Hvað gerist í vikunni?

Það eru vafalaust margir spenntir fyrir því að sjá hvað gerist á morgun varðandi hlutabréfavísitöluna og gengi krónunnar.  Þá verður fróðlegt að sjá hvort að Seðlabankinn og ríkisstjórnin ætli að láta reka á reiðanum eins og gert hefur verið svo lengi í efnahagsmálum.  Forsætisráðherra sá ekki ástæðu til þess í síðustu viku að ríkisstjórnin gerði neitt í málinu.  En það sjá það flestir aðrir að brýna nauðsyn ber til að farið verði vandlega yfir það með hæfustu sérfræðingum okkar í hagstjórn hvernig á að bregðast við og það sem fyrst til að freista þess að komast hjá efnahagshruni.

Það er ljóst að íslenska flotkrónan gengur ekki. Henni fylgir allt of mikill óstöðugleiki.  Sagt var að helsti kosturinn við að vera með sjálfstæðan gjaldmiðil væri að þá hefðum við betri stjórn á efnahagsmálunum. Er það kostur eða er það galli. Eins og nú horfir þá verður ekki annað séð en efnahagsstjórnin hafi verið vægast sagt misheppnuð. Meiri sveiflur eru hjá okkur en hjá nokkurri annarri þjóð í Evrópu.  Erlend skuldasöfnun hefur verið meiri en hjá nokkurri annarri þjóð í Evrópu. Þá hefur ríkisbáknið þanist út meir hjá okkur í stjórnartíð Sjálfstæðisflokksins en í nokkru öðru landi í Evrópu.

Ber þetta vott um góða efnahagsstjórn? Ber þetta vott um góða ríkisstjórn?

Þegar við Frjálslynd mótuðum þá stefnu að gjaldmiðillinn yrði ekki látinn fljóta heldur að hann yrði bundinn við gengiskörfu helstu viðskiptalanda okkar með ákveðnum vikmörkum, þá var það til að skapa stöðugleika í þjóðfélaginu og til þess að losna við verðtryggingu lána. Nú liggur fyrir að það hefði verið skynsamlegt að fara að okkar tillögum í staðinn fyrir að ana beint á foræðið eins og ríkisstjórnin hefur gert.

Athugasemdir

[B.N. (IP-tala skráð) 24.3.2008 kl. 18:24]

ruv.is frettir

Fyrst birt: 23.03.2008 19:05Síðast uppfært: 23.03.2008 20:17,Mikill órói í fjármálaheiminum''

,,Mikill órói er í fjármálaheiminum nú um helgina og margir búast við stórtíðindum á þriðjudaginn. Bankasamruni, skyndivaxtahækkun og afskráning hlutafélaga eru á meðal þess sem helst gæti borið til tíðinda.

Margar sögusagnir ganga nú fjöllunum hærra í fjármálalífinu. Mörgum þykir skyndivaxtahækkun líklegur kostur, aðrir telja sennilegt að tilkynnt verði um stóran bankasamruna á þriðjudaginn annað hvort sameinist Landsbankinn og Glitnir eða Landsbankinn og Straumur

Íslenski fjármálaheimurinn er enn á milli tanna erlendra fjölmiðla nú um helgina. Í breska dagblaðinu Sunday Telegraph segir í dag, að íslenska ríkisstjórnin rói nú lífróður til að hindra algjört hrun íslenska efnahagslífsins. Haft er eftir verðbréfamiðlara að litið sé á Ísland sem eitraðan vogunarsjóð sem enginn vilji koma nálægt.''

Þetta er byrjun á frétt hér fyrir ofan og lesa má meira hjá ruv.is  

Það eru allir flokkar á alþingi sem eru ábyrgir hvernig er komið hér á landi í efnahagsmálum þjóðarinar. Stjórnarandstæðan talaði oft um það á alþingi allan síðasta áratugin eða svo hvað  margir hefðu mist af góðærinu sem stjórnarliðar sögðu þá marg oft á sama tíma að allir nytu.

Nú árar vel fyrir frjálslynda. Erlendu gestirnir á leið úr landi eftir að laun þeirra lækkuðu um góð 40% síðustu sex mánuðina sé miðað við evru. Það gefur nóg svigrúm til að leita uppi nýja gesti því ekki þýðir að ráða islenska alþýðu í frystihúsin eins og atvinnurekendur hafalátið í ljós á síðustu árum. Vera er þó að íslenska alþýðan sem dæmd er af leti og flottræfilshátt og vil ekki koma náglægt fiski er á leið úr landi til að vinna við fiskslogið allt um kring. Er þetta ekki furðulegt? Ég var að fá fréttir frá Danmörku í dag þar sem ósköp vanaleg manneskja sem hvorki er rasisti né samlandahatari væri með sem launþegi í rækjuvinnslu 1980 íslenskar krónur á tíman í dagvinnu miðað við gengið í dag. Þetta gerir miðað við íslenska staðalinn, 173 klukkustundir á mánuði sem er dagvinnan 342.540,-íslenskar. Það myndi margur íslenskur hoppa hæð sína fyrir þessi laun jafnvel þó lyktin að inneflagorri fyllti öll vit. 

Baldvin Nielsen ,Reykjanesbæ 

[Jón Magnússon, 24.3.2008 kl. 18:54]

Þakka þér fyrir Baldvin en Frjálslyndi flokkurinn ber ekki ábyrgð á því hvernig efnahagsstjórnin hefur verið.  Við vöruðum við flotkrónunni í kosningabaráttunni og ég hef ítrekað bent á hættuna af hágengisstefnu, viðskiptahalla, skuldasöfnun erlendis þ.m.t. jöklabréfin. Það kemur alltaf að skuldadögunum.  Þetta er gott dæmi sem þú tekur frá Danmörku. Það hefur aldrei verið vandamál að fá Íslendinga til að vinna fyrir góð laun.

[Hannes (IP-tala skráð) 24.3.2008 kl. 19:59]

Sæll Jón

Ég er hrifinn af þér og þínum stefnumálum, sérstaklega stuðningur þinn við inngöngu í ESB og upptaka evru.
Annað sem mig langar að spyrja er, hver stefna Frjálslyndra sé gagnvart inngöngu okkar í ESB/EMU?
Því að formaður ungra Frjálslyndra fer þessa daganna mikinn á spjallsvæðum víðsvegar og drullar þar yfir alla því sem nefna aðild á nafn og kallar þá föðurlandssvikarar og landráðamenn.

Ert þú eyland í þínum flokki eða ekki?

[Halla Rut , 24.3.2008 kl. 21:53]

Ég man nú ekki eftir því að Jón hefði stutt inngöngu í ESB heldur sagði hann eingöngu að hann væri tilbúin að ræða málin og sjá hvernig samning við fengjum.

[Jón Magnússon, 25.3.2008 kl. 00:30]

Segir ekki einhversstaðar "Enginn er eyland" Ég hef viljað kanna hvaða kostir eru varðandi aðild en hef jafnan sagt að ég geti ekki sagt hvort ég mundi styðja aðild eða ekki. Þar yrði að meta kalt skammtíma en þó miklu fremur langtíma hagsmuni þjóðarinnar.  Þjóðina er alltaf að gæla við aðilid að Evrópusambandinu með einum eða öðrum hætti og búið er að gera mörg sérfræðiálit sem flest hver eru ekki túskildings virði af því að það er aldrei kannað til hlítar hvað er í boði. Þú veist ekki til hvers konar samningi er hægt að ná  þegar þú sest að samningaborðinu. Þú veist það þegar þú stenur upp.

[Hannes (IP-tala skráð) 25.3.2008 kl. 19:19]

En ert þú Halla, tílbúin að ræða málin og sjá hvaða samninga við fáum?