Frelsi, umburðarlyndi og virðing.

Á fjölmennum fundi sem Landssamband kvenna í Frjálslynda flokknum hélt á föstudagskvöldið flutti ég ræðu um efnið: Stefnumótun og framtíð Frjálslynda flokksins. Í ræðunni vék ég að því að nauðsynlegt væri fyrir Frjálslynda flokkinn að marka sér stöðu sem frjálslyndur flokkur á grundvelli þeirra sjónarmiða og skoðana sem einkenndu meginhugsjónir og grundvöll frjálslynds fólks og frjálslyndra flokka.

Í því sambandi benti ég á þá áherslu sem frjálslynt fólk legði jafnan á einstaklinginn frelsi hans og möguleika til að fá að lifa lífi sínu með sem minnstum afskiptum opinberra aðila, reglna boða og banna. Jafnframt vék ég líka að því inntaki í frjálslyndum viðhorfum sem fælist í umburðarlyndi fyrir skoðunum og viðhorfum annarra jafnvel þó að okkur þyki þau röng og vék að þeirri spurningu sem er og verður einna mikilvægust í umræðu frjálslynds fólks um afskipti ríkisvaldsins, spurningin um hvað eiga stjórnvöld að hafa mikil afskipti af borgurunum og hvað mikil afskipti stjórnvalda af einstaklingnum eru réttlætanleg. Í þriðja lagi vék ég að því að virðing fyrir öðrum einstaklingum væri einnig mikilvægt inntak í frjálslyndum viðhorfum.

Þessi þrjú atriði sem nefnd eru hér að ofan ásamt því að Frjálslyndi flokkurinn reki þjóðlega stefnu með áherslu á íslensk lífsgildi, tungu og menningu verður Frjálslyndur flokkur að hafa að leiðarljósi í allri stefnumótun sinni.

Sem betur fer er mikill kraftur í flokksstarfinu. Landssamband kvenna í Frjálslynda flokknum hélt glæsilegan fjölmennan fund á föstudaginn og á þeirra vegum var fjölmenni í skoðunarferð um Alþingishúsið og síðan í Hellisheiðarvirkjun. Þá eru félögin í Reykjavík mjög virk og boða bæði til funda um stofnun starfshópa og stefnumótun á mánudaginn kemur. Félag Frjálslyndra í Suðvesturkjördæmi hefur margt í undirbúningi og það verður gaman að taka þátt í starfinu með þeim á næstunni. Ungt fólk í Frjálslynda flokknum hefur einnig látið til sín taka í auknum mæli. Þeir sem að þessum félögum standa eiga heiður skilinn fyrir mikið og þrotlaust starf. Forsenda þess að við náum þeim árangri sem við stefnum að í næstu kosningum er að við bjóðum upp á skýra stefnumörkun og byggjum flokkinn upp félagslega.  Sem betur fer hefur það gengið svo vel að það er ástæða til að vera bjartýnn á framhaldið.

Athugasemdir

[Guðrún María Óskarsdóttir., 11.11.2007 kl. 23:44]

Sæll Jón og takk fyrir síðast.

Það er mjög gott og hollt að velta upp grundvallarspurningum reglulega í þessu efni, varðandi hin frjálslyndu viðhorf.

Sjaldan hefi ég upplifað skemmtilegri tíma en  einmitt núna í uppbyggingu flokksstarfs í mínum flokki og tek undir bjartsýni á framhaldið.

kv.gmaria.

[margret Jónsdóttir (IP-tala skráð) 12.11.2007 kl. 16:04]

Málefni flokksins eru góð, ég tek undir það.

Ég fatta ekki þetta Landssamband kvenna, þetta er þriðja skifti sem ég mæti á svona samkomu og það er alltaf fyllt upp með körlum. Landssamband kvenna í Frjálslynda flokknum virðist ekki geta farið neitt án karlmanna, eru þetta kannski klæðskiptingar?

Þurfa konur í frjálslynda flokknum alltaf að drekka þegar þær hittast ?

Sumar kunna sér greinilega ekki hóf ekki.

Ég hef gert heiðarlega tilraun og  mætt á þessar Landssambandssamkomur en núna kem ég ekki þangað meira. Þetta er ekki félagsskapur sem ég get hugsað mér að vera í, því miður því mig hefði langað til að starfa i kvennfelagi með venjulegum konum, að góðum málefnum. 

[Jóhanna Magnúsar- og Völudóttir , 12.11.2007 kl. 19:41]

Frábær gildi Jón, umburðalyndi, virðing og frelsi -  og benti ég á þessa grein þína hjá Guðsteini Hauki sem var að taka þá ákvörðun að ganga í flokkinn.

Hvað er að heyra með Landssambandið, er þetta einhver djammklúbbur þar sem karlarnir geta ekki haldið sig í burtu ?  ,,Girls just wanna have fun" ..fílingur ? Stelpur..upp úr djamminu og djúsinu!

Í alvöru talað þá hlýtur þetta að vera þörf áminning frá Margréti Jónsdóttur, ef hún upplifir þetta svona.