Svar þitt skal vera já já og nei nei.

Þegar Ólafur Jóhannesson var formaður Framsóknarflokksins þá var eitt sinn vísað til þeirrar þekktu setningar í Biblíunni að "svar þitt skal vera já já og nei nei" Þannig þótti Framsóknarflokkurinn fara þá og svo virðist sem flokkurinn hafi nú gengið í endurnýjun lífdaga með afturhvarfi til fortíðar.

Í viðtali í Morgunblaðinu í dag lýsir nýkjörinn formaður Framsóknarflokksins skoðunum sínum með einkar fróðlegum Framsóknarhætti. Hann vill bæði semja um Icesave skuldbindingarnar og ekki semja um þær. Ég velti því fyrir mér hvort formaður Framsóknarflokksins viti ekki hver afstaða Framsóknarflokksins var til þessa máls þegar þingsályktunartillaga þess efnis var afgreidd á Alþingi.  Miðað við afstöðu þingmanna flokksins í málinu liggur þá ekki afstaða Framsóknarflokksins ljós fyrir?

Um hugsanlega minnihlutastjórn segir hann að þar eigi að fara ríkisstjórn sem sitji sem allra skemmstan tíma og umboð stjórnarinnar mjög takmarkað. Á sama tíma bendir formaður Framsóknarflokksins réttilega á mikinn  vanda fjölskyldna og fyrirtækja í landinu sem brýn nauðsyn sé að leysa sem fyrst. 

Mér er það satt að segja nokkur ráðgáta hvernig ríkisstjórn sem á að hafa takmarkað umboð og sitja í sem skemmstan tíma á að geta gert eitthvað sem máli skiptir varðandi þau aðkallandi vandamál sem við er að glíma og formaður Framsóknarflokksins bendir réttilega á. 

Nýkjörinn formaður Framsóknarflokksins ber mikla ábyrgð á því hvernig mál hafa þróast. Hann gaf þá yfirlýsingu fyrir lögnu að Framsóknarflokkurinn mundi verja minnihlutastjórn Vinstri Grænna og Samfylkingarinnar falli. Þess vegna fóru  málin í þennan farveg.

En Sigmundur Davíð er greinilega nokkuð snjall samningamaður því að þegar hann var búinn að trylla VG og Samfylkingu í stjórnarmyndunarviðræður þá segir  hann aftur og aftur já en og já en, bara ef þið gerið þetta.  

Raunar er þessi afstaða hans og Framsóknarflokksins ekki dæmi um hið nýja Ísland sem þeir tala um heldur það gamla. Þann hráskinnaleik og sérgæsku sem hefur valdið því að fólk hefur ekki viljað styðja við Framsóknarflokkinn.

Formaður Framsóknarflokksins virðist ekki átta sig á að við erum á ögurstundum í íslensku samfélagi og það liggur á að starfhæf ríkisstjórn verði mynduð til að taka á þeim bráðavanda sem við er að glíma ekki til eins mánaðar eða tveggja heldur til lengri tíma. Ríkisstjórn sem ætlar sér að sitja í 2 til 3 mánuði ætlar sér ekki og getur ekki markað afgerandi spor svo sem nauðsyn ber til.  Ég fæ ekki betur séð en þetta hafi átt að vera hundrað daga gleðistjórn til að tryggja stjórnarflokkunum fylgi við kosningar en taka verði á vandamálunum eftir það.

Ríkisstjórn sem treystir sér ekki og mun ekki hafa með ný fjárlög að gera og nauðsynlegar aðgerðir í ríkisrekstrinum er ekki að marka neina sérstaka stefnu til frambúðar.  Vandi heimilanna og fyrirtækjanna er meiri en svo að það sé hægt að sætta sig við svona ruglanda í stjórnmálum.

For

Stjórn mynduð í dag eða á morgun

Athugasemdir

[Nökkvi (IP-tala skráð) 31.1.2009 kl. 12:32]

Málið er Jón, að hægt er að setja fram hugmyndir og stefnur, annað er að framfylgja þeim. Þetta held ég að þessum aðilum, sem koma að nýrri stjórn sé fullljóst. Það er í raun sáralítið sem ný stjórn getur gert á þeim tíma sem er fram að kosningum. Ný stjórn markar sér engin sérstök spor heldur verður það hennar helsta verk að halda sjó.

Þetta er hins vegar tækifæri fyrir Sjálfstæðisflokkinn og Frjálslyndaflokkinn að gera sér betur grein fyrir því hver þeirra eigin stefna á að vera, og að efla traust til flokkana meðal kjósenda sinna. Varast ætti að eyða öllu púðrinu í að grafa undan stjórn sem gerir hvort sem er afar lítið á þessum stutta tíma.

Mitt ráð er að láta stjórnina í friði, það tekur því nefnilega ekki að vera að agnúast út í hana. Eins er ekki úr vegi að gefa þessum unga formanni Framsóknarflokksins frið til að koma sér inn í stjórnmálin.

Tækifæri á tækifæri ofan.

[Dunni, 31.1.2009 kl. 22:49]

Góð lýsing á Framsókn.

Vitna enn og aftur í Jesaja spámann og sný upp á Framsóknarflokkinn; "Þér eruð ekkert. Verk yðar eru einskis nýt. Andstyggilegur er sá er yður kýs."

Það er samt ekkert furðulegt við að Samfylkingin og VG hafi ekki talað við FF.  Slíkt samstarf gefur ekki meirihluta.   En það vekur ekki traust að þurfa að styðjast við Framsókn.