Nokkrir merkir sósílistar og þjóðernissinnar

Formaður Miðflokksins gagnrýnir réttilega að kennari í Verslunarskóla Íslands skuli vera með námsefni þar sem hann setur Sigmund Davíð í hóp með Hitler og Mússólíni undir yfirskriftinni "nokkrir merkir þjóðernissinnar"

Framsetningin kennarans er pólitískur áróður ætlaður til að gera lítið úr Sigmundi Davíð og stimpla hann sem öfgamann sem samsami sig best með þeim Adolf og Benito. Það er fordæmanleg. Eðlilegt væri að viðkomandi kennara væri gert að taka pokann sinn, þar sem hann er ekki fær um að miðla hlutlægri fræðslu til nemenda.  

Hægt hefði verið að setja upp glæru með nokkrum þekktum íslenskum þjóðernissinnum. Þá væri Sigmundur Davíð í hópi með Skúla fógeta, Jónasi Hallgrímssyni, Jóni Sigurðssyni forseta, Bjarna frá Vogi, Bjarna Benediktssyni heitnum fyrrum forsætisráðherra og ýmsum öðrum mætum íslenskum þjóðernissinnum.

Þá hefði Sigmundur Davíð komið út í jákvæðu ljósi, en til þess var leikurinn ekki gerður heldur til að koma þeirri ímynd inn hjá nemendum, að Sigmundur væri galinn hættulegur öfgamaður. Svona áróður í skólum gengur ekki og er mun alvarlegri en meint grín á þrettándagleði í Vestmannaeyjum. Fréttastofa RÚV mun þó ekki fjalla um þetta mál eða kalla til sérfræðing eða sérfræðinga til að lýsa fordæmingu á athæfinu.

Hægt hefði líka verið að stilla upp annarri glæru í námsefni nemenda undir yfirskriftinni. "Nokkrir merkir sósíalistar"

Þar hefðu þá verið nöfn þeirra Adolfs og Benito, sem fyrr ásamt t.d. Katrínar Jakobsdóttur, Kristrúnar Flosadóttur og Gunnars Smára Egilssonar. Hefði kennarinn búið til slíka glæru má telja upp á að fréttastofa RÚV hefði eytt drjúgum fréttatíma í að fordæma tiltækið og skilgreina það fræðilega. 

Hvað sem því líður, þá er svona glórulaus pólitískur áróður í skólum fordæmanlegur og þeir sem slíkt stunda eru ekki hæfir til að vera kennarar.

Sigmundi Davíð líkt við Hitler og Mussolini

Athugasemdir

[Guðmundur Ásgeirsson, 10.1.2023 kl. 15:15]

Hinir erlendu menn á umræddri glæru eru ekki "merkir" heldur alræmdir og ekki fyrir þjóðernishyggju heldur harðstjórn, fordóma, stríðsglæpi og ýmis önnur illvirki.

Annars er ekkert slæmt við (hófsama) þjóðernishyggju.

[Geir Ágústsson, 10.1.2023 kl. 15:22]

Það þarf að vinda sér í að búa til nokkrar samsettar myndir af:

- Nokkrum merkum fjölmiðlamönnum (t.d. Goebbels, Bogi Ágústsson og Rasputin)

- Nokkrum merkum skólastjórnendum (t.d. skólastjóri VÍ, Seymour Skinner og Dumbledore)

- Nokkrum merkum einstaklingum með viðskiptagráðu (úr nægu að velja)

[Bjarni Jónsson, 10.1.2023 kl. 17:36]

Sammála. Hvað segja siðfræðingar HÍ við svona siðlausu athæfi ?  Þeir tjá sig gjarna af minna tilefni í fjölmiðlum.  Það býr meira að baki svona athæfi en að draga Sigmund niður í svaðið.  Það er verið að koma því viðhorfi inn hjá nemendum, að heilbrigð þjóðerniskennd sé hættuleg og skyld skefjalausum öfgum.  Þessi kennari rekur skefjalausan áróður og er Verzlunarskólanum til minnkunar. 

[Jón Magnússon, 10.1.2023 kl. 20:31]

Sammála Guðmundur Ásgeirsson, sem sýnir enn betu hversu fráleitt þetta var hjá kennaranum. 

[Jón Magnússon, 10.1.2023 kl. 20:33]

Góðir punktar Geir. Það eru endalausir möguleikar á að búa til svona uppsetningar. En að gera þetta í kennslustund hjá unglingum dæmir fyrst og fremst þann sem þetta gerir. Það er greinilega slökkt á sanngirnis og hlutlægnisperunum hjá henni eða honum.

[Jón Magnússon, 10.1.2023 kl. 20:35]

Sammála Bjarni. Þetta er VÍ til minnkunar og skólinn hlítur að láta heyra í sér á næstu dögum og segja frá því hvernig hann bregst við. En síðan er merkilegt, að RÚV telur þetta ekki einu sinni frétt. Annað var upp á teningnum með grín í Vestmannaeyjum þar sem nornin hét Edda Flak og að sjálfsögðu töldu margir sig geta hneykslast á því og orðið reiðir auk þess sem sérfræðingur RÚV sá kvennafordóma og rasisma í þessu, sem alla vega átti að vera húmor. 

[Geir Ágústsson, 10.1.2023 kl. 21:29]

Jón,

Ég tel mig hafa leyst vandamál ÍBV með því að bjóða mig fram til að vera næsta tröll, en er kannski ekki nógu frægur í það hlutverk. Gætir þú ekki boðið þeim þitt nafn fyrir næsta þrettánda? Það væri leiðinlegt ef gömul hefð leggst út af vegna einhverra virkra í athugasemdum.

[Theódór Norðkvist, 11.1.2023 kl. 11:57]

Jón, sem lögmaður vil ég spyrja þig, er ekki alveg grundvöllur fyrir Sigmund Davíð að fara í mál við Verslunarskólann fyrir ærumeiðandi umfjöllun?

Það er verið að sverta hann í augum heils árgangs í VÍ, sem kemur sér mjög illa fyrir Sigmund Davíð, því þeir sem eru að koma sér á framfæri á stjórnmálasviðinu, eiga allt sitt undir almenningsálitinu. Fyrir utan að svona framsetning er ærumeiðandi fyrir hvern sem er, í hvaða starfsgrein sem er.

Þessi árgangur mun síðan taka með sér þessar ranghugmyndir og dreifa þeim áfram, sem fullorðnir einstaklingar. Margir sem hafa náð langt í lífinu hafa komið úr VÍ, svo þessir nemendur geta orðið áhrifamiklir í þjóðfélaginu síðar. Skaðinn getur orðið mikill og langvarandi fyrir Sigmund og Miðflokkinn.

[Jón Magnússon, 11.1.2023 kl. 18:39]

Það mundi ekki fara fyrir brjóstið á mér að vera næsta tröll í Eyjum ef þeir vilja og ég mundi ekki móðgast þó að hrekkjalómafélagið færi af stað af sinni alkunnu snilld, en þó þannig að það verður alltaf einhver fyrir hrekknum. Fórnarlambavæðingin er orðin svo óskapleg hjá sumum aðilum og hópum og tepruskapurinn að það er í sjálfu sér ekkert annað en hlægilegt. 

Hugsaðu þér Geir, að Páley þá lögreglustjóri í Eyjum þurfti ítrekað að tröllskessan væri kölluð Páley. Það spurði hana engin hvort hún væri móðguð eða krefðist afsökunar. En þegar vildarvinir RÚV eiga í hlut, þá telja þeir sig eiga rétt á afsökunum og "sérfræðingar" RÚV eru kvaddir til og digta upp rasisma eða eitthvað þaðan af verra við öll mál. 

Skelfileg stofnun sem RÚV er orðin. 

[Jón Magnússon, 11.1.2023 kl. 18:40]

Nú er ég ekki hér til að svara lögfræðilegum spurningum á þessum vettvangi Theódór. En vilji Sigmundur láta reyna á það, þá hefur  hann samband við lögmann sinn vegna málsins. Mér finnst að hann eigi tvímælalaust að gera það. Sér í lagi eftir bullukolluganginn í skólastjóra Verslunarskólans. 

[Theódór Norðkvist, 11.1.2023 kl. 19:18]

Þakka svar, var ekki ætlunin að biðja um lögfræðilegt álit til að byggja á, en er alveg sammála, hann ætti að ráðfæra sig við sinn (eða einhvern) lögfræðing með meiðyrðamálsókn í huga. Hann á a.m.k. pening til að borga fyrir slíka ráðgjöf.