Hin nýja sýn á vandanum.

Spakvitrasti stjórnmálamaður norðan Alpafjalla, Logi Einarsson formaður Samfylkingarinnar, fjallar stundum um mál með þeim hætti að vísuhending um fjallið Einbúinn verða næsta hugleiknar eins og segir: Hann Einbúi gnæfir svo langt yfir lágt að lyngtætlur stara á hann hissa.

Í fréttatíma RÚV í hádeginu fann hann 5 ára fjármálaáætlun fjármálaráðherra allt til foráttu og segir að ekki sé ráðist að rót vandans sem sé atvinnuleysi. Logi bendir samt ekki á nein arðbær atvinnuskapandi verkefni, en setti fram nýja kenningu sem er einkar athygliverð.

Þannig sagði Logi formaður að þegar talað væri um tekjubætandi aðgerð í fjármálaáætluninni væri verið að vísa til niðurskurðar og skattahækkana. 

Nú fer mér eins og lyngtætlunum í kvæðinu Einbúinn. Svo vís er þessi kenning Loga, að hún verður ekki sett í vitrænt samhengi við allílfið eða neinar hagfræðikenningar fyrr eða síðar hvorki borgaralegar né sósíalskar.

Hvað er tekjubætandi aðgerð? Skv.orðskýringu er það aðgerð sem kemur í stað skatta og eykur þá væntanlega ráðstöfunartekjur fólks. Okkur lyngtætlunum er því fyrirmunað að skilja þá rökfræðilegu útleggingu Loga formanns, að tekjubætandi aðgerð þ.e. lækkun skatta sé ávísun á niðurskurð og skattahækkanir. 

Umræða verður um málið á Alþingi á morgun og væntanlega mun Logi sem hefur hér haslað sér völl með nýja sýn á hagfræðileg hugtök, orsök og afleiðingu gera okkur lyngtætlunum vitsmunalega grein fyrir því hvernig þetta getur farið saman með þeim hætti sem hann heldur fram.

Athugasemdir

[Jón Steinar Ragnarsson, 23.3.2021 kl. 18:06]

Nú vill hann ekki hærri skatta. Fyrir ári vildi hann ekki skattalækkanir og rökstuddi með því að þeir sem hefðu hærri tekjur fengju hærri afslátt í krónum talið en þeir sem minna höfðu.

Hann mætti í fjölmiðil með malt, appelsín og hangjikjöt svo hann gæti útskýrt þessa stórfenglegu hagfræðikenningu myndrænt.

Ég vildi mæla með honum til Nóbelsverðlauna. Nú hefur hnykkt frekar á og ég held að ég sendi nóbelsnefndini bréf hið snarasta.

[Þorsteinn Siglaugsson, 23.3.2021 kl. 22:16]

Það sýnir best hversu skarpur Logi er að hann skuli láta sér detta í hug að halda því fram að atvinnuleysi sé "rót vandans" þegar allir vita að atvinnuleysið er afleiðing af rót vandans.

[Halldór Jónsson, 24.3.2021 kl. 01:18]

"Nú fer mér eins og lyngtætlunum í kvæðinu Einbúinn. Svo vís er þessi kenning Loga, að hún verður ekki sett í vitrænt samhengi við allílfið eða neinar hagfræðikenningar fyrr eða síðar hvorki borgaralegar né sósíalskar.

Hvað er tekjubætandi aðgerð? Skv.orðskýringu er það aðgerð sem kemur í stað skatta og eykur þá væntanlega ráðstöfunartekjur fólks. Okkur lyngtætlunum er því fyrirmunað að skilja þá rökfræðilegu útleggingu Loga formanns, að tekjubætandi aðgerð þ.e. lækkun skatta sé ávísun á niðurskurð og skattahækkanir. "

Mér fer sem þér vinur minn Jón. Gersamlega rökþrota við þessum texta Loga arkitekts.

[Jón Magnússon, 24.3.2021 kl. 10:43]

Heitir þetta ekki Þorsteinn, að skilja ekki hvað sé orsök og hvað afleiðing. Ekki gott veganesti. En stjórnmálamenn í dag komast upp með hvað eina án þess að almennt sé tekið á bullinu.

[Jón Magnússon, 24.3.2021 kl. 10:43]

Við verðum að hlusta á hann í dag kæri Halldór til að ná samhenginu ef eitthvað er. 

[Þorsteinn Siglaugsson, 24.3.2021 kl. 20:12]

Samkvæmt minni reynslu er þetta einmitt algengasta villan sem fólk gerir í orsakagreiningu, að rugla orsök og afleiðingu saman.