Þetta gengur ekki

Ronald Reagan gætti þess, að vera alltaf í þéttu sambandi og samráði við bandalagsþjóðirnar í Evrópu áður en stórpólitískar ákvarðanir voru teknar, sem vörðuðu sameiginlega hagsmuni. Því miður virðast hvorki Trump né helstu stjórnendur Evrópu átta sig á mikilvægi þess, að vestræn lýðræðisríki gangi sem mest í takt. 

Bandaríkjaforseti hefur hamast að Úkraínu með að þeir semdu um vopnahlé á þeim forsendum sem Bandaríkin hafa teiknað upp. 

Loksins samþykktu úkraínsk stjórnvöld samningsdrög Bandaríkjanna og því var beðið í ofvæni eftir samtali þeirra Pútín og Trump í gær um vopnahlé. Við því var búist að eitthvað kæmi fram í því samtali og í kjölfar þess, sem gæti verði viti, sem leiðarljós til friðar. 

Því miður var niðurstaðan úr viðræðum Pútín og Trump afar rýrar, mun marklausari en sparnaðartillögur ríkisstjórnarinnar og vesælli en músin sem fæddist, að mati sumra, þegar fjallið tók jóðsótt.

Svo virðist sem Pútín hafi tekist að semja um eitthvað sem skiptir engu máli og komist upp með að hundsa tillögur Trump og nú líka Úkraínu um vopnahlé, án þess að séð verði, að það skipti Pútín einhverju máli. Kósýheitin í spjalli foretanna Pútín og Trump var að því er virðist alls ráðandi, en árangurinn til að ná fram raunverulegu vopnahléi og leiðarljósi í átti til friðar engin. Í raun hafnaði Pútín vopnahléinu að öðru leyti en því sem bindur hendur Úkraínumanna en veitir Rússum á sama tíma fullt svigrúm. 

Betur má Trump nú reynast ef duga skal. Það er ástæðulaust að gefa Pútín öll trompspilin á sama tíma og girt er fyrir góð og nauðsynleg samskipti við helstu bandamenn í Evrópu. 

Athugasemdir

[Ómar Geirsson, 19.3.2025 kl. 12:03]

Blessaður Jón.

Vísa í fyrra spjall okkar.

Virkilega góð skrif og öllu hugsandi fólki ljóst að núna standa spjótin á Trump.

Ég get bara ekki ímyndað mér að hann láti Pútín hafa sig að fífli, en sjáum til.

Mín spá er að risinn rumski og safni bandamönnum gegn Kína.

Þar liggur ógnin, þar er ofureflið sem öskrar á bandamenn.

En eins og kýrhausinn veit, þá er margt skrýtið í honum.

Kveðja að austan.

[Jón Magnússon, 21.3.2025 kl. 11:16]

Nú sem fyrr erum við iðulega sammála og nú algerlega. 

[Kristinn Bjarnason, 22.3.2025 kl. 09:24]

Það verður ekkert vopnahlé eða friður nema á forsendum Rússa sem eru búnir að vinna þetta stríð fyrir alllöngu síðan. Eins og allir vita núorðið þá eiga bandaríkjamenn þetta misheppnaða stríð algjörlega skuldlaust og er til skammar fyrir bandaríkin.