Kim og Suella

Suella Braverman og Kim Badenoch eru breskir ráðherrar. Þær eru hörundsdökkar, dætur innflytjenda. Suella af indverskum uppruna Kim frá Nígeríu.Suella er innanríkis- og Kim viðskiptaráðherra.

Báðar telja fjöldainnflutning hælisleitenda alvarlegasta vandamálið í Bretlandi. Suella hefur bent á að verndarkerfi hælisleitenda skv.rúmlega 70 ára gömlu regluverki Sameinuðu þjóðanna sé úrelt. Milljarður manna gæti þessvegna komið til Evrópu sem hælisleitendur. Þær krefjast róttækra breytinga. 

Þær leggja mikið upp úr breskum gildum og breskri þjóðmenningu, sem þær telja að sé í hættu vegna straums hælisleitenda og samhliða samfélaga sem séu að myndast í bresku samfélagi

Tæplega 70 milljónir búa í Bretlandi og þeir þurfa ekki að óttast að þjóðtunga þeirra sé í hættu, ólíkt okkur. Samt sem áður átta þessir bresku ráðherrar sig á því að Bretar verði að ráða landamærunum.

Ekki er hægt að nudda rasistastimplinum framan í þessar konur. Ekki er hægt að blása á málflutning þeirra sem "hrútskýringar". Það sem þær segja er einfaldlega rétt. Vilji fólk ekki eyðileggja menningu sína eiginleika og tungu verður að bregðast við.

Skynsamleg umræða um innflytjendamál hefur ekkert með rasisma, fasisma, nasisma eða hægri öfgar að gera. Þær Suella og Kim tilheyra engum þessum hópum eða skoðunum þær eru einfaldlega skynsamar ungar konur. 

Hér á landi hefur umræðan um þessi mál verið að verulegu leyti þjóðfjandsamleg og skipti þar mestu að Sjálfstæðisflokkurinn þekkti lengi vel ekki sinn vitjunartíma og gerir tæpast enn þó mikið hafi lagast.

Allt frá því að ég byrjaði að vara við hvert stefndi fyrir 17 árum og ástandið yrði eins og á hinum Norðurlöndunum ef við mundum ekki bregðast við, en þvert á það voru sett lög um hælisleitendur, sem voru gjörsamlega fráleit og við stöndum uppi og horfum framan í afleiðingarnar. 

Af hverju látum við ekki skynsemina ráða núna í þessum málaflokki. Það mun ekki takast að gera nauðsynlegar breytingar meðan Alþingi er eins skipað og nú er.

Það er því þjóðarnauðsyn að knýja fram stjórnarslit og kosningar, þar sem málsvarar íslenskrar þjóðtungu, íslensks fullveldis og íslenskrar menningar nái meirihluta og geti tryggt það að við sem fullvalda þjóð ráðum landamærnum og tökum eingöngu við þeim sem eru í bráðri lífshættu, sem mun vera innan við 1% af þeim hælisleitendum sem hingað koma nú.  

 

 

Svo öllum líði vel í vitleysunni.

Af tilviljun heyrði ég umfjöllun í útvarpi allra landsmanna í morgun, þar sem amast var við heimalestri og heimanámi skólafólks. Mig rak í rogastans. Af hverju var amast við heimanámi? Jú þá gæti orðið mikill munur á milli námsfólks. 

Þeir sem þannig hugsa telja það af hinu illa að einhver skari fram úr og sé betri en aðrir. Hugsunin sem liggur á bakvið í furðuveröld vitleysunnar, er að þá muni þeir sem læra heima skara fram úr þeim sem ekki gera það. 

Boðskapurinn er sá, að það megi engin skara fram úr heldur verði allir að vera jafn illa læsir og reiknandi til þess, að allir geti hjakkað í því meðalhófi sem furðuveröld vinstri vitleysunnar gerir kröfu til.

Hvernig rímar það svo við samkeppnisþjóðfélagið að engin megi skara fram úr?

Sjálfsagt vel því samkeppni er ekki markmið í íslenskum skólum. Ekki heldur að kenna nemendum og sjá til þess, að þeir geti fullnýtt það sem Guð gaf þeim. Meginmarkmiðið er ekki námið, heldur að öllum líði vel í skólanum. 

Af sjálfu leiðir, að Siggi má ekki fá hærri einkunir en Jón því að þá gæti Jóni liðið illa og taka verður foreldra Sigga til bæna á næsta foreldrafundi og brýna fyrir þeim að valda ekki vanlíðan hjá Jóni með því að hjálpa Sigga að læra og hvetja hann til að dáða á vettvangi menntagyðjunnar. 

Er það furða að við skulum stöðugt lækka í Pisakönnunum þar sem borin er saman geta nemenda mismunandi þjóðlanda. Við endum með því að verða lægst með sama áframhaldi, en getum þá státað af því að öllum líði svo vel í íslenskum skólum þó engin kunni neitt og skólarnir séu ekki að rækja upphaflegt verkefni. 

Heimskan og fordildin

Um árabil hafa stjórnmálaleiðtogar í Evrópu reynt að yfirbjóða hvern annan í því að lofa kolefnishlutleysi vegna meintrar hlýnunar af mannavöldum. Þeir hafa sett markmið, sem eru gjörsamlega óraunhæf og rýra lífskjör í Evrópu og draga úr samkeppnishæfni álfunnar. Fátt sýnir betur hnignun Evrópu en sú fákæna stjórnmálastétt, sem hefur það markmið að draga þrótt úr framleiðslu og skapa borgurum sínum verri lífskjör.

Flest önnur iðnríki en ríki Evrópu eru mikilvirkari í kolefnisútblæstri. Indland, Kína, Bandaríkin og Rússland bera ábyrgð á stærstum hluta af öllum kolefnisútblæstri jarðar. Þessum ríkjum dettur ekki í hug að ná þessu markmiði árið 2050 hvað þá fyrr og eru hætt að látast ætla að gera það nema Bandaríkin. Stjórnmálaleiðtogar Indlands, Kína og Rússlands telja þetta kolefnishlutleysi dæmigerða Vestræna hnignun og hégóma og finnst sjálfsagt að nýta það til hins ítrasta.

Rishi Sunak forsætisráðherra Bretlands ákvað að breyta um stefnu og viðurkenna, að loftslagsmarkmiðin væru óráð búist var við miklum mótmælum, en þau voru engin.

Vegna heimsku og fordildar stjórnmálamanna í Evrópu munu Evrópskir skattgreiðendur greiða verð fyrir heimsku og úrkynjun með hærri sköttum og hækkuðu vöruverði á meðan ríki á framfarabraut hlægja að forustuliði Vesturlanda.

Við verðum að breyta um stefnu alveg eins og Sunak gerði. Við höfum engin efni á því að greiða tugi milljarða í þessa loftslagshít, sem er stefnumörkun úrkynjaðrar stjórnmálastéttar sem hefur ekkert meginmarkmið en að vera í partýinu. 

Það er brýnt að losa okkur við stjórnmálaleiðtoga heimskunnar og fordilarinnar og kjósa fólk á framfarabraut sem telur hlutverk sitt að bæta kjör borgaranna og virða frelsi þeirra í stað þess að hneppa þá í skattaáþján til að þóknast erlendum loftslagsfurstum.