Um hvað reiddust goðin?

Fyrir 1000 árum meðan rökhyggja og ályktunargáfa var í heiðri höfð sýndi Snorri goði Þorgrímsson fram á fánýti trúarlegrar dulspeki með einni setningu þannig að engin mælti í mót.

Tillaga var á Alþingi að kristni yrði lögtekin. Þá kom maður úr Ölfusi og sagði að jarðeldur væri kominn upp og rynni hraunið í átt að jörð og híbýlum eins hálfkristna goðans. Heiðnir menn hlupu þá upp og sögðu þá ljóst, að goðin væri reið yfir því að úthýsa ætti þeim fyrir Hvíta Krist. 

Snorra goða Þorgrímssyni, sem þá þótti með mestu vitmönnum landsins, varð þá að orði: Um hvað reiddust goðin þá, er rann hraunið, er nú stöndum vér á. Heiðnir menn reyndu ekki eftir þessi orð að halda fram að goðin hefðu eitthvað með staðsetningu jarðelda að gera.

Nú er öldin önnur og 70.000 ráðstefnugestir á loftslagsráðstefnu Sameinuðu þjóðanna (SÞ) eru að týnast til Dubai í flugi á einkaþotum eða áætlunarflugi, til þess að fjalla um hvað eigi að gera til að blíðka loftslagsgoðin svo þau útrými ekki öllu lífi á jörðinni.

Hinir sanntrúuðu um ofurhlýnun af mannavöldum hafa bent á mörg dæmi álíka og heiðnir menn gerðu á Alþingi hinu forna árið 1000 um kennileitin sem sýna eiga fram á reiði loftslagsgoðanna.

Fyrir ári snjóaði lítið í Alpana. Fjölmiðlar um allan heim tóku það ítrekað upp og sögðu að skíðaferðir mundu leggjast af þar sem ekki mætti búast við því í heimi hlýnunarinnar að það snjóaði framar í Alpana. 

En náttúran er söm við sig og nú hefur snjóað meira í norðurhlíðar Alpana en í langan tíma og ýmis skíðasvæði opin sem hafa ekki verið það lengi. Það breytir engu fyrir trúaða í Dubai ólíkt heiðnum mönnum á Alþingi forðum, sem virtu rökhyggju. 

Hér á árum áður var jafnan greint frá því að veður mundi vera hlýrra og með nokkrum öðrum hætti vegna náttúrufyrirbrigðisins El Nino í Kyrrahafi sem kemur með nokkurra ára millibili. En það hentar ekki loftslagsfræðunum að segja frá því þegar kröftugur El Nino er í gangi eins og verið hefur. Það rýrir hugmyndafræðina um að maðurinn stjórni veðrinu.  

Trúarbrögð og billjóna dollara hagsmunir láta ekki að sér hæða og því er haldið áfram að hræða almenning með einhliða áróðri hefðbundinna fjölmiðla og stjórnmálastéttarinnar. Skattgreiðendur og neytendur bera kostnaðinn af hátíðahöldum hinna 70 þúsund útvaldra í Dubai, en það eru þó smámunir miðað við það sem stjórnmálamenn í Evrópu ætla að skattleggja neytendur og framleiðendur vegna trúarinnar á hinn almáttuga mann, sem getur með aðgerðum sínum stjórnað veðri á jörðinni.  

Svor rammt kveður að ruglinu og frávikinu frá vísdómsorðum Snorra goða að öfgaloftslagssamtök í Bretlandi hyggjast nú stefna fjölmiðlum fyrir alþjóðlegan glæpadómstól (sem fæst við glæpi gegn mannkyninu)  vegna þess að fjölmiðlarnir leyfa sér að benda á staðreyndir um loftslagsmálin. 

Að sjálfsögðu má ekkert skyggja á velferð veislunnar í Dubai og áframhald þess að hin vita gagnslausu samtök Sameinuðu þjóðirnar, sem mega muna sinn fífil fegri, geti haldið áfram að þyrla upp moldviðri til hagsbóta fyrir hina 70.000 útvöldu og billjónamæringana,sem græða ótæpilega á ruglinu.

 

Athugasemdir

[Ingólfur Sigurðsson, 29.11.2023 kl. 16:28]

Jón minn góður, ég virði þig mikils fyrir að vera kjarkmaður og brautryðjandi í skynsamlegum málflutningi gegn óhóflegri alþjóðavæðingu. Ég er síður sammála í loftslagsmálum eða trúmálum, en það er nú allt í lagi, ég ólst upp við það á mínu heimili hjá afa og nafna þínum að menn ættu að vera sjálfstæðir og tjá sig sem mest án ótta við almenningsálitið, enda var hann sjálfstæðismaður eins og amma.

Ég er reyndar farinn að linast í sannfæringunni um hamfarahlýnunina, en Árni Waag líffræðikennari í Digranesskóla sannfærði mig um þetta snemma á unglingsárunum. 

Í þessum pistli lætur þú líta út fyrir að heiðnir menn séu hjátrúarfyllri en aðrir og að trúin á hamfarahlýnun sé meira hjá þeim. Það held ég að sé mikil einföldun. Að vísu er það rétt að öfgavinstrið er mjög hallt undir heiðna trú, ég hef komizt að því sjálfur með því að kynnast því fólki sem kallar sína trú "Vorn sið", og trú þess er reyndar margvísleg og ekki auðveldlega skilgreinanleg. 

En hitt er þó nær sanni að kristnir menn og sem tilheyra öðrum trúarbrögðum eru meira og minna að daðra við loftslagskvíðann líka. Það er þó sterkur hægrikjarni í Biblíubeltinu í Bandaríkjunum sem er sennilega sterkasta fylkingin gegn þessum loftslagskvíða, og er hluti af Trump fylginu. Og vel að merkja finnst mér Trump merkileg kempa og tel hann hafa gert gagn frekar en Biden.

Þú skrifar um loftslagsgoðin. Það kann vel að vera að þau séu til, en kenningin er þó opinberlega sú að þetta sé allt MANNINUM AÐ KENNA, eins og minnir frekar á Stalín og kommúnismann, enginn guðdómur, enginn guð, engir guðir, bara almætti mannsins.

Þessi trúarlega dulspeki er nefnilega tilheyrandi öllum trúarbrögðum. Þeir sem eigna djöflinum, eða guði kristinna manna alvald, að stjórna veðri, eða því sem hrjáir eða gleður, hljóta einnig að aðhyllast trúarlega dulspeki, ekki satt, kristna að vísu.

En þú ert vel ritfær og pistillinn er skemmtilegur. Nær sanni er þó að kalla þetta trúleysi og kommúnisma, og að glóbalistarnir noti sér trúarlega dulspeki, sem hefur alltaf verið til í þjóðfélögum þar sem trúarbrögð voru til. Eða eins og Páll Vilhjálmsson hefur skrifað um, þetta eru ný trúarbrögð nútímans, og Gréta Thunberg verndardýrðlingurinn, eins og Jóhanna af Örk til forna.

[Jón Magnússon, 29.11.2023 kl. 21:15]

Þakka þér fyrir skemmtilegt innlegg Ingólfur.  Ég er síður en svo að hnýta í einhver trúarbrögð. Þetta er frekar sett fram í dæmaskyni.