Altúnga Fréttablaðsins

Í háðsádeilusögunni Birtingi segir heimspekingurinn Voltaire frá heimspekingnum Altúngu, sem hafði þá bjargföstu lífsskoðun að allt sem gerðist væri af hinu góða. Algóður Guð hefði skapað bestu jörðina. Eftir mikla hrakninga Birtings og Altúngu, þar sem þeir höfðu misst eigur sínar og ástvinir þeirra höfðu mátt þola pyntingar, verið nauðgað og drepnir og Altúnga hafði verið hengdur, krufinn og húflettur m.a.,þá spyr Birtingur hvort honum hafi alltaf fundist að allt væri upp á það besta í veröldinni. Altúnga svarar að hann hafi sömu skoðun og fyrr enda sé hann heimspekingur og sér sæmi ekki að vera tvísaga.

Með sama hætti og Altúnga túlkaði allar hörmungar með þeim hætti að þær væru leið almættisins til einhvers enn betra, þá túlka Altúnguheimspekingar nútímans allt með þeim hætti, að loftslagsbreytingum og hamfarahlýnun sé um að kenna. 

Þessi trúarheimspeki kemur glögglega í ljós í leiðara Fréttablaðsins í dag, þar sem fyrrverandi þingmaður Sjálfstæðisflokksins skrifar um þau hörmulegu örlög sem okkar bíða. Ólíkt Altúngu hefur hún enga fótfestu í kristinni hugmyndafræði eins og Altúnga en þeim mun meiri í möntrunni um að allt sem gerist illt í heiminum sé loftslagsbreytingum af mannavöldum að kenna.

Illviðri, stormar, frost og snjókoma er loftslagsbreytingum af mannavöldum að kenna. Gott veður og hlýindi líka. Jafnvel þó að við búum á þeim tímum jarðsögunnar, þar sem öfgar í veðurfari og náttúruhamfarir séu minni en á ýmsum öðrum tímum, þá gildir það ekki og hefur enga merkingu ekki frekar en það þegar Altúnga varð þræll á galeiðu, þá var það af hinu góða. 

Jafnvel þó bent sé á þá staðreynd,að engar meiriháttar breytingar hafi orðið á veðurfari í þau rúmu 30 ár sem baráttan gegn meintri hamfarahlýnun hefur staðið, þá gildir það ekki vegna þess að stórir hópar vísindamanna nærast á að halda öðru fram og þægindastjórnmálamenn nútímans reyna að yfirbjóða hver annan í lýsingum á því illa sem sé um það bil að gerast. Þeir setja síðan lög að skapi ofurauðmanna, sem að sjálfsögðu hafa fundið leið til að græða á þessum nýju trúarbrögðum og kynda undir áróðrinum með mynarlegum fjárframlögum til mismunandi trúfélaga loftslagskirkjunnar. 

Þingmaðurinn fyrrverandi og aðrir sem eru ekki botnfrosnir í loftslagskirkjunni mættu huga að því, að engin spá hamfarahlýnunarpostulanna hefur reynst rétt í þau rúmu 30 ár sem þessi áróður hefur verið. Spádómur Al Gore um íslausan norðurpól árið 2008 hefur ekki gengið eftir og spár Karls Bretaprins um endalokin sem hann hefur framlengt í tvígang hafa heldur ekki gengið eftir. Það er ekkert að gerast í heiminum varðandi loftslag, sem ekki hefur gerst áður eða þarf að óttast. Þó svo að nokkur hlýnun hafi orðið þá er það ekkert umfram það sem áður hefur þekkst. 

Í leiðaranum er vísað til þess, að framámaður frá Kyrrahafseyju stóð með fæturna í bala með vatni á ráðstefnu í Glasgow um meinta hlýnun af mannavöldum og hélt því fram, að við þær aðstæður byggju hann og aðrir. Allt var þetta ómerkileg auglýsingamennska, sem fangaði hug þægindastjórnmálamanna.

Staðreyndin er sú, að sjávarborð hefur hækkað og lækkað á ýmsum tímum jarðsögunnar og nú er það tiltölulega stöðugt og auglýsingamennska sendimannsins var til að fá meiri peninga frá hinum "ríku" Vesturlöndum, þar sem þægindastjórnmálastéttin hamast við að finna leiðir til að draga úr lífsgæðum borgaranna og takmarka möguleika neytenda til að geta veitt sér það, sem við höfum talið sjálfsagða hluti. 

Meðan þægindastjórnmálamennirnir, leiðarahöfundar og fjölmiðlafólk hamast við að þylja bænir um hamfarahlýnun og ofurauðmenn kynda undir með myndarlegum fjárgjöfum, sem skila sér síðan margfalt til þeirra aftur, þá er eðlilegt að ungt fólk verði hrætt og trúi hamfaraboðskapnum. Það er því illa gert og þjóðhagslega fjandsamlegt að þægindastjórnmálamennirnir og fjölmiðlafólkið skuli ekki nenna að kynna sér hvað er raunverulega að gerast til að tala af þekkingu um málin. 

Áfram verður því miður haldið þangað til að neytendur og skattgreiðendur átta sig á því, að það er verið að ræna peningunum þeirra og brenna lífskjör þeirra og fjármuni á altari trúarbragða sem standast ekki, en er haldið við með skefjalausum áróðri ríkishyggjuafla nútíma stjórnmála og ofurauðmanna sem mæta á loftslagsráðstefnur á einkaþotunum til að hamra það inn í almúgann, að allt sé þeim að kenna og þeir megi ekki fara í ferðalög í farþegaflugi vegna þess að það séum við skóflupakkið en ekki forréttindaaðallinn, sem völdum því að heimurinn sé að farast vegna hlýnunar jarðar.

Samt snýst jörðin sem fyrr eins og heiðarlegi vísindamaðurinn sagði eftir að hann hafði verið neyddur til þess af prelátum kaþólsku kirkjunnar til að afneita eigin kenningum. Það gerir hún líka og mun gera. Spurningin er bara hvað mikið af vitlausum ákvörðunum verða teknar vegna þessara trúarbragða, hvað þær muni kosta og hvað þær muni rýra lífskjörin mikið.

Athugasemdir

[Hörður Þormar (IP-tala skráð) 8.2.2022 kl. 16:38]

"Illviðri, stormar, frost og snjókoma er loftslagsbreytingum af mannavöldum að kenna". Hver hefur haldð þessu fram? Ég held að jafnvel "falsspámanninum mikla", Al Gore, sem sagður er dunda sér helst við að fljúga heimshornanna milli á þotunum sínum, hafi aldrei dottið slíkt í hug, jafnvel þótt hann hafi spáð íslausum norðurpól ("may-be" en sleppum því) árið 2008.

Loftslagið á jörðinni er að hlýna, um það eru ótal vísbendingar. Dæmi þar um er "Ötzi" maðurinn sem kom undan jökli í Ölpunum eftir 5300 ár. Skriðuföllum í Ölpunum fjölgar vegna bráðnunar sífrera. Í Síberíu bráðnar sífrerinn undan heilu borgunum svo að undirstöður þeirra skekkjast og metangösin streyma upp úr jörðinni. Þar finnast nú hræ af löngu útdauðum dýrum og er jafnvel óttast að óþekktar sóttkveikjur kunni að leynst þar og muni nú losna úr læðingi. 

Það er svo ótal margt sem hefur áhrif á loftslagið. Það að halda því fram að maðurinn skipti þar engu máli er fráleit fullyrðing. Kannski hefur tilvera hans einmitt gert að verkum að loftslagið er eins og það er, bara nokkuð þægilegt. Því ber okkur skylda til að gera allt sem við getum til þess að breyta því sem allra minnst.

[Kristinn Bjarnason (IP-tala skráð) 9.2.2022 kl. 12:56]

Takk fyrir mjög góðan pistil.

Nánast allar breytingar eru yfirvöldum í hag og almenningi í óhag. Yfirvöld hafa aldrei áður gengið eins langt og núna með stórslysi tilraunabólusetninga án nokkurra varnaðarorða og bókstaflega þvingað stóran hluta fólks undir nálina sem mjög líklega eiga eftir að hafa skelfilegar afleiðingar. Loftslagsþvælan er svo annað skýrt dæmi um yfirgang sem rýrir kjör almennings. Hvað kemur næst? Heilaþvottur almennings er hættulegasti vírusinn.