Ofstjórnarsamfélgið

Ýmsir stjórnmálaflokkar hafa bæði hér á landi og í Evrópu reynt að byggja upp ofstjórnarsamfélög á grundvelli hræðsluáróðurs og ofbeldis. Krafist er hlýðni við hina einu réttu skoðun og þeir sem óhlýðnast hafa verra af. Þetta er hugmyndafræði allsherjarríkisins sem fasistaforinginn Benito Mussolini talaði fyrir á síðustu öld og kommúnista- og sósíalistaflokkar hafa síðan tileinkað sér. 

Undanfarna 3 áratugi hefur verið haldið uppi linnulausum áróðri um að allt sé að farast vegna hlýnunar jarðar. Ekkert af þeim spádómum sem settir hafa verið fram í því sambandi þessa þrjá áratugi um hamfarahlýnun hafa reynst réttir öðru nær. En á grundvelli þessa hræðsluáróður hefur ríkisvaldið hækkað skatta, sem bitna verst á neytendum og boða víðtæk bönn við eðlilegum lífsháttum. 

Nú hafa tveir stjórnmálaflokkar, Samfylking og Viðreisn tekið að sér að yfirbjóða VG og Pírata í dellumakeríinu varðandi viðbrögð við meintri hnattrænni hlýnun. Formenn Viðreisnar og Samfylkingar lýsa því yfir að þær vilji banna nýskráningu bensín og díselbíla á næsta ári takk fyrir. 

Manni verður nánast orða vant þegar maður heyrir svona algjöra dellupólitík. Af hverju á að beita valdi ríkisins til að banna notkun á hagkvæmasta bifreiðaeldsneytinu?  Mun þetta bann hafa einhver afgerandi áhrif á losun kolefnislofttegunda í heiminum? Að sjálfsögðu ekki. 

Hvað er það þá, sem hefur gert þær Þorgerði Katrínu Gunnarsdóttur formann Viðreisnar og Kristrúnu Mjöll Frostadóttur formann Samfylkingarinnar svona snargalnar að láta sér detta í hug að ætla að banna nýskráningar bensín- og díselbíla á næsta ári?

Svarið er dyggðaflöggun og vilji til valdbeitingar gagnvart almennum borgurum. Þar sem spurningin um nýskráningu bensín og díselbíla hér á landi hefur engin áhrif á eitt eða neitt í veröldinni, þá er þetta ein alvarlegasta birtingarmynd ofstjórnar og valdbeitingar gagnvart neysluvenjum venjulegs fólks sem heyrst hefur. 

Stjórnmálamenn sem svona tala og hugsa hika ekki við að setja reglur um að hver borgari skuli að viðlagðri ábyrgð að lögum einungis borða skv. matseðli frá Lýðheilsustofnun ríkisins. Já og það sem rætt hefur verið að hver borgari fái ákveðinn kvóta til að ferðast í flugvélum t.d. eina flugferð á ári á meðan elítan flýgur óhindrað á einkaþotunum sínum. 

Óneitanlega finnst manni það miður, að stjórnmálaleiðtogar flokka sem hingað til hefur mátt ætla að væru miðvinstri flokkar eru svona gjörsamlega rofnir úr tengslum við grundvallarreglur um frelsi einstaklingsins og borgaraleg réttindi, að þeim finnst í lagi að beita ofstjórnarvaldi sínum með þeim hætti,sem eingöngu einræðisstjórnir hafa hingað til látið sér detta í hug. 

Þessar yfirlýsingar formanna Viðreisnar og Samfylkingar sýna að þeim er ekki treystandi til að tryggja lágmarksfrelsi einstaklinganna til að lifa lífinu að eigin geðþótta skv. eðlilegum hófstilltum reglum réttarríkisins og lýðræðisþjóðfélagsins.   

 

Vilja banna skráningu nýrra bensínbíla á næsta ári

Athugasemdir

[Ómar Geirsson, 11.11.2024 kl. 02:09]

Blessaður Jón.

Það er eins og mér þykir þú hafa gleymt einu atriði, ekki smáatriði, heldur lykilatriði, var það ekki núverandi umhverfisráðherra sem ætlaði að beita ofbeldi ráðstjórnarinnar með því að flýta banni á farartækjum sem nota jarðeldsneyti??

Eins heimskt og það er, í landi jökla og ísa, þá var það Guðlaugur Þór sem blés í þá forheimsku lúðra.

Ég er reyndar ekki sammála þér um augljósa hlýnun jarðar, en ég hygg samt að það þarf meiri firringu til að afneita henni, og fullyrða á sama tíma að meint ábyrgðarfólk hinnar íslensku forheimsku séu stjórnmálakonur sem hafa verið í stjórnarandstöðu frá því að elstu menn muna.

Mikið mætti málflutningur þerra vera öflugur til að skýra núverandi stefnu íslenskra stjórnvalda.

Í alvöru Jón, þú varst betri þegar þú varst bara þú.

Miklu betri.

Kveðja að austan.

[Jón Magnússon, 11.11.2024 kl. 08:12]

Kæri vinur minn Ómar. Mér þykir gott að fá gagnrýni þína og vissulega er mikið til í því hjá þér, að menn sem hafa tekið að sér að vera málsvarar flokks eru heftari í umræðunni en ella. Þó að ég sé bara í sjötta sæti Sjálfstæðisflokksins í Reykjavík norður og sé fjarri því að vera í námunda við þingsæti eða annað góðgæti og líti frekar á sæti mitt á listanum sem fórn af minni hálfu fyrir þjóð og Flokk, þá verða menn sem skipa sama flokk að vera samstíga svo langt sem það getur náð. Það er því sennilega rétt hjá þér að ég sé betri sem bara ég en ekki ég í kompaníi við allífið. En nú er verk að vinna.

[Ómar Geirsson, 11.11.2024 kl. 12:11]

Já Jón, þetta er hárrétt, það þarf stundum að gera meir en gott þykir.

Vonandi muntu hafa áhrif til góðs á stefnu flokks þíns.

Eiga jafnvel þátt í að gera hann aftur að borgaralegum íhaldsflokki.

Sjáum til.

Kveðja að austan.

[Guðjón E. Hreinberg, 11.11.2024 kl. 12:45]

Menn gleymda að Fasisminn var í raun endurskoðun á Marxisma, í þeim tilgangi að tæla fólk til fylgis, því fram til 1920 fússuðu allir við Marxisma, eins með Trotsý útgáfuna sem Lenín notaði.

Fasismi er því Marxismi II.

Varðandi loftlagsmálin; ég heyrði eitt sinn þá fullyrðingu að engin tölfræði styddi áróðurinn um Loftlagsbreytingar af mannavöldum, og ég eyddi í kjölfarið talsverðum tíma næstu tvö árin í leit að mæligögnum og fann engin.

Hins vegar fann ég annað, og það er að allur sá áróður byggist á tölvulíkönum frá IPCC sem aldrei hafa staðist sem spálíkön, EN, aðalmálið er að Koltvísírings útskýringarnar standast enga eðlisfræði.

Bestu kveðjur.

[Jón Magnússon, 11.11.2024 kl. 22:01]

Þakka þér fyrir það Ómar. Ég hef viljað gera Sjálfstæðisflokkinn að frjálslyndum íhaldsflokki alla tíð með einni viðbót flokk sem vill mannúðlegt markaðshagkerfi samkeppni en ekki einokunar eða fákeppni. 

[Jón Magnússon, 11.11.2024 kl. 22:01]

Þakka þér fyrir Guðjón algerlega sammála.