Jón Magnússon

27.7.2007 | 21:37

Drottins dýrðar kvótakerfi?

Í setningarræðu á ráðstefnu í Þjóðminjasafninu í gær um lækkun skatta sagði forsætisráðherra eftirfarandi: Við höfum komið á kvótakerfi í fiskveiðum sem hefur haft mikla þýðingu til að koma á umbótum í sjávarútvegi og auka stöðugleika í efnahagslífinu.

Þetta var einkuninn sem forsætisráðherra gaf kvótakerfinu. Hann sagði erlendu gestunum sem voru fyrirlesarar á ráðstefnunni ekki frá því að,

Kvótakerfið hefur valdið því að sjávarútvegurinn er skuldsettari en nokkru sinni fyrr og fjölmörg fyrirtæki í sjávarútvegi mundu verða gjaldþrota ef þau hefðu ekki lánstraust vegna kvóta.

Kvótakerfið hefur valdið því að miklir fjármunir hafa farið út úr greininni og valdið því að gamalgróin fyrirtæki í sjávarútvegi berjast nú í bökkum sbr. fyrirtæki Alla ríka á Eskifirði.

Kvótakerfið hefur valdið því að ekki má lengur veiða nema lítin hluta þess afla sem veiddur var áður en kvótakerfinu var komið á.

Kvótakerfið hefur gert ákveðinn hóp sjómanna að ánauðugum leiguliðum ef þeir vilja stunda vinnu sína.

Kvótakerfið veldur misskiptingu í þjóðfélaginu þar sem ríkið hefur úthlutað sumum milljörðum en skattrænt hina.

Kvótakerfið veldur því að misskipting eykst meir en nokkru sinni fyrr í þjóðfélaginu

Kvótakerfið hefur eyðilagt uppbyggingarstarf margra kynslóða.

Kvótakerfið hefur rústað atvinnulífi í sjávarbyggðum í öllum landshlutum

Lengra mætti halda í upptalningu. En er þetta ekki nóg. Með hvaða rétti getur forsætisráðherra lofað kvótakerfið? Það hefur ekki þjónað tilgangi sínum það er andstætt markaðshyggju og kemur í veg fyrir að einkaframtakið fái að njóta sín í sjávarútvegi. Kerfi sem meinar Stjána bláa að setja öngul í sjó og selja aflann þegar hann kemur að landi nema hann eigi kvóta er ekki bara vont kerfi þó annað kæmi ekki til það er afleitt kerfi.

Forsætisráðherra hefði átt að segja prófessorum frjálshyggjunar sem töluðu á ráðstefnunni að kvótakerfið væri afsprengi ríkishyggju og stjónrvaldsaðgerða þar sem stjórnvöld treystu ekki að frjálslynd hugmyndafræði gæti leyst vandamál takmarkaðra gæða. Þeir hefðu þá fengið réttar upplýsingar um kerfið.

Flokkur: Stjórnmál og samfélag | Facebook

Athugasemdir

Það er ljótt að ljúga að fólki Jón.Ég hef ekki heyrt þig segja að ekki eigi að gefa út heildarkvóta í afla.Meðan gefinn er út heildarkvóti eru menn með kvótakerfi.Síðan geta menn haft hinar ýmsu skoðanir á því hernig útdeila eigi kvótanum.Þótt þú forðist að tala skýrt um hvað þú vilt gera,þá hefur mér skilist að þú viljir að Ríkið taki aflaheimildirnar eignanámi en verði áfram með heildarkvóta, og það verði boðnir upp dagar þar sem menn megi veiða fjálst þar til heildar kvótanum er náð og þá skuli skipin bundin við bryggju.Á þessum dögum munu menn að sjálfsögðu bara veiða þorsk þar sem hann er verðmætastur þar til heildarþórskvótanum er náð.Þú talar um að sjómenn séu ánauðugir leiguliðar.Þetta er ekkert annað en aumt lýðskrum hjá þér.Sjómaður sem kaupir sér skip er þar með orðinn útgerðarmaður.Ef ríkið hirðir aflaheimildirnar og hinn venjulegi sjómaður þarf að fara að taka þátt í kostnaði útgerðar vegna kvótakaupa, en það er bannað í dag þá eru sjómenn orðnir þrælar efnaðra lögmanna sem sitja á þingi og þiggja laun af Ríkinu.En ég skora á þig að leggja fram frumvarp á Alþingi um að leiga aflaheimilda verði bönnuð, en ég reikna ekki með því að þú gerir það þar sem þú værir þá kominn í vandræði með að koma því í verk að ríkisaðallinn í R.vík. gæti hirt megnið af launum sjómanna með því að allar veiðiheimildir færu til ríkisins á uppboði.Það myndi að sjálfsögðu líka þýða það að landsbyggðin legðist í auðn.Það fer þér illa að tala um að þú sért á móti aukinni skattheimtu.Það er kannski rétt að benda þér líka á að íslendingar voru með dagakerfi í ýmsum tilbrigðum í 30 ár, en gáfust upp á því.

Sigurgeir Jónsson, 27.7.2007 kl. 23:02

Sammála þér Jón, baráttukveðjur frá eyjum.

Georg Eiður Arnarson, 27.7.2007 kl. 23:10

Sæll Jón.

Já hugsa sér , enn bera menn sem sagt´" sól í húfum í bæinn " einkum og sér í lagi þegar erlenda gesti ber að garði.

Ótrúlegt.

kv.gmaria.

Guðrún María Óskarsdóttir., 27.7.2007 kl. 23:50

Sammála þér Jón

Þeir sem sjá eitthvað jákvætt við kvótakerfið eiga annaðhvort ríkra hagsmuna að gæta þ.e. eru stórkvóta eigendur eða eru veruleika firrtir.

Róbert Tómasson, 28.7.2007 kl. 05:47

Útgerðarmaðurinn Georg Eiður Arnarson er sammála Jóni Magnússyni Hæstaréttarlögmanni í Reykjavík að sjómenn séu ánauðugir leiguliðar.Þetta á þá væntanlega við þá sjómenn sem starfa hjá ísfélaginu, Vinnslustöðinni og fleiri fyrirtækjum í Vestmannaeyjum.Eins og ég bendi á í fyrri athugasemd minni þá er bannað að sjómenn taki þátt í kvótakaupum. Því er ekki hægt að lýta á málflutning þeirra félaga Jóns og Georgs öðruvísi en sem hvern annann rógburðEf hins vegar þeim félögum tækist ætlunar verk sitt um að Ríkið hirti allar aflaheimldir til þess að geta borgað Jóni hærra kaup,þá yrði afleiðingin af því sú að sjómenn þyrftu að fara að taka þátt í kvótakaupum og yrðu á lægra kaupi sem er þó ekki beysið fyrir.

Sigurgeir Jónsson, 28.7.2007 kl. 08:23

Geir Haarde virðist ekki taka neinum rökum - Hann er sem sagt algerlega rökheldur og virðist trúa á kerfið þó svo allar hagtölur æpi á að kerfið sé til tjóns.

Sigurjón Þórðarson, 28.7.2007 kl. 12:57

Ég leyfi mér að trúa því að lög um fiskveiðar kveði á um það að úthlutun aflaheimilda myndi ekki eignarrétt.

Ef staðreyndin er þessi þá þarf að endurskoða margt í framkvæmd þessara mála.

Sigurgeir: Af hverju gáfumst við upp á dagakerfinu? Voru það verndarsjónarmið? Það vantar mikið til að ég fáist til að trúa því að einhver önnur sjónarmið en verndun nytjastofnanna eigi að vera ríkari í þessari umræðu og þeim ákvörðunum sem stjórnvöld taka.

Og í stuttu máli á ég afar bágt með að skilja þá útgerðarmenn sem eru sáttir við ástand - og þó ekki síður þróun fiskveiða og útgerðar á Íslandi í dag. Óskiljanlegt með öllu að stjórnmálamenn okkar leyfi sér að storka þjóðinni með því að bera lof á árangur í þeim efnum.

Mín skoðun er jafnframt sú að takmörkun á notkun trollsins og helst algert bann sé fyrsta leiðin til að efla lífríkið í hafinu og svo auðvitað bann við loðnuveiðum.

Þeir sem eru svo á móti dagakerfinu hljóta að eiga einhverra hagsmuna að gæta og ég er á móti því að einkahagsmunir og spákaupmennska megi hafa forgang í þessu brýna hagsmunamáli allrar þjóðarinnar.

Árni Gunnarsson, 28.7.2007 kl. 13:29

Árni. Menn gáfust upp á skrapdagakerfinu vegna þess að menn máttu ekki veiða þorsk á ákveðnum dögum. Annað hvort þurftu menn að henda þorskinum ef hann bjálfaðist í veiðarfærið þegar þorskveiðibannið var eða liggja í landi.Að lokum gáfust menn upp á dagakerfinu þegar dagarnir voru komnir niður í 18.Menn þurftu þá að liggja í landi 347 daga á ári.Síðasti báturinn var á dögum 2006.íslenska dagakerfið hafði þá verið að hluta til við lýði í um 30 ár,að skrap dagakerfinu meðtöldu.Þú segir að þeir sem eru á móti dagakerfi, hljóti að eiga hagsmuna að gæta.Það er ekki hægt að reka neitt skip með því að láta það liggja í landi 347 daga á ári.Öll íslenska þjóðin hefur hagsmuna að gæta í því að íslenskur sjávarútvegur sé rekin á sem hagkvæmastan hátt.Líka þei sem komnir eru á eftirlaunaaldur.

Sigurgeir Jónsson, 28.7.2007 kl. 20:16

Það er greinilegt að ríkisafskipti í formi kvótakerfis hefur ekki gagnast nema fáum. Hvorki hinar dreifðu byggðir né þorskurinn sjálfur nýtur þessa kerfis. Því er það ekkert til að monta sig yfir. Ef til vill hefur flokkur einstaklingsframtaksins ekkert annað til að slá um sig þessa dagana annað en aukna ríkishyggju.

Gunnar Skúli Ármannsson, 29.7.2007 kl. 01:33