Hvika þá allir nema Aðalsteinn?

Verkföll eru slæm og leiða til mikils kostnaðar fyrir þjóðfélagið, atvinnurekendur og launþega. Þess vegna hefur löggjafinn sett reglur  til þess, að komist verði hjá  verkföllum í lengstu lög. 

Þessvegna hefur löggjafinn þ.e. Alþingi sett lög sem heimila trúnaðarmanni ríkisins, Ríkissáttasemjara að grípa til úrræða m.a. setja fram miðlunartillögu, sem aðilar vinnudeilunnar þurfa þá að greiða atkvæði um.  

Í gær setti ríkissáttasemjari Aðalsteinn Leifsson fram slíka miðlunartillögu í samræmi við gildandi lög og reglur. Þá bregður svo við, að allt í einu hamast verkalýðshreyfing og vinnuveitendur að ríkissáttasemjara. 

Forsvarsmenn Eflingar segja að ríkissáttasemjari sé sekur um lögbrot og starfandi forseti ASÍ og burthlaupinn forseti ASÍ setja frá sér rangar ásakanir í garð ríkissáttasemjara og þeirri ákvörðun hans að setja fram miðlunartillögu lögum samkvæmt.

Ótöluleg hjörð skriffinna á samfélagsmiðlum bæta svo um betur og hnjóða í ríkissáttasemjara og halda því fram að hann sé að beita ólögmætu ofbeldi, ráðast á fólk, sem getur ekki borið hönd fyrir höfuð sér og festa láglaunafólk í þrælakistu auðvaldsins.

Þessi skrif eru úr rökrænu samhengi við veruleikann og það sem ríkissáttasemjari ákvað með því að setja fram miðlunartillöguna.

Miðlunartillaga er þess eðlis, að hún kemur engan veginn í veg fyrir að vilji félaga í verkalýðsfélagi nái fram að ganga. Þeir hafa lýðræðislegan rétt með því að beita atkvæði sínu til að samþykkja eða fella tillögu ríkissáttasemjara. 

Til að fella tillögu ríkissáttasemjara þarf meirihluta þeirra sem atkvæði greiða og fjórðung eða 25%  félagsmanna að  verkalýðsfélagsins að lágmarki. Lýðræðislegur réttur verkafólks er því til staðar. Sé það svo að baráttan standi um mikilvæg atriði ætti það ekki að vera vanda bundið að fá fjórðung þeirra sem telja sig órétti beitta til að fella tillöguna. 

Hvar er þá atlagan? Í hverju er árásin fólgin? Er það árás á kjör eða lýðræðisleg réttindi einstaklings eða félaga í verkalýðsfélagi að bjóða þeim að tjá vilja sinn með því að fara að lýðræðislegum leikreglum og greiða atkvæði? 

Raunar er þetta ekki í fyrsta skipti og væntanlega ekki síðasta sem ríkissáttasemjari setur fram miðlunartillögu. En e.t.v. eru þessi glórulausu viðbrögð atvinnurekenda, Eflingar og ASÍ til marks um vaxandi óþol og þjóðfélagslega jaðarmyndun samfélagsins

Ríkissáttasemjari er engin skálkur í þessu efni. Hann fer að lögum. Skálkarnir eru þeir,sem hamast gegn lögum landsins og lýðræðislegri ákvarðanatöku.  

Er það virkilega orðið merki um ofstopa, árás á lífskjör eða fasismi, að gefa fólki kost á því að greiða atkvæði um kaup  sitt og kjör? 

Athugasemdir

[Bjarni Jónsson, 27.1.2023 kl. 13:58]

Ríkissáttasemjari hefur rökstutt ákvörðun sína rækilega, og ég skil vel röksemdir hans og styð ákvörðun hans og gerðir.  Flautaþyrlar fara mikinn og telja sig ekki þurfa að rökstyðja mál sitt, enda vísast ekki í færum til þess.  Með bægslagangi er því haldið fram, að ríkissáttasemjara skorti lagaheimildir fyrir gjörð sinni.  Það virðist vera út í loftið, en ætli dómstólar eigi ekki eftir að dæma um það ?  Framferði Eflingarstjórnarinnar sýnir ótta hennar við lýðræðislega ákvarðanatöku félaganna. Þetta bolsévikkahreiður er komið í algerar ógöngur.   

[Grímur Kjartansson, 27.1.2023 kl. 14:43]

Það er líka athyglisvert að SAJ skuli engum treysta fyrir kjörskránni og að einunigs Efling megi telja atkvæðin
Það verður að spurja hvernig öryggisreglur eru hjá Eflingu (ISO27001 vottað?) og hvernig talningu er háttað
Fyrst ENGINN getur gert það betur en Efling

[Theódór Norðkvist, 27.1.2023 kl. 23:30]

Ríkissáttasemjari er að fara út fyrir hlutverk sitt. Miðlunartillaga er eitthvað sem tekur tillit til krafna beggja aðila deilu. Það er ekki miðlunartillaga að taka kröfu SA hráa upp - krafa sem er einmitt ástæðan fyrir því að Eflin er á leið í verkfall. Það kallast að ganga í lið öðrum deiluaðilanum og þar með er svokallaður Ríkissáttasemjari orðinn vanhæfur til að miðla málum.

Þú þarft ekkert að svara þessu ef þú telur að ég sé að biðja þig um eitthvað ókeypis lögfræðiálit, sem ég er alls ekki að gera. Ég efast reyndar um að þú birtir þessa athugasemd og það verður þá bara að hafa það.Þú birtir ekki síðustu athugasemd mína, sem var þó ekki dónaleg á neinn hátt.