Nýju fötin keisarans í búningi nútíma "vísinda

Við sem fylgjumst með fréttum víða úr heiminum, sjáum að þær verða líkari og líkari enda auðvelt að vera á samningi við stóra fréttaveitu. 

Eitt sem einkennir fréttamennsku í dag er, að ekki má vera rok, rigning eða hitabylgja án þess að loftslagsbreytingum af mannavöldum sé kennt um. Sanntrúaðir munu setjast á ráðstefnu fína fólksins í olíuríkinu Aserbajan innan skamms til að fullvissa sig og aðra um að grípa verði til víðtækari aðgerða og aukinnar skattlagningar til að koma í veg fyrir ofurhitnun. 

Ed Miliband í Bretlandi, dæmigert flokkslíkamabarn  sem hefur aldrei gert neitt annað en verið í pólitík, fyrst sem aðstoðarmaður og svo þingmaður. Hann veit ekkert um þjóðfélagslegan veruleika nema í þinghúsinu í Westminster. Hann hefur aldrei unnið annað en í pólitík. Miliband er umhverfis ráðherra Breta og kom í veg fyrir framtíðarolíuvinnslu úr Norðursjó, þannig að Bretar verða þá að flytja olíu sem þeir nota um langan veg sem þýðir aukna orkusóun. Hann berst fyrir fullkominni kolefnisjöfnun, sem mun leiða til þess að fleiri Bretar deyja úr kulda og skattheimta mun aukast gríðarlega. Þannig þjóðfélagi ætla umhverfisruglarar að koma á. 

Hér sjáum við birtingarmyndir fáránleika aðgerða til að koma í veg fyrir ofurhlýnun. Trjákurli er dembt í sjóinn og til stendur að dæla niður erlendu eitri í hraunfláka landsins og verkefni sem fær hundruð milljarða í styrk frá EB. Forsvarsmenn þess berja sér á brjóst og segja sjáið þið hvernig við unnum Golíat hamfarahlýnunarinnar með því að flytja hana til Íslands.

Á sama tíma er ráðstefna í Reykjavík til að búa til nýja draugasögu loftslagsvísinda, að Golfstraumurinn gæti breytt um rás og hér og allt suður til Bretlands og Suður Þýskalands yrði óbyggilegt vegna íshellu sem legðist yfir allt vegna hnattrænnar hlýnunar. Varla veit nokkur á meiri endemi í málflutningi en eitt er ljóst, að við erum ekki komin lengra en það, að það veit engin hvað ræður því að Golfstraumurinn skuli streyma með þeim hætti sem hann gerir. 

Eitt vekur þó furðu. Hin heilögu Vesturlönd með Bandaríkin í broddi fylkingar, sem og mótmælahópar hafa ekkert við það að athuga, að Aserbajan hafi gert innrás í lönd Armena, drepið þúsundir og lagt undir sig stór landsvæði þar sem Armenar hafa búið öldum saman. Engum dettur í hug að útiloka þá eins og Rússa sem réðust inn í Úkraínu.

Þá þótti íslenskum ráðamönnum illu heilli rétt að loka sendiráði okkar í Moskvu, sem er eitt vitlausasta asnaspark í íslenskum utanríkismálum síðan landið fékk sjálfstæði ásamt því að loka á viðskipti við Rússa,en á sama tíma eiga frændur okkar Danir góð viðskipti við Rússa og selja þeim m.a. lyf.. 

Eigum við þá ekki til að vera samkvæm sjálfum okkur að hundsa loftslagsráðstefnu SÞ í Aserbajan. Hundrað manna sendinefndin gæti þá setið heima og gæti gert gagn á meðan. 

Athugasemdir

[Ómar Geirsson, 24.10.2024 kl. 11:45]

Vel mælt Jón.

Við erum kannski ekki alveg sammála um áhrif risabrennslu mannkyns á kolefniseldsneyti, en við erum sammála um vitleysuna sem er í gangi, og réttlæt með vísan í meinta hamfaraógn.

Sem ég reyndar upplifi sem raunveruleik og tel því að menn eiga að bæta úr, en ekki gera illt verra.

Að mínu viti er yfirliggjandi skaðræðishönd þeirra örfáu fjölskyldna sem hafa safnað megnið að auði heimsins í vasa sína og pyngjur.  Öll vitleysan er í þeirra þágu, að gera einstaklingum og fyrirtækjum þeirra því sem næst ókleyft að framleiða á Vesturlöndum, með reglufargani, loftslagssköttum og tilbúnum orkuskorti, og verða svo undir í samkeppni við loftslagssóða Asíu.

Þetta er líka fólkið sem fjármagnar froðu rétttrúnaðarins um opin landamæri, þjóðarskipti norrænna þjóða, óöld og upplausn.

Vonandi náum við Íslendingar þó að kjósa gegn opnum landamærum í næstu kosningum.

En til að svo sé er verk að vinna.

Kveðja að austan.

[Ásgrímur Hartmannsson, 24.10.2024 kl. 17:40]

Allt þetta baul fer undir sama hatt: kolefnistrú.

Þetta er trúflokkur sem hefur truarsetningar, vísindin eru sveigð til hlýðni með lysenkoisma til þess að passa við trúna.

Það þarf að hunsa þetta lið, skopast að þeim, hæða þá.  Þetta er nefnilega bæði vangefið og dýrt, og verður dýrara með hverjum degi,

[Grímur Kjartansson, 25.10.2024 kl. 08:44]

Einhver árangur náðist í minnkun CO2 árið 2020 (Covid) en síðan hefur útblásturinn bara aukist
Líklega verður lagt til í Baku höfuðborg Aserbajdsjans að biðja kínverjana um að koma með nýja veiru svo hægt verði aftur að slökkva ljósin og loka í nafni trúarinnar á hamfarahlýnun