Vandræðagangur ríkisstjórnarinnar vegna ratsjárstöðva.

Forsætisráðherra og formaður Sjálfstæðisflokksins tók heldur betur aðra afstöðu en Bjarni Benediktsson varðandi rekstur ratsjárstöðva í meintu varnarskyni. Forsætisráðherra telur rétt að við eyðum einum milljarði í rekstur ratstjárstöðvana á þessu ári og næsta án þess að þörfin hafi verið skilgreind. Í frétt Morgunblaðsins nú segir hann að ekki sé útséð um hvernig rekstri ratsjárstöðva hersins verði hagað eftir að Ísland tekur þann rekstur yfir þ.16. ágúst þ.e. ekki á morgun heldur hinn. Lítil fyrirhyggja það og ámælisverður skortur á stefnumótun og afgreiðsllu máls.

William T. Hobbins yfirmaður flughers Bandaríkjanna í Evrópu segir mikilvægt að Bandaríkjamenn geti verið með æfingar hér en ræða eigi mál varðandi varnir Íslands á næstunni. Því er semsagt ekki lokið enn.

Enn vantar svör við þeim spurningum hvaða tilgangi ratsjárstöðvarnar þjóna? Þjóna þær einhverjum tilgangi á ófriðartímum? Þjóna þær tilgangi á friðartímum. Engin viðhlítandi svör hafa fengist við þeim spurningum eða eins og formaður utanríkismálanefndar sagði. "Það er mörgum spurningum ósvarað"

Það skiptir máli hvernig farið er með peninga skattgreiðenda jafnvel þó að ríkissjóður sé rekinn með góðri afkomu vegna þenslu í þjóðfélaginu. Það má gera ýmislegt fyrir einn milljarð króna og sennilega flest skynsamlegra en reka það sem er að öllum líkindum tilgagnslausar ratsjárstöðvar.

Vandræðagangur Geirs Haarde og Ingibjargar Sólrúnar Gísladóttur í þessu máli er ófyrirgefanlegur.

En meðal annarra orða er einhver ógn sem að Íslandi stafar úr lofti? Ekkert ríki í okkar heimshluta ógnar okkur og ekki verður séð að breyting verði á því í fyrirsjáanlegri framtíð. Hvaða brýna þörf er þá á loftvörnum. Er ekki mun brýnni þörf á að efla varnarviðbúnað og stuðla að öryggi borgaranna með öðrum og markvissari hætti. T.d. ná stjórn á miðborg Reykjavíkur um helgar.  

„Íslensk stjórnvöld þurfa að ákveða framtíð ratsjárstöðva“

Athugasemdir

[Guðmundur Gunnarsson, 14.8.2007 kl. 14:40]

Hvað gerir Ratsjárstofnun?Ratsjárstofnun rekur 4 ratsjárstöðvar hér á landi, eina á hverju landshorni. Starfsemin byggist á að mestu að staðsetja allt flug í okkar heimshluta og senda þennan ratsjárgeisla til flugstjórnarkerfa og varnarkerfis bandaríkjamanna. Ratsjárstofnun nær öllum flugvélum sem fara um okkar heimshluta, bæði skráðar vélar og óskráðar vélar. Fyrstu áratugina tvo störfuðu 32 tæknimenn auk 4 – 6 á skrifstofu. En smá saman voru ráðnir fleiri á skrifstofu stofnunarinnar og voru þeir orðnir á fleiri en tæknimennirinir í árslok 2004. Í dag starfa þar 12 tæknimenn en starfsmenn í heild eru um 50. Bandaríkjamönnum ofbauð hver rekstrarkostnaðurinn var orðin í árslok 2004 og kröfðust þess að skorið væri niður. Þeir bentu á að í stofnuninni væri hver silkihúfan upp af annarri, og fáir skildu hvað þeir vær að gera. Einnig var búið að ráða umsjónarmenn í stöðvarnar og þeim skipað að vera utan stéttarfélaga, einnig var búið að ráða stöðvarstjóra. Engin sem til þekkti var undrandi á því að bandaríkjamönnum blöskraði þessi rekstur. Hagræðingartillaga skrifstofufólksins árið 2004 var; “Segjum upp helming tæknimannanna” og það var gert.  Þetta setti rekstraröryggið mikið niður, m.a. vegna þess að stöð getur legið niðri þann tíma sem það tekur að koma tæknimönnum frá Keflavík vestur í Bolungarvík og upp á Bolafjall. Austur í Bakkafjörð og upp á Gunnólfsvíkurfjall eða austur í Hornafjörð. Starfsemi Ratsjárstofnunar leiðir til þess að íslendingar geta tekið að sér flugumsjón á mjög stóru svæði í okkar heimshluta og við höfum umtalsverðar tekjur af þessu og skapar mörg verðmæt störf flugumferðarstjóra. Kanadamenn og Skotar hafa ítrekað sóst eftir að ná þessu til sín.  Ef ratsjárupplýsingar eru ófullnægjandi þarf að lengja öryggisbil milli flugvéla mjög mikið bæði fram- og afturfyrir fyrir og upp og niður fyrir. Ef það verður gert komast mun færri flugvélar eftir þeim flugleiðum sem við stjórnum og mun hafa mikla og óásættanlegar afleiðingar að mati flugfélaganna, sem munu þá krefjast þess að flugumferðarstjórnin verði flutt til annarra.

 

[Haukur Nikulásson, 14.8.2007 kl. 18:40]

Ég er einn þeirra sem tel að við eigum að losa okkur út úr öllu hernaðarbrölti vegna þess að það er engin raunveruleg ógn sem steðjar að þessu landi. Hún var aldrei raunveruleg í kalda stríðinu, en munurinn var sá að þá héldum við að ógnin væri raunveruleg. Núna vitum við að rússar höfðu aldrei raunverulega getu til að gera neitt vegna fátæktar. Ég vil líka hætta í NATO og hætta þar með að skipta okkur af innanríkismálum þjóða sem við vitum ekkert um. Ég fæ hreinlega bjánahroll af því að hlýða á Sollu úttala sig um sérfræðiþekkingu sína á vandamálunum fyrir botni miðjarðarhafs með því einu að skreppa þangað sem utanríkisráðherra. Hún ætlar sér síðan að sjá um málamiðlun á svæðinu. Er henni sjálfrátt í þessu ofmati á sjálfri sér!

Jón, ég mun örugglega hvetja þig til að taka þessi mál upp í þinginu og ýmis fleiri sem eru hreint bull í útgjöldum ríkisins. Það er orðið tímabært að núllstilla útgjöld ríkissjóðs, en það þýðir að rökstyðja þurfi öll útgjöld ríkisins upp á nýtt. Hefðin verði afnumin í þessu. Öðruvísi breytist ekkert.

Guðmundur kemur með athyglisverða punkta hvernig ratsjárnar geta haft áhrif á flugstjórnarsvæðið okkar og það þarf að meta hvernig þetta getur farið saman. Það má líka skoða hvort það er okkur þjóðhagslega hagkvæmt að halda úti flugstjórnareftirlitinu til langframa eða hvort það sé bara spurning um þjóðarstoltið.

[Jón Magnússon, 15.8.2007 kl. 08:32]

Sammála þér Haukur um það að það er engin raunveruleg ógn sem steðjar að landinu. Ég er hins vegar ekki sammála þér að Rússar hafi aldrei getað neitt. Gríðarleg uppbygging Norður Atlantshafsflotans á Bresnéf tímabilinu sýndi að það var mikill máttur til staðar þó að innviðir Sovéska samfélagsins hafi verið fúnir og að hruni komnir. En ógnin var til staðar á þeim tíma. Ég vil ekki hætta í NATO en tel að þar séu menn komnir út fyrir hlutverk sitt og tilgang og vil að íslensk stjórnvöld komi bandalaginu aftur inn á réttar brautir að vera varnarbandalag.  Í lokin Haukur ég vænti þess að hitta þig galvaskan eigi síðar en í byrjun næsta mánaðar.