Mikill bísness og mikið fjör

Loftslagsráðstefnur eru að verulegu leyti hættar að snúast um loftslagsmál heldur bísness þeirra ofurríku, sem gera út á að ná þeim skattpeningum sem gagnrýnislausir stjórnmálamenn leggja á borgara sína vegna svonefndra aðgerða í loftslagsmálum.

Ekki þvælist fyrir neinum að ráðstefnan er háð í olíuríkinu Aserbajan, sem nýlega réðist á Armena og drápu mann og annan og lögðu undir sig mikið landssvæði. Þau landamæri voru ekki eins heilög og landamæri Úkraínu að mati Biden eða Þórdísar Kolbrúnar og morðingjarnir og landránsmennirnir í Bakú fengu að fara sínu fram.

Loftslagsráðstefnan byrjaði á því að forseti Aserbajan lýsti olíu og jarðgasi sem "gjöf frá Allah". Að sjálfsögðu fúlsar fólk ekki við Guðs gjöfum annað væri það nú og sjálfsagt syndamlegt í sumum þjóðfélögum. 

Flestir stjórnmálaleiðtogar heimsins voru fjarverandi. Svo virðist sem stjórnmálamenn telji þessar kaupstefnur ekki svo merkilegar lengur að það þurfi að eyða tíma í þær. En viðskiptin blómsta sem aldrei fyrr enda eftir miklu að slægjast fyrir kauphéðna til að ná sem mestum peningum almennings í "græna" styrki m.a. til að dæla eitri niður í jörð á Íslandi eða henda trjákurli í sjó allt til að vinna gegn hnattrænni hlýnun og hér eru hundruðir eða þúsundir milljarða í húfi. 

 

Að sjálfsögðu láta fulltrúar og forustumenn helstu fyrirtækja sem framleiða og selja jarðefnaeldsneyti sig ekki vanta þar sem að það má heldur betur græða á vitleysunni. 

Svona er gerviveröldin. Undarlegt að íslenskir stjórnmálamenn skuli vilja búa í svona gerviveröld og leggja þunga skatta á í fólkið sem hækkar vöruverð og vexti. 

Eina rétta ákvörðunin er að taka ekki þátt í þessu sjónarspili lengur. Við höfum annað betra við peningana að gera en fórna þeim til lipurra kauphéðna sem eru eingöngu eftir peningum almennings.