Slökkt á friðarljósi.

Það var gott að Yoko Ono skyldi ákveða að tendra friðarljós í Viðey til minningar um John Lennon. Friðarljósið er ágætt og táknrænt og lífgar upp á tilveruna en veldur engu tjóni.  Mér finnst satt að segja miður að það skuli slökkt á ljósinu núna og það ekki tendrað fyrr en í haust. Mér fyndist rétt að breyta þessu þannig að það væri slökkt á ljósinu þann dag sem John Lennon var myrtur en að öðru leyti mundi það loga. Þá væri það ennþá táknrænna þ.e. við þurfum alltaf að muna eftir að friður er ekki sjálfsagður og það að slökkva á ljósinu óhamingjudaginn þegar geðveiki ógæfumaðurinn myrti John Lennon er táknrænt fyrir það að jafnvel þeir sem gera engum neitt og boða frið og kærleika eru ekki óhultir.

Það þurfa allir að vera á verði og mér finnst friðarljósið einmitt gott tákn um mikilvægi þess að berjast fyrir friði og þess að vera samt á verði.

Athugasemdir

[Sigurður Þórðarson, 9.12.2007 kl. 21:02]

Sammála Friðarljósið er gott mál. Mig dreymdi að kveikt yrði á ljósinu á vetrarsólstöðum og látið loga fram að áramótum.  Það hefði verið eins og í Skírnismálum  hin fyrstu jól en það tók ljósið og myrkrið 9 dagar og 9 nætur að semja frið í heitum atlotum undir ástarfeldi. 

[Brjánn Guðjónsson, 10.12.2007 kl. 00:48]

Hefur ekki einmitt náðst samkomulag við Yoko Ono um akkúrat þetta? Mér heyrðist það einhversstaðar. Kveikt aftur á vetrarsólstöðum og slökkt um áramót.

[Sigurður Þórðarson, 10.12.2007 kl. 01:20]

Þú segir mér fréttir Brjánn. Ég hringdi í Hilmar Örn Hilmarssonar sem þekkir til Yoko Ono og honum leist svo vel á hugmyndina að hann ætlaði að hafa strax samband við hana. Eða hvenær ætti að vera kveikt á friðarsúlu ef ekki yfir þann tíma þegar sátt náðist milli myrkurs og kulda (Gerðar Gymnisdóttur jötunmær) og ljóssins (Freys Njarðarsonar, Ás frjósemi jarðar og sólguðs) ?  En brúðkaup þeirra markaði sátt Jötna og Ása og fór sól hækkandi upp frá því, en Æsir höfðu haft þungar áhyggjur af skammdeginu um nokkra hrið. Ég hef fulla trú á að þessi saga endurtaki sig innan skamms.

[Georg Eiður Arnarson, 10.12.2007 kl. 07:30]

Sammála þessu Jón. kv.

[Baldvin Nielsen (IP-tala skráð) 10.12.2007 kl. 08:14]

Er friðarljósið í Viðey hluti af spádómum um Ísland? 

,,Um leiðarvísa Pýramídans mikla farast Rutherford svo orð: 

Eins og vér höfum sýnt fram á, myndar Reykjavíkurgeislinn vesturjaðarinn á Íslandsrákinni, og er hann sérstaklega þýðingarmikill sökum hinna mikilvægu andlegu tákna, sem við hann eru tengd. Einmitt í Pýramídanum mikla sjálfum gengur Reykjavíkurgeislinn beinlínis undir sæti toppsteinsins - en toppsteinninn sjálfur er fullkominn pýramídi að lögun og táknar Krist upprisinn og er hátt upphafinn sem stór táknsamlegur ,,höfuðsteinn". Alveg eins og Betlehemsgeislinn benti til þess, hvar Messías myndi koma í heiminn sem ungbarn, í fyrri tilkomu sinni, eins er um Reykjavíkurgeislann, að með því að ganga undir hinn háreista toppstein, vísar hann oss á, hvar fyrst eigi upp að renna - undir forystu Krists hins upprisna - hin nýja guðsríkis öld, þar sem að lokum verður vilji guðs ,,svo á jörðu sem á himni". Reykjavíkurgeislinn vísar oss á staðinn, þar sem enginn er herbúnaðurinn, þar sem sértrúarandinn er í raun og veru ekki til og þar sem kristilegt frelsi hefur yfirráðin. Reykjavík! Hversu háleitur heiður hlotnast þér! Reykjavík er þannig einstök borg - borg, sem kjörin er af guði í andlegum tilgangi.''

Þetta má lesa og meira á vefslóð http://www.sigurfreyr.com/island.html

Baldvin Nielsen, Reykjanesbæ

[Högni (IP-tala skráð) 10.12.2007 kl. 09:52]

Jón, ert þú ekki að verða of seinn á fund hjá Ku Klux Klan?

[Guðbjörg Elín Heiðarsdóttir, 10.12.2007 kl. 09:56]

Jón Magnússon,ég er svo hjartanlega sammála hverju orði sem þú segir um friðarsúluna.Ég bý í nánd við höfuðborgina og naut þess á hverju kvöldi að horfa á súluna frá hlaðinu heiman frá mér svo ég tali nú ekki um norðurljósin sem sáust smá núna í haust og dönsuðu um himinninn í nálægð við friðarljósið. Friðarsúlan iljar örugglega mörgum um hjartaræturnar.

[Sigurður Þórðarson, 10.12.2007 kl. 09:59]

Þið megið vænta frétta jafnvel í dag hvort tekst að koma þessu í kring.

[Kolbrún Stefánsdóttir, 10.12.2007 kl. 19:07]

Sæll Jón. Satt best að segja þá leiðist mér þetta "vasaljós" eins og einhver kallaði það hér á bloggi. En ef Kristur er að koma aftur þá er um að gera að láta ljósið vísa honum veginn til þeirra sem búa í náttmyrkranna landi. Hann er auðvita velkominn eins og allri aðrir :) Gaman að þessu Baldvin. En er það kristilegt frelsi þegar ríkið rekur þjóðkirkju og mismunar öðrum söfnuðum? Nei varla. Ef þetta er einhverjum áminning um að friður er ekki sjálfgefinn í heiminum þá má þessi geisli vera fyrir mér. Mér finnst samt nóg að það sé frá fæðingardegi að dauðastund þessa fræga lífsnautnamanns. Peace to the World.  kveðja Kolla.

[Sigurður Þórðarson, 23.12.2007 kl. 11:55]

Þessi færsla þín varð til að kveikt var á friðarljósinu!

Hilmar hringdi í Árna Pál, sem talaði við Yoko  Ono sem talaði við Svanhildi Konráðsdóttur. Segiði svo að það sé gagnslaust að blogga.