Við erum epli sögðu hrútaberin

Miklir menn erum vér Hrólfur minn sagði hamfararhlýnunarráðherra Bandaríkjanna um leið og hann kvaddi Jabar gistivin sinn í Dubai, eftir að þeir höfðu náð samkomulagi um marklausa yfirlýsingu um að draga skuli úr notkun jarðefnaeldsneytis eftir árið 2050 allt til þess, að það hlýni ekki á plánetunni jörð.

Sé það svo, að notkun jarðefnaeldsneytis sé svo mikilvægt sem af er látið til að auka hitastig jarðar og við búum við þvílíka hamfarahlýnun að jörðin er að farast skv. því sem kommúnistinn Guterres hjá SÞ heldur fram sem og loftslagspáfar eins og Al Gore og hamfarahlýnunarráðherra Bandaríkjanna halda fram. Hvernig má það þá vera að það sé hægt að bíða í 30 ár eins og ekkert hafi í skorist. 

Sitt er síðan hvað, að þegar lokaályktunin er skoðuð nánar, þá kemur í ljós að þessi ályktun varðandi jarðefnaeldsneytið skiptir ekki nokkru máli og er marklaus viljayfirlýsing um að "stefnt skulil að" eins og segir svo víða í ályktunum stjórnmálaflokka án mikils takmarks eða tilgangs.

Svo sem fyrr hefur verið á öllum loftslagsráðstefnum SÞ grétu forustumenn eyríkja í Kyrrahafi stórum krókódílatárum yfir að eyjar þeirra væru að fara í kaf og þeir þyrftu að fá meiri peninga frá Vesturlöndum vegna þess. Staðreyndin er hinsvegar sú, að það er ekkert einasta eyríki sem er að fara í kaf og land sumra þeirra hefur aukist en ekki minnkað vegna þess að sjávarborð er ekki að hækka með óeðlilegum hætti. 

Með hverju árinu sem líður kemur betur og betur í ljós, að allt tal um ofurvald mannsins yfir veðrinu er byggt á sandi tölvulíkana, sem öll hafa spáð rangt á undanförnum 28 loftslagsráðstefnum og þar á milli. 

Enginn man lengur eftir því hvað gerðist á ráðstefnu Evrópuráðsins í Reykjavík í vor nema Rósa Björk sem á að sjá um úrvinnslu á því sem ekkert er. Hvergi er minnst á bótasjóðinn sem átti að stofna og sama verður um ályktunir COP 28, að ekkert er handfast eða samþykkt sem máli skiptir. 

En því miður munu Vesturlönd halda áfram að hamra járnið heima fyrir og skattleggja eigin borgara og draga þá í átt til örbirgðar á grundvelli grænna lausna, sem allar eru styrktar af ríkisfé.

Þá er lausnarorðið og orkuskipti, sem eru svo dýr, að það ræður engin við þau með núverandi tækni án þess að færa lífskjör aftur á stig þess sem var í Evrópu á miðöldum. Á sama tíma á að hafna ódýrustu lausnum í orkumálum, sem er jarðefnaeldsneyti, vatnsafsl- og karnorkuver.

Um árabil hefur það verið til siðs í skólum á Vesturlöndum, að hræða börn vegna þeirrar ógnar sem hamfarahlýnunin hefur í för með sér. Börnin hafa farið lafhrædd í rúmið og óttast að þau gætu stiknað þá nóttina vegna draugasagnanna um hamfarahlýnun. 

Það væri eðlilegra að skólarnir fræddu börnin um hina raunverulegu vá, sem er ógnarstjórn pópúlískra stjórnvalda á Vesturlöndum, sem hamast við að gera lífskjör almennings verri og taka stöðugt meiri völd til sín og sliga með því samkeppnisþjóðfélagið. Það er sú vá sem við stöndum frammi fyrir vegna verka siðblindra, duglítilla stjórnmálamanna, sem stefna að því með einum eða öðrum hætti að taka samkeppnisþjóðfélagið úr sambandi með öllum þeim hörmungum sem því mun fylgja sbr. þau víti sem við höfðum fyrir augunum fyrir 1989 áður en Kommúnisminn féll. 

Hægra fólk hvar sem er á Vesturlöndum á að taka höndum saman í baráttunni gegn firrum og rugli loftslagskirkjunnar, til hagsældar fyrir hinn almenna verkamann eins og sagt var forðum í baráttu gegn ógnum ríkisvaldsins og ofurauðvaldsins.

 

Athugasemdir

[Ómar Geirsson, 14.12.2023 kl. 16:24]

Blessaður Jón.

Afneitun raunveruleikans er alvarleg, og í ljósi margbrotinna hitameta síðustu 5 ára eða svo, þá ættir þú sem skynsemisvera að fylkja liði með okkur sem eigum börn, barnabörn, kannski í þínu tilviki barnabarnabörn, sem við sórum að verja.

Öll sú vitleysa sem þú bendir hér á að ofan hefur ekkert með þá staðreynd að jörðin er að hlýna, og stór hluti hennar er að verða óbyggilegur vegna þessarar hlýnunar.

Hátt í milljarður manna getur aðeins þakkað líf sitt vatnsbirgðum sem árþúsundin höfðu geymt í jörðu, og þeir vatnsgeymar er allflestir komnir yfir þolmörk sín.

Ég ætla ekki að eyða orku minni Jón að falla um harikari hins múslímska heims í Mið-Austurlöndum að vega að ríki gyðinga, þar sem eina þekkingin og tæknin er til staðar að takast á við vatnsskort, mig langar hins vegar að gefa vægi skynsemisorðum þínum, sem fyrir utan afneitun á augljósum raunveruleik, voru mörg og mikil.

"Hvernig má það þá vera að það sé hægt að bíða í 30 ár eins og ekkert hafi í skorist".

Segir eiginlega allt sem segja þarf um þau öfl sem hafa gamblað um framtíð barna okkar.

Fíflskan hjá vel meinandi fólki sem kóar með, er óendanleg, hins vegar langar mig að minnast á óhugnanlega tilviljun, eða réttara sagt, samræmi sem ekki er hægt að líta framhjá.

Hvað var þetta sem Kóoppið-eitthvað átti að gera??, var það ekki einhver lokaályktun um jarðeldsneyti, eins og steinöld væri svarið.  Samt þurfti einhverja vitglóru í meinta síðustu ályktunina, sem var ekki beint trúlegt miðað við fundarstaðinn og kostunaraðila þessarar ráðstefnu í Dubai.  Eða hvað sem þetta miðaldaríki heitir.

Þá gerðist eitthvað sem yfirtók alla umræðu, hófst með voðaverkum Hamas í Ísrael sem augljóslega myndu kalla á gagnaðgerðir.

En hver kostar Hamas, og er Íran ekki olíuframleiðsluríki, og hvert liggja hinir ósýnilegu strengir frá Sítunum í Íran til miðaldahyskis Sunníta við Persaflóann.??

Hvernig sem á það er litið, þá voru morðárásir Hamas á óbreytta borgara í Ísrael, út úr kú miðað við tiltölulega friðsælt ástand þarna hjá klikkhausunum á spildunni sem Rómverjar fengu alveg nóg af fyrir svona 2.000 árum síðan.

Svo sprakk allt í loft upp, og aðeins eldri menn, sem hafa upplifað ýmislegt um ævina, sáu í gegnum moðreykinn.

Líkt og þessi pistill þinn er Jón.

Ég get ekki að því að þetta hvarflar að mér.

Kveðja að austan.

[Tómas Ibsen Halldórsson, 14.12.2023 kl. 22:38]

Algerlega sammála þér Jón. Lygar og blekkingar er það sem dynur á okkur í dag og þar fara stjórnvöld og hinir ofsaríku fremstir í flokki með sinn ljóta áróður.

Ég er farinn að hallast að því að annaðhvort eru stjórnvöld keypt af hinum ofurríku eða að þetta fólk sé heilaþvegið.