Æ skal gjöf til gjalda

Í milliríkjasamskiptum hefur tíðkast, að gefa æðstu stjórnendum gjafir. Kínversk stjórnvöld gáfu Nixon þáverandi forseta Panda birni og Býsanska ríkið gaf öðrum kristnum stjórnendum flísar, sem áttu að vera úr krossi Krists og allt var þetta til marks um vilja til samstarfs og vináttu. 

Æ skal gjöf til gjalda og þess vegna hafa flest ríki sett ákveðnar reglur um gjafir sem erlend ríki gefa stjórnendum t.d. forseta Bandaríkjanna. Fái forsetinn gjöf sem er meira virði en 480 Bandaríkjadalir, þarf að tilkynna gjöfina og afhenda hana. 

Furstadæmið Quatar hefur nú boðist til að gefa Bandaríkjaforseta Júmbó breiðþotu. Trump segir að bara "stupid person"(heimskingi)mundi segja nei við svona gjöf hvaða siðrænu orð sem menn vildu tala um í því sambandi. Hvað sem því líður, þá er þetta gjöf sem er umfram það sem hægt er að þiggja. Hver sem þiggur slíka gjöf er skuldbundinn gefandanum. Æðsti maður stórveldis er "stupid person" ef hann þiggur slíka gjöf. 

Í Quatar búa 2.6 milljónir en ríkisborgarar eru bara 313.000 já færri en íslendingar. Furstafjölskyldan Al Thani hvers nafn menn þekkja hér frá hruninu stjórnar Quatar. 

Quatar hefur tekið þátt í ýmsum vafasömum stríðsaðgerðum með Vesturlöndum m.a. þegar Saddam Hussein og Gaddafi var steypt af stólki. Þrátt fyrir það hefur Quatar haft náið samband við Íslamska hryðjuverkahópa og það í svo miklum mæli að Saudi Arabía, Sameinuðu arabísku furstadæmin og Egyptaland lokuðu á landið 2017 tímabundið vegna þess. Skyldi eðlið eitthvað hafa skánað síðan. Mörgum er það til efs og nefna þar gild rök.

Quatar hélt heimsmeistarakeppnina í knattspyrnu 2022, en Bandaríkin höfðu sóst eftir að fá að halda keppnina þá, en töpuðu í atkvæðagreiðslu við Katar og sagt að formaður bandarísku nefnarinnar hjá FIFA í umrætt sinn, Bill Clinton hafi verið mjög brugðið að sjá smáríkið Quatar kaupa fylgi meirihluta fulltrúa, þannig að jafnvel Bandaríkin þurftu að láta í minnipokann. Í reiði sinni á hann að hafa grýtt forláta kristalvasa í vegg á hótelherbergi sínu eftir þetta.

Það væri fráleitt fyrir hvort heldur Trump eða stjórnendur annarra lýðræðisríkja að gera Quatar að pólitískum rekkjunaut. Það væri eins og engilsaxar segja "utmost stupidity." 

En svo verður að sjá hverju fram vindur. Því miður virðast stjórnmálamenn á Vesturlöndum lítt vandir að virðingu sinni þegar asni klyfjaður gulls er fyrir framan borgarhliðið. Hið siðferðilega viðmið hefur gefið eftir í réttu hlutfalli við afkristnun Vesturlanda.