Eigum enga vini nema fjöllin

Kúrdískt máltæki segir. "Kúrdar eiga enga vini nema fjöllin." Kúrdar hafa mátt reyna það um aldir, að vera sviknir af þeim, sem þeir töldu vini sína.  

Kúrdar eru merkileg þjóð, sem talar sérstakt tungumál af indóevrópskum uppruna og telja um 35 milljónir, stærsta ríkisfangslausa þjóðin í heiminum. Kúrdar búa aðallega í fjallahéruðum Tyrklands, Íans, Íraks og í Sýrlandi. 

Varnarsveitir Kúrda í Sýrlandi, börðust hatrammlega gegn hryðjuverkaher Isis  í samvinnu við Bandaríkin. Kúrdar voru þar í fremstu víglínu. Þegar Kúrdar í Sýrlandi höfðu sigrað Ísis höfðu Bandaríkjamenn ekki not fyrir þá lengur og yfirgáfu þá, þegar Erdogan Tyrkjasoldán hóf að herja á þá og taka land og borgir Kúrda. 

Það eru varnarsveitirnar, sem sigruðu Ísis, sem Svíar slíta nú öll tengsl við að kröfu Tyrkja. Lítið leggst þar fyrir mannúð og réttlætiskennd Svía, sem fórna hagsmunum "vina" sinna til að Tyrkir samþykki að þeir fái inngöngu í NATO. 

Það er svo sérstakur kapítuli út af fyrir sig, að NATO þjóðir skuli telja sig eiga samleið með Tyrkjum og Evrópusambandið skuli gæla við að taka þá inn í sambandið. 

Tyrkir hafa á síðustu árum staðið fyrir innrás í Sýrland og hernumið landssvæði Kúrda og Idlib hérað. Á því verndarsvæði Tyrkja eru leifar af hryðjuverkasveitum Isis, Al Kaída, Al Nusra o.fl. Tyrkir veita þeim vernd. Við því segja NATO þjóðir ekkert. Hvernig skyldi standa á því? Hernaður Asera á hendur Armenum og landvinningar voru líka að undirlagi og með aðstoð Tyrkja. 

Evrópusambandið og NATO sjá ekkert athugavert við að Tyrkir herji á lönd og þjóðir og virði ekki "heilög" landamæri. Á þeim bæjum sjá menn enga ástæðu til að beita Tyrki refsiaðgerðum með sama hætti og Rússa. Þannig að það rætist enn og aftur sem kerlingin sagði. "Það er sitthvað Ólafur Pá eða Ólafur uppá."

Við Íslendingar eigum að standa með réttlætinu og taka upp samskipti við Kúrdísku samtökin, sem Svíar eru nú að svíkja, fyrir aðgöngumiða að NATO. Með því mundum við leggja réttlætinu lið eins og við gerðum og erum stolt af þegar Baltnesku þjóðirnar, Eistland, Lettland og Litháen voru að brjótast undan oki Sovétríkjanna. 

Við eigum líka að fordæma aumingjaskap Svía og fordæma árásir Tyrkja á nágrannalönd sín, sem og þjóðarmorð þeirra á Armenum í fyrri heimstyrjöld. 

Þær stöllur Katrín Jakobsdóttir og Þórdís Kolbrún Reykfjörð Gylfadóttir eru þó ekki líklegar til að standa að slíku. Þá gæti kusk komið á bryddaða kjólinn og þær kjósa heldur að halda áfram að faðma Erdogan Tyrkjasoldán á NATO fundum og mæra hann sem fulltrúa mannréttinda og lýðræðis svo galið svo sem það nú er. 

Það er gott að tala um mannúð og mannréttindi þegar ekkert þarf á sig að leggja. En þar skilur á milli feigs og ófeigs hvort fólk er tilbúið í raun til að standa með þeim gildum í verki.

Svíar beygja sig undir kröfur Erdogan

Athugasemdir

[Ómar Geirsson, 6.11.2022 kl. 10:22]

Blessaður Jón.

Þessi pistill þinn er hverju orði sannara, og hann snertir grundvallaratriði mennskunnar og siðaðra samfélaga.

Hringekja eða vítahringur ofbeldis og kúgunar verður ekki rofinn nema við segjum þessi fleygu orð;  "Svona gerum við ekki", og meinum þau.

Kaldrifjuð pólitík sem horfir í gegnum fingur sér þegar meintir bandamenn eiga í hlut, en nota hinn sama fingur til að benda á og fordæma aðra, er alltaf innantóm og án sannfæringar.

Og fyrir utankomandi sem ekki tengist hagsmunum hennar, dæmi um hræsni og tvöfeldni.

Tek síðan undir orð þín að það er óskiljanlegt að Tyrkland sé í Nató og vil bæta því við að það er jafn óskiljanlegt að miðaldaviðbjóðurinn í Saudi Arabíu sé talinn bandamaður vestrænna ríkja.

Takk fyrir Jón.

Kveðja að austan.

[Bjarni Bjarnason (IP-tala skráð) 6.11.2022 kl. 13:44]

Ætli þetta sé nú ekki smá leikflétta hjá sænskum!

Þegar þeir hafa komið sálarskjóðunni inn fyrir gullna hliðið hjá Nató eru þeir orðnir jafnréttháir Tyrkjum og geta eins og þeir gert það sem þeim sýnist. T.d. að standa með Kúrdum!

[Halldór Egill Guðnason, 6.11.2022 kl. 16:50]

 Thakka godan pistil, um malefni sem ekkert er fjallad um i her eda erlendum fjolmidlum. Likurnar a thvi ad dukkulisur i rikisstjorn Islands lati til sin taka, vardandi thetta mal, eru minni en engar. Thar er hraesnin, undirlaegjuhatturinn og fleduskapurinn allsradandi og engu til kostad, sem ruggad gaeti aumingjaskaparskutunni. Framkoma svia er noturleg og lysir algerum aumingjaskap. Adgerdarleysi herlendra stjornvalda er engu betri og hraesnin su sama. 

 Kvedja ad sunnan.

[Jónas Gunnlaugsson, 6.11.2022 kl. 19:02]

Þakka skrifin þín.

Hverjir völdu flóttamenn til Íslands þegar stríðið var í Sýrlandi og Iraq.

Voru það þeir sem áttu olíu peninga sem réðu hverjum var hjálpað?

Voru Yazidar, Kúrdar eða Kristnir valdir?  

Hver ræður gerðinni?  Við, okkar fólk? 

Nei, fjármagnið á bak við gerðina. 

Gadafy sagði, Guð virðist ætla að gefa okkur Evrópu án stríðs. 

Gadafy seldi olíuna fyrir gull denar, og þá var allt sprengt í loft upp í Lýbíu. 

Ég í gömlu bakstjórninni vildi koma í veg fyrir að fólkið þjóðirnar ættu peninga prentunina, peninga bókhaldið. 

Við allir verðum að semja og láta Kallinn með skeggið dæma okkur. 

Reglan frá honum:

Við sjálfir dæmum allt, sá sem fyrirgefur öllum allt, verður fyrirgefið allt. 

Það þýðir ekki að þú getir haldið áfram illskunni og verið kærulaus.

Egilsstaðir, 066.11.2022   Jónas Gunnlaugsson

[Jónatan Karlsson, 6.11.2022 kl. 23:02]

Sammála þér - líkt og oft áður, en minni þó sömuleiðis á hörmulega meðferðina á Palestínumönnum sem margir láta sér þó vel lynda.

[Jón Magnússon, 7.11.2022 kl. 09:12]

Þakka þér fyrir Ómar.

[Jón Magnússon, 7.11.2022 kl. 09:13]

Hjartanlega sammála Halldór.

[Jón Magnússon, 7.11.2022 kl. 09:15]

Jónas það er Rauði krossinn sem velur kvótaflóttamenn hingað og í þeim hópi sem Rauði krossinn velur held ég að hafi ekki verið einn einasti Yasidi eða kristin fjölskylda. Aðferðarfræði Rauða krossins í þessu efni er furðuleg sérstaklega þegar það er skoðað, að það eru einmitt Yasídar og Kristnir, sem hafa mátt þola mest og verst í þeim hræringum sem eru í Mið-Austurlöndum.

[Jón Magnússon, 7.11.2022 kl. 09:16]

Fólk er fólk Jónatan og við eigum að leggja okkar að mörkum til að farið sé að lögum og mannréttinda gætt hvar sem er. Vandi Palestínumanna er margþættur, en það afsakar ekki mannréttindabrot gegn þeim nema síður sé.