Kyrrstöðustjórn

Við lestur stjórnarsáttmálans og rýni í texta ýmissa ályktana stjórnarflokkana sýnist manni helst að víða hafi verið notað cut og paste eftir atvikum og iðulega lítil sjálfstæð textavinna. Stefnt skal að og orðalag með svipaðri meiningu koma fyrir rúmlega 30 sinnum á þeim rúmu 5 blaðsíðum sem um ræðir. Stjórnarsáttmálin er ekki merkilegur fyrir það sem í honum stendur heldur fyrir það sem ekki stendur í honum.

Það er þó ljóst af orðalagi stjórnarsáttmálans að ríkisstjórnin ætlar ekki að breyta um stefnu í:

Sjávarútvegsmálum

Landbúnaðarmálum

Virkjana- og stóriðjumálum.

Leiðari DV í dag lýsir vel þeim vonbrigðurm sem venjulegt fólk á Íslandi hlítur að verða fyrir þegar ný ríkisstjórn ætlar sér að viðhalda okrinu á neytendum og halda óbreyttu gjafakvótakerfi.

Við Frjálslynd töldum það vera forsendu frjálslyndrar umbótastjórnar að gerðar yrðu breytingar á landbúnaðarkerfinu fyrir bændur og neytendur, þjóðarauðlindir yrðu raunveruleg þjóðareign og velferðarhallinn lagaður með því að hækka skattleysismörkin. Ingibjörg Sólrún Gísladóttir reynir að gefa stjórninni það nafn að hún sé Frjálslynd umbótastjórn. Það er ekki rétt. Þetta er kyrrstöðustjórn. Rétta nafnið á henni er Kyrrstöðustjórnin.  Þó má ætla að brimi í kring um kyrrstöðustjórnina þegar gjaldmiðlinum verður ekki haldið uppi lengur með jöklabréfainnspýtingum.

Athugasemdir

[Kjartan Eggertsson, 25.5.2007 kl. 19:39]

Kjarni málsins, -kjarni málsins.

Margir upp árla rísa, ei geta sofið vært, eftir auð heimsins hnýsa, holds gagnið er þeim kært. Sálin í brjósti sofnuð sýnist að mestu dauð, til allra dyggða dofnuð, sem drottinn helst þó bauð. Kaífas lögsögn leiða lært hafa margir enn. Hvað sem höfðingjar beiða, hinir álykta senn, vinskap sig villa láta, viljandi röngu játa. Forðist það frómir menn.

[Gunnar Skúli Ármannsson, 25.5.2007 kl. 21:44]

Sæll Jón, ég er ekki jafn mælskur og Kjartan. Aftur á móti ber ég kvíðboga vegna Jöklabréfanna, þegar þau tapa vinsældum sínum og íslenska krónan verður ekki eins vinsæl þá lækkar hún í verði.

Það sem er sorglegast er að Flateyingar eygja litla von hjá þessari ríkisstjórn. Markaðslögmálin eiga að fá að ráða sumu, ef þau réðu öllu þá væru Flateyingar betur settir. Einokun  ræður öllu. Sá sterki ræður. Ef ég fengi 1000 milljónir beint í vasann fyrir að loka sjoppunni þá myndi ég gera það-ekki spurning.

Ef einhver tíma var þörf á mönnum eins og þér sem láta í sér málið varða þá er það núna. Sigurjón Þórðarson verður líka að halda áfram að vera virkur-við verðum að finna honum farveg í hinu pólitíska litrófi. 

[Jón Magnússon, 26.5.2007 kl. 08:48]

Það er rétt að texti Kjartans er einstakur. Ég er sammála því að við þurfum að fá Sigurjón aftur á þing eftir næstu kosningar hann á tvímælalaust erindi.