"Vinir okkar" Tyrkir og NATO

Tyrkir hafa haldið úti vígasveitum í Sýrlandi frá því að svokölluð borgarastyrjöld hófst þar í landi. Tyrkir hafa leynt og ljóst stutt ýmsa harðsvíruðustu hópa Íslamista og leyft liðsmönnum ISIS, Al Kaída, Al Nusra ásamt öðrum álíka svívirðilegum glæpasamtökum Íslamista frjálsa för og vöruflutninga um Tyrkland. 

Tyrkland hefur oftar en ekki farið með hernaði inn fyrir landamærin á Sýrlandi og lagt undir sig stór landssvæði í Sýrlandi, sem er ekkert annað en árás á frjálst og fullvalda ríki. Atlantshafsbandalagið hefur ekkert haft um þessi brot Tyrkja skv. alþjóðalögum að segja. Sama er um Bandaríkin og Evrópusambandið sem setja viðskiptabann á Rússa fyrir að innlima Krím á nýjan leik í Rússland, þar sem meirihlutinn eru Rússar, en lýsa velþóknun á árásum og landvinningum Tyrkja í Sýrlandi. 

Nú er svo komið að sýrlenski stjórnarherinn sækir að síðasta vígi öfgaíslamistanna í Sýrlandi, en þá koma Tyrkir þeim til hjálpar einu sinni sem oftar, en nú með virkum hætti. Ljóst var að þegar Tyrkir tóku þá afstöðu og berjast við hlið Al Nusra, Al Kaída og ÍSIS liðum í Ídlib, að það mundi koma til átaka við Sýrlenska stjórnarherinn. Það gerðist í gær. 

Þá veinar Erdogan Tyrkjasoldán eins og stunginn grís og heimtar fund í fastaráði Atlantshafsbandalagsins (NATO) og í dag komu utanríkisráðherrar allra 29 aðildarríkja NATO saman á fund í Brussel borg og lýstu yfir eindreginni samstöðu með Tyrkjum og framkvæmdastjórinn lofaði þeim hernaðarstuðningi. 

Hernaðarstuðningi við hvað? Hernaðarstuðningi við að leggja undir sig fleiri landssvæði í Sýrlandi. Hernaðarstuðningi við að aðstoða Al Kaída, Al Nusra og ÍSIS við að halda síðasta landssvæðinu í Sýrlandi. Hvernig er hægt að réttlæta það að utanríkisráðherra Íslands og annarra NATO ríkja skuli lýsa yfir stuðningi við afskipti Tyrkja af Sýrlandi, sem eru brot á samskiptum þjóða skv. alþjóðalögum. 

Óhætt er að reikna með að mál eins og það að lýsa yfir stuðningi við landvinningastríð Tyrkja og samstöðu þeirra með ÍSIS, Al Kaída, Al Nusra og álíka fyrirlitlegum glæpasamtökum hafi verið rætt í ríkisstjórninni, en utanríkisráðherrann hafi ekki einn tekið ákvörðun um að samþykkja afdráttarlausan stuðning við landvinningastríð Tyrkja, mannréttindabrot þeirra og brot á alþjóðalögum. 

Hvenær misstu bandalagsþjóðir NATO eiginlega jarðtengingu við hagsmuni sýna og heilbrigða skynsemi.

Já og hvernig samrýmist það stefnu Íslands í mannréttindaráði Sameinuðu þjóðanna að lýsa yfir algerri samstöðu með ofbeldislandi eins og Tyrkjum þegar þeir leitast við í lengstu lög að tryggja að samtök sem hafa staðið fyrir að hneppa fólk í ánauð, kynlífsþrælkun hryðjuverk og þjóðarmorð haldi tökum á landssvæði í Sýrlandi, fyrir utan þau mannréttindabrot, sem stjórn Erdogan stendur fyrir á heimavelli.

Síðast en ekki síst þá er Gulli utanríkisráðherra og NATO, að lýsa yfir stuðningi við að Tyrkir geri árás á frjálsa og fullvalda þjóð.

Forsætisráðherra bliknar hvorki né blánar yfir þessu, ekki frekar en aðrar stríðshetjur í ríkisstjórninni, sem ætla nú að leggja Tyrkjum hernaðarlega lið við að koma í veg fyrir að frálst og fullvalda ríki geti gengið milli bols og höfuðs á öfgasamtökum og glæpamannasamtökum Íslamista í landi sínu, þar sem meginhluti stríðsmannanna eru erlendir vígamenn eða málaliðar Tyrkja. 

Rétt er að spyrja ríkisstjórn Katrínar Jakobsdóttur hvort þetta sé virkilega sæmandi ríkisstjórn Íslands?

Athugasemdir

[Ómar Geirsson, 28.2.2020 kl. 15:00]

Vel mælt Jón, virkilega vel mælt og hvergi ofaukið.

Kveðja að auatan.

[Jónas Gunnlaugsson, 28.2.2020 kl. 23:12]

Góð grein, Jón Magnússon.

Þessi slóð átti að fara á blog Stefán. 

 https://jonasg-egi.blog.is/blog/jonasg-egi/entry/2246357/

[Jón Magnússon, 29.2.2020 kl. 10:14]

Þakka ykkur fyrir Ómar og Jónas.

[Borgþór Jónsson (IP-tala skráð) 29.2.2020 kl. 21:37]

Þessi niðurstaða hjá NATO þarf ekki að koma á óvart.
Bandaríkin ,Bretar og Frakkar hafa aðstoðað þessi hryðjuverkasamtök alveg frá upphafi ásamt Saudi Aröbuum.
Án baktryggingar, fjárhagsaðstoðar og móralsks stuðnings þessara aðila væri ekkert stríð í Sýrlandi.
Fjölmiðlarir okkar sem eru ekkert skárri en Pravda var forðum daga ,sjá svo um blekkingaleikinn.
Í hvert sinn sem Sýrlandsstjórn reynir að ganga milli bols og höfuðs á þessum viðbjóði sem herjar á landið þeirra væla stjórnmálamenn okkar eins og stungnir grísir og fjölmiðlarnir okkar fara algerlega af hjörunum.
Því er algerlega haldið leyndu fyrir okkur að hvar sem þessi hryðjuverkamenn grafa um sig ,ofsækja þeir pynta og drepa saklaust fók í stórum stíl og daglega.

Þetta sýnir svo ekki verður um villst hvað NATO er hættulegur félagsskapur orðið.
Tyrkir fara í ólöglegt árásarstríð í Sýrlandi og NATO lýsir stuðningi við á.
Bandaríkin fara í ólöglegt árásarstríð í Irak og njóta stuðnings NATO.
Þetta segir okkur einfaldlega að NATO þjóðir geta hagað sér eins og skepnur og hafa alltaf helstu þjóðir Evrópu sem ábekinga að ofbeldinu.
Dæmin eru reyndar miklu fleiri.
Hegðun NATO ríkjanna er farin að bera mjög keim af Þýskalandi nasismans. Stöðug árásarstríð.