Af lögbrotum þingmanns Bjartrar framtíðar.

Lögfræðimenntaður þingflokksformaður Bjartrar framtíðar sagði eftir fund þingnefndar með dómsmálaráðherra í gær, aðspurð af fréttamanni RÚV að í því máli sem um var fjallað hefði ráðherra framið fjöldamörg lögbrot.

Aldrei þessu vant spurði fréttamaður RÚV sjálfsögðu spurningarinnar. Hvaða lögbrot eru það? Lögfræðimenntaða þingflokksformanni Bjartrar framtíðar vafðist þá tunga um tönn og setti á almennt fjas út í bláinn. 

Lögfræðimenntaði þingflokksformaðurnn veit það vel að sá sem sakar einstakling hvort heldur það er ráðherra eða annan um lögbrot verður að finna þeirri ásökun stað og vísa til þeirra lagaákvæða sem viðkomandi telur að hafi verið brotin. Sé það ekki gert er öll sú ræða og ásakanir ónýt og rugl eitt. 

Það er ábyrgðarhluti að saka fólk um lögbrot. Þingmenn hafa ekki sérstaka undanþágu frá því að fara með rétt mál. Jafnvel skásti þingmaður Bjartrar framtíðar Theódóra S. Þorsteinsdóttir sem viðhafði ofangreint rugl er þar heldur ekki undanþegin. 

Það er síðan umhugsunarefni í aðdraganda kosninga hvort það lið sem eyðir ómældum tíma í rannsóknarstörf á hinu liðna með ærnum upphrópunum, en sinnir ekki vandamálum nútíðar með tilliti til framtíðar á nokkurt erindi í pólitík.

Hefði ekki verið nær að eyða nokkrum tíma í húsnæðis- og fjárfestingavanda unga fólksins. Ruglaðar reglur og kjör sem öldruðum eru búin svo fátt eitt af því brýnasta sé tekið.

Þar skortir hugmyndir umræður og framtíðarsýn. 

 

Athugasemdir

[Jón Steinar Ragnarsson, 20.9.2017 kl. 10:34]

Að saka mann um lögbrot er de facto að saka mann um glæp. Það eru viðurlög við því er það ekki, ef ásökunin er upplogin. Allavega er það brot á einu boðorðanna.

[Jóhann Kristinsson, 20.9.2017 kl. 22:46]

Það ætti að vera lögbrot að sprengja stjórnarsamstarf út af engu, kanski er það lögbrot?, ég veit það ekki.

[GSS (IP-tala skráð) 21.9.2017 kl. 19:12]

Ríkisstjórnin féll vegna mála tengd "uppreisn æru". Vinstri flokkarnir ásamt fréttastofu RUV opnuðu Pandóruboxið og er það vel. Enginn mælir með þöggun í þessum málaflokki. En þessir aðilar gáðu ekki að sér. Lögreglumaður braut kynferðislega gegn þremur stúlkum og fékk uppreisn æru árið 2009. Tveir menn, annar dæmdur fyrir stórfellt fíknilagabrot, hinn fyrir að nauðga 17 ára stúlku fengu uppreisn æru árið 2011. Á þessum árum var við völd í landinu vinstri stjórn Jóhönnu Sigurðardóttur. Málin voru afgreidd athugasemdalaust og án inngrips Rögnu Árnadóttur, dómsmálaráðherra. Fréttastofa RUV svaf á verðinum á þeim tíma og má heita stórundarlegt. Af þessu má vera ljóst, að "uppreisn æru" málið getur ekki orðið kosningamál. Það myndi draga dilk á eftir sér. Núverandi dómsmálaráðherra er með frumvarp í smíðum sem breyta mun lögum um "uppreisn æru" og er það vel. Það mál á að leysa í friði í þinginu.