiðlanna yfir kyrrstöðustjórninni.

Formannsskipti í gamalgrónum flokki eins og Framsóknarflokknum eru þó mikil tíðindi. Jón Sigurðsson fráfarandi formaður er einstaklega traustur, góður og heiðarlegur maður eins og ég hef ítrekað bent á frá því að hann tók við formennsku. Hans vandi var að taka við skelfilegri arfleifð forvera síns. Jóni tókst ekki að marka sér sérstöðu á þeim stutta tíma sem hann hafði enda svigrúm hans þröngt. Að mörgu leyti eru hlutskipti Jóns sem tók við af Halldóri og Gerald Ford sem tók við að Richard M. Nixon svipuð hvorugum tókst að vinna sig frá forverum sínum.

Mér finnst miður að missa Jón Sigurðsson úr íslenskri pólitík. Jón er víðlesinn fræðimaður, heiðarlegur og traustur. Það hefði verið gott að njóta krafta Jóns áfram.

Guðni Ágústsson tekur við. Hann er fulltrúi gamla Framsóknarflokksins. Ef til vill munu þau merki sjást fljótlega. Þess er ekki að vænta að Guðni sækist eftir eða vinni ný lönd á Suðvesturhorni landsins en það mundi Sif hins vegar reyna að gera yrði hún formaður. Fróðlegt verður að sjá hvernig Framsóknarmenn vinna úr þeim vanda sem þeir eru í.

Athugasemdir

[Halldór Jónsson, 25.5.2007 kl. 01:21]

Framsóknarflokkurinn er loksins búinn að laxéra Halldóri Ásgrímssyni út með afsögn hans Jóns Sigurðssonar.  Bara fnykurinn eftir. Mikið ömurlega lét hann Halldór þennan fara með sig. Og mikið ömurlega fór Halldór með flokkinn sinn. Hugsið ykkur, að fara úr forsætisráðuneytinu fyrir kosningar í vinsælli ríkisstjórn ! Hvað var hann að flýja ? Ég hélt að maðurinn væri dauðveikur og færi þessvegna. Svo er hann bara sprellifandi og hefur það fínt á okkar kostnað.

Ég hreinlega finn til með flokknum að hafa þurft að þola allar þær misgerðir. Mér hefur nefnilega alltaf verið heldur vel til Framsóknarmanna enda á ég í þeim marga stórgóða vini.

En um flokkinn og formanninn góða má líklega syngja á þessu kjörtímabili ; "Nú er hún gamla Grýla dauð, gafst hún uppá rólunum.

Ekki hef ég trú á að Guðni finni upp einhverjar nýjar hugsjónir fyrir þennan Framsóknarflokk  þeirra Sturlunga og Haukdæla. Svo fornt er þetta allt saman.   Ef þeir hafa ekki hendurnar ofaní kjötkötlunum, hvernig ætla þeir þá að fóðra liðið ? Hvað hafa þeir að bjóða nýju fólki ?  Er þetta ekki bara andlega steingeldur flokkur án hugsjóna, rislítill og getulaus með öllu í stjórnarandstöðunni.

[Atli Hermannsson., 25.5.2007 kl. 08:23]

Það verður eftirsjá af Jóni Sigurðssyni, litríkur persónuleiki sem fórnaði miklu fyrir lítið. Manni með hans menntun og starfsreynslu er hafnað í kosningum. Þá er fiski-fiskeldis og búfræðingi einnig hafnað eins og við þekkjum. Sá hefði sómt sér betur sem ráðherra sjávarútvegs og landbúnaðar en stjórnmálafræðingur... það er ég nokkuð viss um..     

[Halldór Jónsson, 28.5.2007 kl. 23:35]

Sæll Jón

 

Hvernig skyldum við höndla málin þegar kemur að því að ráðast á Íran ?

 

Mér finnst brýna nauðsyn bera til að hreinsa upp eftir framsókn sem er búin að hreiðra um sig alltof víða. Nota tækifærið. 

 

Nú er Framsókn kominn frá kjötkötlunum fitug eyrna á milli. Óli bróðir segir að þeir hafi verið að raða sínum mönnum á síðustu árum í allskonar nefndir og ráð. Hann nefnir Pál Magnússon til dæmis í formennsku Landsvirkjunar, Alfreð Þorsteinsson í bygginganefnd Háskólasjúkrahúss, Hjálmar Árnason og Runólf kennara í ráðstöfun kanaeignanna á Keflavíkurflugvelli  og fleira og fleira. Hann spyr af hverju við rekum ekki þessa framsóknarmenn alla strax og setjum okkar stjórnarfólk inn. Hann býðst til að verða sjálfur stjórnarformaður Landsvirkjunar í stað Palla Magg. Viðskiptafræðingur fyrir guðfræðing og sjálfstæðismaður fyrir Framsóknarmann. Og til þess að gera þetta attraktívt þá býður hann sig fram á helmingi lægra kaupi en Páll er að fá.

 

Og af því að  Páll  er í vinnu hjá mér og öðrum skattgreiðendum í Kópavogi sem bæjarritari,  þá finnst mér bara ágætt að hann  sé bara í jobbinu sínu þar og sé ekki að sitja á fundum með Friðriki  uppi í Landsvirkjun. Og verði  Alfreð rekinn og ég settur í hans jobb, þá  býð ég það sama og Óli bróðir, helming  af því sem Alfreð tekur. Einhvernveginn held ég að ég sé minna en helmingi vitlausari en Alfreð þannig að það sé ekkert sjálfsgefið að þjóðin tapi á skiptunum. En þetta getur verið ofmat á sjálfum mér auðvitað. En þó að ég sé bara vesæll byggingaverkfræðingur á móti verðleikum Alfreðs og stjórnunareynslu,  þá er það spurning hver heildarútkoman verður fyrir skattgreiðendur.  Og ef þetta er ekki hægt , þá get ég líka tekið að mér að sitja í  Öryggisráði  Sameinuðu þjóðanna fyrir hálft kaup framsóknarmanns, tel mig alveg kunna  nóg í útlenzku til þess.

 

Af hverju eru framsóknarmenn að stofna nýjan Háskóla suður í Keflavík meðan á sama tíma á að fara að eyðileggja Reykjavíkurflugvöll með því að fara að byggja yfir Háskólann í Reykjavík niður í Vatnsmýri. Af hverju má ekki hafa þann Háskóla þarna suðurfrá ? Þar er allt tilbúið fyrir hann, stúdentagarðar hvað þá meira..Nei það skal byggt fyrir milljarða ofaní sprungið umferðarkerfið á Miklubraut.

 

Það er sama hvar borið er níður, það blasir viða við manni að  framsóknarmenn eru að spreða út opinberu fé í sig og sína.  Byggja sendiráð og Guð veit ekki hvað. Óli bróðir heimtar stopp á þetta allt ekki seinna en strax. Nú geti nýjir stjórnarflokkar tekið við og skipað sína menn í nefndir og ráð.

 

Og svei mér þá,  ég held að við Óli  bróðir getum  alveg sparað ríkinu  mikla peninga og jafnvel grætt sjálfir  á því líka. Hann er bara ríkisstarfsmaður á of lágum launum auðvitað að honum sjálfsagt finnst og ég er eiginlega án fastrar atvinnu og lífeyrisþegi í þokkabót.. Er það ekki talið gott núna að láta þá dúlla við eitthvað meðan þeir geta. Því ekki að láta þá leysa eitthvað af  Framsóknarmönnum af ?

 

Er ekki kominn tími til þess að laxéra Framsókn almennt ?