Get ekki boðið Ólaf F. Magnússon velkominn í Frjálslynda flokkinn.

Það kom mér á óvart að heyra það haft eftir Ólafi F. Magnússyni borgarfulltrúa að meðan ég var í fundarferð á landsbyggðinni hafi hann setið á hljóðskrafi með formanni Frjálslynda flokksins til að véla um það að hann mundi leiða lista Frjálslynda flokksins við næstu borgarstjórnarkosningar í Reykjavík og formaðurinn hafi lagt að honum að ganga í Frjálslynda flokkinn.

Nú verður Guðjón Arnar Kristjánsson að gera afdráttarlaust grein fyrir því hvort að Ólafur F. Magnússon sé að segja satt eða ekki.

Óneitanlega er það merkilegt að Ólafur F. Magnússon skuli hafa sagt sig úr Frjálslynda flokknum fyrir síðustu kosningar án þess að gera nokkra grein fyrir því á hvaða forsendum. Þá er jafnframt merkilegt að hann skuli allan þann tíma sem hann var borgarstjóri hafa talað sem félagi í Íslandshreyfingunni. Ólafur F. verður að gera grein fyrir því af hverju hann á nú allt í einu samleið með Frjálslynda flokknum, þegar hann er búinn að missa stöðu sína, en átti það ekki áður.

Þá er eðlilegt að Ólafur F og þeir úr Frjálslynda flokknum sem Ólafur F. segir að hafi komið að máli við sig um að ganga í Frjálslynda flokkinn og gegna þar forustuhlutverki geri grein fyrir því af hverju ekki var talað við kjördæmafélögin í Reykjavík eða borgarmálafélagið um málið. Af sjálfu leiðir að þar var vettvangurinn til að tala um málið en ekki á flugvellinum á Ísafirði.

Hafi ég tekið rétt eftir sagði flokkssystir Ólafs F í Íslandshreyfingunni og varamaður hans í borgarstjórn, Margrét Sverrisdóttir,  að Ólafur væri að leita sér að fjárhagslegum vettvangi til að kosta framboð sitt við næstu kosningar. Stefnufesta hans er auk heldur svo mikil að haft er eftir honum á visir. is í gær að leiði hann ekki lista Frjálslyndra í Reykjavík þá muni hann leiða lista annars flokks. 

 

Athugasemdir

[Jóhanna Magnúsar- og Völudóttir , 20.8.2008 kl. 19:59]

Takk fyrir heiðarlega afstöðu Jón, það er það sem kjósendur þurfa að heyra.

[Rannveig H, 20.8.2008 kl. 20:22]

Tek undir með Jóhönnu, það er heiðarleikinn sem stendur upp úr það hefur mark sýnt sig og sannað.

[Signý (IP-tala skráð) 20.8.2008 kl. 21:04]

Mættu

[Signý (IP-tala skráð) 20.8.2008 kl. 21:10]

Afsakið tölvan tók af mér völdin. Fleiri mættu tala svona skýrt. Borgarpólitík virðist mest gerast í bakherbergjum sem er ekki traustvekjandi. 

[Nökkvi (IP-tala skráð) 20.8.2008 kl. 21:16]

Flokkur sem er í sjálfum sér sundurþykkur fær ekki staðist....

Stefnufesta og samlyndi skapar stjórnmálaflokk sem mark er á takandi. Þetta ósamlyndi sem virðist vera í gangi hjá forystu Frjálslynda flokksins er ekki traustvekjandi. Kemur því miður ekki á óvart miðað við þann samsöfnuð manna, úr ólíkum flokkum og með ólíkar skoðanir, sem þar eru innanborðs.

Farðu bara yfir í Sjálfstæðisflokkinn aftur Jón, gömlu göturnar eru bestar þegar til lengri tíma er litið og hvernig sem á það er litið.

[Þorsteinn H. Gunnarsson (IP-tala skráð) 20.8.2008 kl. 21:29]

Er ekki öllum frjálst að ganga í stjórnmálaflokka á Íslandi?

Þurfa menn að fá einhver boðskort fyrst? Þetta er nú alveg nýtt fyrir mér og er ég nú eldri en tvævetur. Það er með ólíkindum að sjá svona orðsendingu frá manni sem situr á Alþingi Íslendinga á 21 öld. Ég hélt að það væri nú um að gera að hafa hreyfingu á atkvæðafylginu

og hafa uppi vopnaglamur nokkurt og bíta í skjaldarrendurnar. Eða er Frjálslyndi flokkurinn orðinn eign einhverra þingmanna? Ég bara spyr að því ég þekki margt ágætis fólk á þessum slóðum sem er ekki að tíunda það á hverjum degi hvað það kýs í það og það sinnið.

[Davíð Þorgríms. (IP-tala skráð) 20.8.2008 kl. 21:46]

Til hamingju Þorsteinn H. Gunnarsson, þú færð verðlaunin "tilgerðarlegasti penninn" - merkilegt nok að á 21 öld.

Annars á þessi Frjálslyndi flokkur ekkert erindi í íslenskri pólitík, framlag þeirra til málefna á þessu landi er alveg í 0% (fyrir utan allt varðandi kvótakerfið sem kemur aðeins broti af þessari þjóð við).

En ég skil vel að vera ekkert að hrópa húrra yfir því að Ólafur F. Geðsjúklingsson sé að ganga aftur í flokkinn, maðurinn er auðvitað bara alveg fáránlegur.

[Jón Tómas Svansson, 20.8.2008 kl. 21:47]

ÓlafurF er í miklu framapoti  og telur sjálfsagt að frjálslyndir séu með gullfiskaminni þegar honum hentar en það mun skaða ímynd flokksins að taka við honum

Enn hvað varðar samstarf og samstarfsslit við sjálfstæðismenn þá gleymir Óli einu að óvinurinn ann svikunum en fyrirlítur svikarann.

[Jón Valur Jensson, 20.8.2008 kl. 21:48]

Þorsteinn hefur lög að mæla, það á ekki að hafna týndum syni, nær hann kemur aftur. Ég skil þig að mörgu leyti vel, nafni, en samt ætti engum flokksmönnum að vísa frá, nema þeir séu hreinar flokksfælur.

[Ingólfur H Þorleifsson, 20.8.2008 kl. 21:55]

Er þetta bara ekki rétti staðurinn fyrir Ólaf. Þessi flokkur er ekkert nema pólitískt uppsóp. Held að það breyti ekki miklu hver verður í fyrsta sæti hjá ykkur í Reykjavík. Grunnur Þessa flokks er á Vestfjörðum og ef og þegar Addi Kitta Gau hættir þá er þetta búið spil.

[Rauða Ljónið, 20.8.2008 kl. 22:22]

Sæll.

,,Get ekki boðið Ólaf F. Magnússon velkominn í Frjálslynda flokkinn”.

Ég sé ekki betur en það sé rétt hjá þér eftir því sem á undan er gengið.

Kv. Sigurjón Vigfússon 

 

 

 

[Valsól (IP-tala skráð) 20.8.2008 kl. 23:05]

Ég man ekki betur en að það hafi margir verið á móti því að þú gengir í FF á sínum tíma. Magnús Þór Hafsteinsson sagði við það tækifæri að allir væru velkomnir í flokkinn, það hlítur að eiga við núna eins og þegar þú gekkst í flokkinn. Eða hvað? Mér finnst þú líka vera farinn að haga þér dálítið eins og þú eigir þennan flokk. Skrýtið og ég tek undir þau orð að þegar Guðjón hættir þá hverfur þessi flokkur fyrir fullt og allt.

[Sigurður Sigurðsson, 20.8.2008 kl. 23:27]

Hvaða brúnkukrem notarðu Jón?

[Guðjón H Finnbogason, 21.8.2008 kl. 00:39]

Sæll félagi. Mér finnst þetta rétt hjá þér,það er mikið búið að tala og miklar fullyrðingar.

[Árni Gunnarsson, 21.8.2008 kl. 00:42]

Tek undir þessa færslu þína Jón. Auk þess er ég hrærður af þökk til allra þeirra velunnara okkar sem finna hjá sér hvöt til að leiðbeina okkur í vandasömu máli auk þess að tjá hreinskilna skoðun á málefnum flokksins og tengdum persónum. Það er glöggt merki um víðsýni að hafa áhyggjur út fyrir eigin flokka.

Um Ólaf F. Magnússon: Ólafur er ekki að ganga í Frjálslynda flokkinn í réttum skilningi þess hugtaks. Ólafur var í flokknum og var falið að leiða lista hans í borgarstjórnarkosningum undir framboðsheitinu, Frjálslyndir og óháðir, en það viðhengi var sett til að höfða til þeirra kjósenda sem fundu sinn málefnahljómgunn í framboðinu en höfðu ekki að öðru leyti ætlað að starfa með flokknum.

Ólafur kaus að yfirgefa þann flokk sem hafði borið kosnað af framboðinu þegar hann hafði náð kjöri og það sama gerði Margrét Sverrisdóttir varaborgarfulltrúi og fleiri. Þetta fólk gekk ásamt Ólafi til liðs við nýtt framboð til alþingiskosninga og stofnaði áamt Ómari Ragnarsyni og fleirum Íslandhreyfinguna. Ólafur studdist þó áfram við nafn F listans í borgarstjórninni og þáði greiðslur frá borginni sem fulltrúi flokks sem hann hafði yfirgefið.

Nú er hann rúinn því embætti sem hann hafði náð í nafni F listans og nú hyggst hann sækja á ný bakland til næsta framboðs hjá þeim flokki sem hann sveik með svo ógeðfelldum hætti.

Lái hver sem vill Jóni Magnússyni, mér og fjölmörgum öðrum flokksmönnum Frjálslynda flokksins þó við séum búnir að fá nóg af samstarfi við þann ágæta mann Ólaf F. Magnússon. 

[Þroftur (IP-tala skráð) 21.8.2008 kl. 01:56]

"Nú verður Guðjón Arnar Kristjánsson að gera afdráttarlaust grein fyrir því hvort að Ólafur F. Magnússon sé að segja satt eða ekki."

 Sjaldan launar kálfurinn ofeldið.

[Jóhann Kristjánsson, 21.8.2008 kl. 02:43]

Ég sem formaður bæjarmálafélagsins á Akureyri verð að segja að Ólafur F Magnússon hefur ekki minn stuðning og mér finnst með ólíkindum að Ólafur F Magnússon skuli gefa út þá yfirlýsingu að hann ætli í framboð til borgarstjóra í næstu kosningum án þess að hafa rætt það við Jón Magnússon formann borgarmálafélags frjálslynda flokksins.

Þegar öllu er á botninn hvolft má sjá glögglega að Ólafur er aðeins að reyna að hlaupa í skjól vegna fylgisleysis síns. Ég held að flokksforystan muni hugsa sig um tvisvar áður en slíkum liðhlaupa verði gefin uppreisn æru.

Ég tek heilshugar undir orð Jóns Magnússonar hér í færslunni. 

[Arnór Valdimarsson (IP-tala skráð) 21.8.2008 kl. 13:14]

Ég tek undir með þér Jón. 

Og mér þykir það einfaldlega barnalegt af Ólafi ef hann heldur, að hann geti valsað inn aftur eftir að hafa skellt á eftir sér, og tekið við formennsku í Reykjavík. Hann verður sér í lagi fyrst að afla sér trúnaðar innanflokks og vinna sig til álita aftur.

[Heidi Strand, 21.8.2008 kl. 13:47]

Det er større glede i himmelen over en synder som vender om, enn over nitti rettferdige som ikke trenger omvendelse.

Bibelen

[Jón Valur Jensson, 21.8.2008 kl. 14:16]

Innlegg mitt hér ofar sagði ekki nóg. Ég hefði betur orðað þetta svona: "samt ætti engum flokksmönnum að vísa frá, nema þeir séu hreinar flokksfælur eða hafi unnið flokknum mikið tjón."– Ennfremur er hér að finna nýjar hliðar málsins: Hörð ádrepa Eiríks Stefánssonar ...

[fellatio, 21.8.2008 kl. 15:00]

getur hann ekki bara gengið sinn veg?

[Þóra Guðmundsdóttir, 21.8.2008 kl. 21:57]

Jón Valur, týndi sonurinn sem þú hefur eflaust í huga, iðraðist af heilum hug, hann sá villu síns vegar og bað föður sinn fyrirgefningar.

[Númi (IP-tala skráð) 21.8.2008 kl. 23:27]

Svanasöngur frjálslyndra,verðu við næstu kosningar ef Ólafur verður á lista.::::::::::::::::Pottþétt...

[Jakob Falur Kristinsson, 22.8.2008 kl. 02:54]

Hvað sem öllum göllum á Ólafi F. Magnússyni, líður.  Þá verðir því ekki neitað að hann á mikið persónufylgi í Reykjavík.  Það voru ekki allir sáttir við að fá Jón Magnússon í flokkinn, sem hann þykist nú eiga og ráða.  Innganga Jóns var á sínum tíma aðalástæða þess að Margrét Sverrisdóttir yfirgaf flokkinn og lostaði flokkinn nokkra þingmenn.  Guðjón Arnar Kristjánsson hefur boðið Ólaf F. Magnússon velkominn í flokkinn en ekki lofað honum neinu varðandi framboðsmál.  Ég sé ekkert athugavert við að Ólafur komi aftur í flokkinn.  Það ber að fagna hverjum liðsmanni.  En ekki blása til ófriðar eins og Jón Magnússon er að reyna að gera með sínum skrifum. Er virkilega svo komið að Frjálslyndi flokkurinn sé lokaður klúbbur nokkurra manna og ekki megi allir ganga í flokkinn?  Ef svo er þá geta ekki nema ákveðnir einstaklingar kosið þennan flokk.

[Jón Magnússon, 23.8.2008 kl. 15:50]

Það er alveg makalaust hvað sumir menn snúa staðreyndum á haus eins og þú gerir Jakob Kristinsson. Í fyrsta lagi þá liggur fyrir að Frjáslyndi flokkurinn jók mjög fylgi sitt skv skoðanakönnunum eftir að ég og félagar mínir gengu til liðs við flokkinn en hafði ekki náð inn manni skv skoðanakönnunum í nokkurn tíma á undan. Í öðru lagi þá fór Margrét Sverrisdóttir úr flokknum 7 mánuðum eftir að ég gekk í hann eftir að hafa tapað í varaformannskjöri fyrir Magnúsi Þór Hafsteinssyni. Þess má geta  að Margrét bauð mig sérstaklega velkominn í flokkinn á fyrsta fundi sem ég sótti. Í þriðja lagi er ekki verið að blása til ófriðar en það er skylda stjórnmálamanna að hafa skoðun og tjá sig um hana annars eiga þeir ekkert erindi í pólitík. Í fjórða lagi er Frjálslyndi flokkurinn ekki lokaður klúbbur en þeir sem ganga í hann mega ekki vera félagar í öðrum flokkum m.a. en síðast þegar ég vissi var Ólafur F í Íslandshreyfingunni.  Það er með ólíkindum hvað það hentar sumu fólki eins og þér Jakob að snúa sögunni og sannleikanum á haus.