Kærleiksheimilið

Í gamla Sovétinu þegar Jósep Djúgasvili Stalín var aðalritari Kommúnistaflokksins og í raun einræðisherra, var hann jafnan kosinn með öllum greiddum atkvæðum. Eftir setningarræðu á Landsþingi flokksins eitt sinn klöppuðu þingfullrúar í rúmar 20 mínútur. Öryggislögregla KGB heimsótti síðan þingfulltrúann sem fyrstur hætti að klappa og kom honum í fangabúðavist í Gúlaginu.

Viðreisn hélt landsþing sitt um helgina og hinn hugumstóri formaður flokksins Þorgerður Katrín Gunnarsdóttir fékk öll atkvæði í formannskjöri nema tvö. Sagt er að vaktmenn flokksins leiti nú með logandi ljósi að þeim tveim sem brugðust til að koma þeim út í hið ysta pólitíska myrkur eins og þeim sem hætti of snemma að klappa fyrir Stalín forðum. 

En það var ekki bara formaðurinn sem fékk kommúníska kosningu að hætti þeirra í sovétinu forðum, sá forustumaður flokksins sem á landsmet í hækkun skatta var hylltur sérstaklega. 

Fátt bar annað til tíðinda á flokksþinginu. Dustað var rykið af ályktunum flokksins frá því í árdaga og þær endurprentaðar og samþykktar í sama kærleiksanda og flokksmenn þökkuðu fyrir skattahækkanir og Gyðingaandúð formanns flokksins. 

Viðreisn bauð sérstaklega þeim talsmanni Evrópusambandsins sem vill ganga lengst í að leggja niður landamæri, traðka á fullveldi aðildarþjóða, allt til að fullkomin sameining undir alræði kommisara von der Leyen í Brussel geti átt sér stað.

Meðan Bretar voru enn í Evrópusambandinu átti Nigel Farage helsti talsmaður fyrir úrgöngu Breta úr Evrópusambandinu í mestum deilum við þennan gistivin Viðreisnar og gerði hann venjulega kjaftstopp. En  Þorgerður Katrín telur að Verhofstadt geti best túlkað skoðanir Viðreisnar í Evrópumálum. 

Þá þarf engum bókum lengur að fletta um það hver skoðun Viðreisnar er. Þau vilja ganga plankan á enda og fordjarfa öllu því sem íslenskt er á altari Evrópusambandsins til að verða útnári hins nýja samabandsríkis Evrópu með miðstjórn og aðalritara í Brussel. 

Á kærleiksheimili Viðreisnar hafa menn glatað öllum tengslum við íslenska sögu og hagsmuni sjálfstæðrar þjóðar, sem vill njóta frelsis og vera ekki öðrum þjóðum háð. 

Sennilega væri best að prenta í viðhafnarútgáfu ræðu Einars Þveræings þegar hann mælti gegn því á Alþingi hinu forna að Noregskonungi yrði gefin Grímsey og senda hana forustu, þingflokki og flokksfulltrúum á þingi Viðreisnar. 

Það var eitt að vera samþykkur aðild að Evrópusambandinu meðan bandalagið var viðskiptabandalag. En nú er það allt annað og meira stefnir að því að taka öll völd aðildarríkja í sínar hendur á forsendum Verhofstads hins nýja andlega leiðtoga Viðreisnar. 

 

Minningarhátíð breyttist í sigurhátíð

Það var stórkostlegt að fylgjast með minningarhátið um Charlie Kirk. Fullur leikvangur af fólki var mætt til að minnast mannsins sem barðist fyrir frelsi, kærleika og kristnum gildum og var drepinn vegna þessara skoðana sinna.

Mér fannst athyglisvert að hlusta á Ben Carson benda á að það skipti máli að hlusta á þá sem tala um það sem stendur í Biblíunni en ekki það sem vinstri menn vilja að standi þar. Mér var óvart hugsað til biskupsins og nokkurra klerka hinna íslensku þjóðkirkju.  Ben benti líka á að land getur ekki verið frjálst nema það eigi einstaklinga sem hafi hugrekki til að berjast gegn hinu illa.

Það var það sem Charlie Kirk stóð fyrir. Ekki að fordæma heldur reyna að benda fólki á réttu leiðina með því að ræða við það. Jafnt stuðningsfólk sem andstæðinga. 

Mér fannst hápunktur minningarhátíðarinnar falleg ræða Eriku ekkju Charlie sem í lokin minnti á orð Jesús þegar hann var negldur á krossinn. "Guð fyrirgef þeim því þeir vita ekki hvað þeir gjöra" Hún bað síðan fyrir morðingja eiginmanns síns. Það mátti víða sjá tár á hvarmi enda tilefnið ærið því miður. 

Í stuttu máli var þessi minningarhátíð í raun sigurhátíð fyrir heilbrigð,framsækin kristileg stjórnmálaöfl í baráttu gegn því sem er falskt, gegn hatrinu og illskunni sem er andhverra þess sem Charlie Kirk barðist fyrir sem framsækinn, þjóðernissinnaður kristinn maður. 

Það var síðan við hæfi og hápunktur að ljúka hátíðinni með laginu America is Beautiful og horfa á Donald Trump leiða Eriku ekkju Charlie Kirk út af sviðinu og mæla síðan nokkur falleg lokaorð um vin sinn Charlie Kirk og nánustu ástvina hans. 

Guð blessi Charlie Kirk, alla  hans nánustu og þau sjónarmið sem hann barðist fyrir.  

Hvað er tveggja ríkja lausn?

Hvað er tveggja ríkja lausn milli Ísrael og Palestínumanna? Utanríkisráðherra Íslands, forsætisráðherra og fjöldi vinstri sinnaðra ráðamanna í Evrópu tala um tveggja ríkja lausn, án þess að segja hvað þeir eiga við. Af orðum þeirra má ráða, að Ísrael sé alfarið um að kenna að þessi svokallaða tveggja ríkja lausn hefur ekki orðið að veruleika.

Það er rangt og sýnir takmarkaða söguþekkingu þessara pólitísku dverga.

Oslóarsamningarnir svokölluðu fólu í sér að Palestínumenn hefðu eignast sitt eigið ríki á hinum svonefnda Vesturbakka og Gasa. Það sem kom í veg fyrir það var að forustumenn Palestínu vildu ekki samþykkja þá lausn.

Síðan stóðu þeir fyrir annarri uppreisninni (Intifada) sem þeir kölluðu svo, þar sem hátt í tvöhundruð unglingar voru sendir með sprengjuvesti til Ísrael til að drepa sem flesta og þeim tókst að drepa rúmlega þúsund Gyðinga með þessu.

Ef til vill má minna á eftirfarandi sem varðar undirbúning að og stofnun sjálfstæðs ríkis Palestínumanna:

1978 Camp David samkomulagið.

1993 Oslóarsamningarnir svokölluðu sem undirritaðir voru í Egyptalandi

2005 Ísraelsmenn fara frá Gasa og afhenda PLO lyklana. Afleiðingin af því var að Hamas tók yfir völdin og stöðugar árásir á Ísrael byrjuðu, flugskeytaárásir o.fl. sem náðu hámarki með fjöldamorðunum og gíslatökunni 7. október 2023

2000 Bill Clinton fyrrum Bandaríkjaforseti hefur bent á að í Camp David viðræðunum árið 2000 hafi Palestínumenn komið í veg fyrir að sjálfstætt ríki Palestínumanna yrði stofnað og segist hafa sagt „You walk away from these once in a lifetime peace opportunities“

2005 Ísraelsmenn fara frá Gasa einhliða ákvörðun þeirra. Skömmu síðar byrjar Hamas að skjóta eldflaugm á Ísrael og gerir síðan innrás í Ísrael 7.okt.2023, með fjöldamorðum og hræðilegum hryðjuverkum.  

 

2008 Ríkisstjórn Ehud Olmert fellst á allar kröfur Palestínumanna m.a. sjálfstætt ríki með höfuðborg í Austur Jerúsalem. Því boði var sýnd algjör lítilsvirðing. Hver skyldi nú hafa hafnað þessu tilboði? Enginn annar en leiðtoginn mikli Mahmoud Abbas, sem er á 21 ári 4.ára valdatímabils síns en kosningar hafa ekki verið haldnar á Vesturbakkanum síðan árið 2004. Árið 2023 skömmu fyrir hryðjuverkin 7.okt. afsakaði hann þjóðarmorð nasista á Gyðingum í ræðu.

Ísraelsmenn hafa ítrekað boðið Palestínumönnum Vesturbakkann og Gasa gegn viðurkenningu á Ísrael og samstöðu um friðsamlega sambúð. Því boði hafa Palestínumenn ítrekað hafnað.

Spurningin er, hvað eiga vestrænir stjórnmálamenn við þegar þeir segjast tala fyrir tveggja ríkja lausn og fordæma Ísrael í leiðinni. Vilja þeir að ríki Palestínumanna nái yfir meira landsvæði en Vesturbakkann og Gasa og sé svo hvað þá til viðbótar?

Ísrael hefur ekki staðið í vegi fyrir að sjálfstætt Palestínuríki yrði til. Það hafa Palestínumenn gert sjálfir eins og þessi upprifjun sýnir.

Vill Þorgerður Katrín e.t.v. að ríki Palestínu nái yfir allt Ísrael en sé ekki svo hvað þá? Þó stjórnmálamenn bulli oft á tíðum þá verður samt að krefjast þess að þeir geri með fullnægjandi hætti grein fyrir hvað þeir eru að meina einkum þegar um atriði er að ræða, þar sem utanríkisráðherra snýst nú gegn góðri vinaþjóð Íslands og vill útiloka hana frá þáttöku í fjölþjóðlegu menningar- og listastarfi, loka fyrir viðskipti við landið og meina kjörnum fulltrúum þeirra að koma til landsins .

Hvað eiga Þorgerður Katrín og Kristrún Frostadóttir við með tveggja ríkja lausn? Skyldu þær vita það sjálfar?

Er tjáningarfrelsið ekki algilt?

Sjónvarpsstöð vestur í Bandaríkjunum sagði upp þáttastjórnanda í gærkvöldi, sem  hafði uppi óviðurkvæmileg ummæli vegna morðsins á Charlie Kirk í sjónvarpsþætti sem hann stýrði.

Þessi uppsögn varð Ríkisútvarpinu tilefni til að fjalla um í nánast öllum fréttatímum heilan dag,með þeim hætti að þarna væri alvarleg atlaga að tjáningarfrelsinu. Enn var bætt í, í kvöldfréttatíma sjónvarpsins með fréttaskýringu aðila,sem sveipaði um sig kufli fræðimannsins.

Enn var bætt í með umfjöllun um málið í Kastljósi þar sem annar sem sveipaði einnig um sig kufli fræðimannsins fjallaði um málið. Aldrei þessu vant voru þó viðmælendurnir málefnalegir og fóru ekki offari eins og "sérfræðingar" RÚV gera oftast. 

Það er nauðsynlegt að standa vörð um tjáningarfrelsið. Hart er iðulega að því sótt.

Fyrir nokkru henti það upp í Háskóla Íslands(HÍ), að fræðimaður átti að halda fyrirlestur um vísindalegt efni, en hópur óeirðarseggja sumra í vinnu hjá H.Í komu í veg fyrir að hann fengi að tjá sig vegna rasískra skoðana óeirðafólksins. Þar var um ótvíræða og fólskulega atlögu að tjáningarfrelsinu að ræða 

Þá brást RÚV ekki við. Tjáningarfrelsi fræðimannsins var ekki eins mikilvægt eins og uppsögn sjónvarpsmanns í Bandaríkjunum.

Áróðursmiðstöð RÚV í Efstaleiti telur árás á Tjáningarfrelsið ekki vera algilt heldur sé lítið við það að athuga ef vinstri menn standa að því og gera það á rasískum forsendum þegar Gyðingar eiga í hlut. 

Mesta hættan á Íslandi í dag við að koma í veg fyrir hlutlægar umræður á markaðstorgi lýðræðisins, raunverulegt tjáningarfrelsi,er Ríkisútvarpið,sem verður ósvífnara og ósvífnara í einhliða áróðri sínum, að geðþótta fréttamanna. 

Sjálfselska kynslóðin.

Veðrið hefur leikið við landsmenn frá því snemma í vor. Orð og ljóðlínur borgarskáldsins Tómasar Guðmundssonar um að ekkert væri yndislegra eða fegurra en vorkvöld í vesturbænum. Sigurðar Þórarinssonar jarðfræðingur sagði ekkert er fegurra en vorkvöld í Reykjavík. Á s.l.vori áttum við þess iðulega kost að taka undir með skáldunum, veður var gott og landið skartaði iðulega sínu fegursta. 

Nú haustar að eftir gott vor og sumar. Haustkvöld hafa ekki orðið skáldum jafn viðmjúk yrkisefni og vorkvöld. Borgarskáldið segir að þá hópist vofur í naustin, sem gat þó haft ljúfar afleiðingar að mati skáldsins.

Fáir verða þó enn varir við haustið í því eindæma góðviðri sem hefur verið það sem af er september.

Skaflinn í Gunnlaugsskarði í Esjunni bráðnaði í júlí og fjallið verið snjólaust í suðurhlíðum síðan. Svo langt sem ég man hefur Esjan aldrei verið snjólaus í suðurhlíðum svo lengi. hafi nokkru sinni á okkar tímum verið svona lengi snjólaus.

Allt fram undir aldamót tók fólk góðæri til lands og sjávar sem einstakri Guðs gjöf og þakkaði fyrir að vetur konungur sleppti sínum heljargreipum af landi og þjóð sem lengst.

Nú bregður hins vegar svo við að trúarbragðahópur fólks sem telur að maðurinn sé Guð og ráði veðrinu hamast að fólki fyrir að keyra bíla, fara í flugferðir auk margs annars og segir það munu valda hamfarahlýnun. Reynt er með óttastjórnun að ná tökum á fólki og láta það skammast sín fyrir að láta sér líða vel.

En mennirnir eru ekki Guðir og hafa lítið eða eitthvað með veður að gera og það er næsta skoplegt að þeir sem geta ekki einu sinni spáð um veðrið með öryggi fram í næstu viku skuli telja sig geta spáð fyrir um hvernig það verður eftir öld eða meira. Allt eru það spádómar tölvulíkanana sem hafa allar reynst rangar hingað til.  

Loftslagskirkjan þvingar almennig til að borga hærri skatta með óttastjórnun. Þeir ofurríku fundu þó leiðir til að fara með ofsagróða frá þessu gnægtaborði, sem neytendur þurfa að greiða í hærra vöruverði og verri þjónustu. 

Dálkahöfundurinn Michael Decon bendir á spaugilega hlið málsins þegar hann rifjar upp framlag Grétu Túnberg barnsins sem skrópaði í skólanum og var gerð að helsta áróðursmeistara loftslagshlýnunarinnar og mætti á þing Sameinuðu þjóðanna þar sem framkvæmdastjórinn kommúnistinn Guterres frá Portúgal kraup á kné og tók  hana í dýrlingatölu.  

Deacon tekur nú við:  

Á loftslagsráðstefnu Sameinuðu þjóðanna 2019 flutti Gréta Túnberg þá unglingur fræga ræðu. “How DARE you!” hvernig dirfist þið sagði hún og skammaði eldri kynslóðir fyrir að eyðileggja framtíð barnabarnanna sinna. Síðan hvæsti hún, þið hafið brugðist okkur, en unga fólkið skilur svik ykkar og augu þeirra stara á ykkur. Ef þið bregðist okkur þá munum við aldrei fyrirgefa ykkur.

Þessi ummæli Grétu eldast illa. Unga kynslóðin jafnaldrar Grétu leika náttúruna verr en þeir eldri. Þeir sem eru á aldrinum 18-34 fljúga mun oftar en þeir sem eru 55 eða eldri. Þrír fjórðu yngri hópsins ferðuðust með flugvélum en aðeins helmingur eldri hópsins. Það rímar ekki vel við orð Grétu um að unga fólkið sé óttaslegið vegna loftslagsbreytinga.

Unga fólkið gerir líka minna í því að láta endurvinna vörur, spara vatn, þvo fötin sín við lágt hitastig eða slökkva ljósin þegar þau fara út úr herbergjum en þeir sem fæddir eru um miðja síðustu öld.

Verði Grétu boðið aftur á Alsherjarþing SÞ ætti hún að biðja eldri kynslóðina afsökunar á því að hafa ráðist svona á okkur og tala svona til jafnaldra sinna:

"Sjálfselsku fíflin ykkar. Sjáið þið ekki hvað þið hafið gert mig að miklu viðundri og heimskingja með þessari innihaldslausu dyggðaflöggun. Hvernig dirfist þið að gera mér þetta."

En meðan Gréta og félagar reyna stöðugt að vekja sektarkennd hjá okkur og segja okkur að líða illa þegar okkur líður vel, þá ættum við að taka Guðs gjöfum, sem við höfum notið svo ríkulega af í sumar með miklu þakklæti því veturinn kemur alltaf hvort sem Gréta eða aðrir helvítisspámenn segja.

 

 

Rússarnir koma

Fátt er skelfilegra en þverpólitískar nefndir og samráðshópar, sem komast að sameiginlegri niðurstöðu á grundvelli hjarðeðlis nefndarmanna oft um alranga niðurstöðu.

Samráðshópur þingmanna um varnar- og öryggismál komst að einni réttri niðurstöðu, að efla bæri öryggissamstarf við Bandaríkin, en hrapar síðan að rangri niðurstöðu að framlög Íslands til varnarmála skuli aukast á stórfelldan hátt á næstu árum vegna ógnarinnar sem okkur á að stafa af Rússum.

Engin þingmaður virðist hafa spurt þeirrar spurningar hvort öryggisógnin frá Rússlandi réttlætti það vígbúnaðarkapphlaup og viðbúnað sem Evrópa hefur hafið? Hvað þá hvort þeim fjármunum sem við mundum eyða í þetta sé ekki peningum kastað á glæ.

Sú var tíðin, að til voru Sovétríkin sem stefndu að heimsyfirráðum skv. yfirlýstum marxískum áherslum og þá náði veldi þeirra um Rússland, alla Austur Evrópu inn í mitt Þýskaland. Löndin voru lokuð fyrir erlendum fréttaflutningi og ferðir fólks vestur eða austur fyrir hið svokallaða járntjald voru tkamarkaðar. 

Síðan féll Berlínarmúrin fyrir rúmum 35 árum og þjóðir Austur Evrópu köstuðu af sér oki kommúnismans. Eftir það náði Rússland lengst í vestur að landamærum Úkraínu mörg hundruð kílómetrum austar en verið hafði.  Rússland hefur  í dag enga sömu burði til sóknar í styrjöld, sem Sovétríkin höfðu. Þeir ná ekki einu sinni að klára stríð viðmun minni þjóð við eigin landamæri. 

Rússland er með álíka fjárhag og Ítalía eða Texas. Ferðafrelsi ríkir og landið er ekki lokað frá erlendum fréttamiðlum. Helsta váin varðandi Rússland stafar af því að vestræn ríki og stjórnmálamenn hafa reynt að útiloka Rússa frá samstarfi árum saman í stað þess að reyna eftir mætti að aðlaga samband okkar Evrópubúa við þá til að búa til nýtt hagvaxtar og velmegunartímabil í Evrópu. 

Í því sambandi er mikilvægt að ljúka stríðinu í Úkraínu. Bandaríkjaforseti hefur lagt sitt lóð á þá vogaskál, en margir evrópskir leiðtogar hafa þvælst fyrir og ekki verður annað séð, en að utanríkisráðherra hafi skipað sér í þann hóp. Nefndin hefur sennilega ekki rætt þau atriði.

Á meðan samráðshópnum verður tíðrætt um þá ógn sem stafar af Rússlandi og Kína og ekki skal gert lítið úr ógninni frá síðarnefnda ríkinu, þá hafa þeir vanrækt viðbrögð við "ógninni sem kemur innan frá" og fráhvarfi frá þeim gildum og mannréttindum einkum tjáningarfrelsinu sem við eigum að verja eins og varaforseti Bandaríkjanna benti réttilega á s.l. vor.

Þar gagnrýndi varaforsetinn stjórnmálamenn í Evrópu, sem opnuðu fyrir flóðgáttir milljóna innflytjenda án þess að nokkrar upplýsingar liggi fyrir um þá m.a. sakaferil. Þetta er gert án þess að lánlausir stjórnmálaleiðtogar í Evrópu spyrji eigin þjóðir og fari að vilja þeirra, um leið og þeir stinga höfðinu í sandinn fyrir afleiðingunum af þjóðfélagslegri helstefnu sinni.

Samráðshópurinn um öryggis og varnarmál hefði átt að taka á þeim viðfangsefnum, sem varaforseti Bandaríkjanna benti á. Það er helsta ógnin sem að okkur stafar og við henni verður að bregðast. Gjörbreyta verður reglum um útlendinga til að koma í veg fyrir frekari ógn við öryggi og lýðræðisleg gildi í samfélaginu.

En við þurfum ekki að standa í vígbúnaðarkapphlaupi vegna meintrar ógnar í austri. Það kapphlaup munum við aldrei ná árangri í.

Þar er verið að henda peningum á glæ. 

 

 

Hingað og ekki lengra

Það er eitthvað alveg nýtt að gerast í Bretlandi. 

Í gær mættu yfir 100 þúsund manns í kröfugöngu í London til að krefjast þess að landamærin verði varin gegn ólöglegum hælisleitendum og bresk lög og menning byggð á kristilegri arfleifð verði í hávegum höfð. 

Tommy Robinson hefur barist lengi fyrir því að skynsamlegar reglur í þágu bresku þjóðarinnar verði sett um innflytjenda- og hælisleitendamál stóð fyrir göngunni. Gangan er ótvíræður sigur fyrir hann 

Tommy Robinson er kallaður öfgahægrisinnaður aðgerðarsinni meira að segja í borgaralegu blaði eins og Morgunblaðinu fyrir það eitt að standa gegn innrás hælisleitenda. Hann hefur ítrekað verið handtekinn án saka af lögreglunni og mátt þola aðsókn úr ýmsum áttum helst frá lögreglunni vegna skoðana sinna. Sök Tommy er, að hann vill varðveita breskt samfélag og þar ríki lög og regla og ein lög í landinu en ekki ýmis afbrigði af sharía lögum auk settra laga af þinginu.

Tommy talar fyrir munn hins venjulega borgara þegar hann krefst skynsamlegra reglna og innrás hælisleitenda verði bægt frá landinu. Nú er breska þjóðin að vakna að vísu vonum seinna, en kröfugangan í gær er góðs viti um að alþýða fólks krefjist skynsamlegra aðgerða til að varðveita samfélagið. 

Tommy er ekki talsmaður neins flokks og því þvert á flokka eins og ágæt samtök hér á landi heita.

Vonandi tekst okkur að vekja íslensku þjóðina eins og Tommy og Nigel Farage virðist vera að takast með þá bresku.

Við þurfum að standa saman um að bægja innrás hælisleitenda frá ströndum Íslands og krefjast þess að ólöglegum innflytjendum og hælisleitendum verði vísað tafarlaust úr landi og verja íslenska tungu, menningu og gildi. 

Það má engan tíma missa.

110.000 manns á götum úti: „Byltingin er hafin“

Unwelcome to Iceland

Sama dag og palestínskir hryðjuverkamenn drápu 6 borgara í Jerúsalem og særðu 8 lífshættulega stóð utanríkisráðherra fyrir fundi í Utanríkismálanefnd Alþingis til að gaumgæfa hvernig Ísland gæti valdið Ísraelsmönnum mestum skaða. 

Á árum áður var stefna Íslands, að safna vinum og varast að búa til óvini og hafa ekki afskipti af hernaðaraðgerðum. Nú safnar utanríkisráðherra óvinum og styður hernaðaraðgerðir erlends ríkis.

Fyrst og fremst á þó að gera Ísrael allt til miska og fyrrum varaformaður Sjálfstæðisflokksins tekur undir með eftirkonu sinni og gerir hennar orð að sínum.

Hver skyldi annars vera stefna Sjálfstæðisflokksins í þessum málum ef hún er þá einhver? 

Eins og í öðrum málum eru allar aðgerðir ráðherrans þaulhugsaðar og vel grundaðar í hvívetna og munu vafalaust valda miklu tjóni þó ekki sé ljóst hver bæri hallann þegar upp er staðið. Utanríkisráðherra segir að það megi þá altént taka viljann frir verkið og senda eigi táknræna yfirlýsingu um að fríverslunarsamningur við Ísrael á vettvangi EFTA verði ekki uppfærður þó honum verði ekki sagt upp enda muni það ekki hafa nein áhrif á Ísrael að mati utanríkisráðherra. Til hvers eru þá refirnir skornir?

Rúsínan í pylsuenda tillagna utanríkisráðherra er að banna tveim ísraelskum ráðherrum Ita­m­ar Ben-Gvir þjóðarör­ygg­is­ráðherra og Bezalel Smotrich fjár­málaráðherra að heimsækja Ísland. Djöfullegri tillögu gat Þorgerður Katrín ekki bryddað upp á. Hugsið ykkur ef öðrum hvorum mannanna skyldi detta í  hug að bjóða vini sínum á dirty weekend í Reykjavík eða konu sinni í dekurhelgaferð, þá yrði hann að hætta við, sem yrði honum "óbærilega sársaukafullt" og mikill harmur að honum kveðinn, þó ekki sé vitað til þess, að þessir tveir ráðherrar hafi nokkru sinni látið sér til hugar koma að heimsækja framsækna kvennfélagið norðan Helkunduheiðar eða önnur félagsmála eða náttúrufyrirbrigði á landi hér.

Ekki verður séð að Ísraelska ríkið geti haldið áfram hernaðaraðgerðum sínum á Gasa með mikilli reisn þegar refsiaðgerðir Þorgerðar Katrínar og utanríkismálanefndar fara að bíta. Leitun er í veröld hér að annarri eins útsjónasemi, lævísri brellu og fláttskap, sem að vísu engin skilur inntakið í enda inntakið það sama og botninn í Borgarfirðinum.

Ísraelsmenn munu síðan vafalaust kunna Íslandi verulegar þakkir fyrir að senda þeim þessa kveðju sama dag og þeir eiga um sárt að binda eftir enn eina hryðjuverkaárás á borgara í Ísrael. 

Það kemur hinni hugumstóru frenju í utanríkisráðuneytinu ekki við. Ekki frekar en Þórdísi undanfara hennar eða fréttastofu RÚV. 

Staðreyndir sem utanríkisráðherra virðist ekki átta sig á.

Stöllunum úr bankahrunsstjórninni Ingibjörgu Sólrúnu og Þorgerði Katrínu utanríkisráðherra yfirsést mikilvægustu atriðin varðandi stríðið á Gasa og hrapa að alröngum niðurstöðum, sem þeim eru ekki sæmandi með einhliða fordæmingu á Ísrael og lygina um að Ísrael sé að fremja þjóðarmorð á Gasa.

Staðreyndir sýna allt annað en þær halda fram. Skoðum málið: 

Hamas getur ræður því að koma í veg fyrir frekari blóðsúthellingar og hörmungar þegar í stað, með því að leggja nður vopn og frelsa gísla sem þeir hafa í haldi.

Ef ES, SÞ og þær ríkisstjórnir sem nota sterkustu orð í orðabókinni til að fordæma Ísrael vildu í raun ná fram friði, þá mundu þau styðja Ísrael bæði í orði og á borði og fordæma Hamas í hvert skipti sem þau taka til máls um átökin á Gasa.

Áframhaldandi kyrkingartak Hamas hryðjuverkasamtakanna á Gasa og neitun þeirra á að afhenda gíslana er það eina sem framlengir stríði og þjáningum fólksins, sem annars hefði lokið fyrir löngu.

Þessar staðreyndir getur utanríkisráðherra ekki skilið og ætlar að beita sér fyrir einhliða refsiaðgerðum gegn Ísrael. Það mun bitna harðast á íslensku þjóðinni ekki síst krabbameinssjúku og sykursjúku fólki. Vonandi getur utanríkismálanefnd Alþingis afstýrt svona rugli og komið vitinu fyrir ráðherrann.  

 

 

Upplestur í Glerárkirkju skv. heimildum Hamas

Prestar Glerárkirkju á Akureyri standa fyrir upplestri á nöfnum barna sem sögð eru hafa farist í stríði Hamas samtakanna á Gasa gegn varnarsveitum Ísrael. 

Nafnalistinn er frá áróðurssmiðju Hamas, sem færir öll dauðsföll á Gasa náttúrulegur eða ekki sem dauðsfall vegna átakanna.

Vissulega er ástandið skelfilegt. Saudi Arabar, Egyptar og Jórdaníumenn hafa ítrekað bent á, að það væri hægt að binda enda á átökin ef Hamas afhenti gísla sem enn eru á lífi og legði niður vopn. 

Prestarnir í Glerárkirkju og allir þeir nytsömu sakleysingjar sem dansa eftir pípum og lúðrablæstri hryðjuverkasamtakanna Hamas virðist gleyma því eða þá skilja ekki mikilvægi þess sem Saudi Arabar, Egyptar og Jórdaníumenn eru að segja. Af hverju hafa prestarnir ekki helgistund þar sem þeir biðja fyrir öllum sem eru á vettvangi þessara hörmunga og hvetja til friðar á þeim grundvelli sem ofangreindar þjóðir krefjast.

Vígamenn Hamas eru allt niður í 12 ára, en eru skilgreind sem börn tli 18 ára aldurs. Hvað skyldu margir á nafnalistum prestanna í Glerárkirkju vera Hamas liðar sem sekir eru um viðbjóðsleg hryðjuverk? Nöfn þeirra skulu samt upp lesin eins og um saklaus fórnarlömb sé um að ræða. 

Skyldu prestarnir í Glerárkirkju á Akureyri hafa haft minningarstund vegna fólksins sem drepið var í innrás Hamas í Ísrael fyrir tveim árum. Þar voru börn steikt lifandi og foreldrarnir neyddir til að horfa á. Konum var hópnauðgað og þær síðan ristar á hol og lík þeirra svívirt. Lík einnar konu sem hafði verið hópnauðgað af vígamönnum Hamas, var ekið um götur Gasa þar sem lýðurinn hrækti á lík hinnar ógæfusömu konu. Skyldu prestarnir í Glerárkirkju á Akureyri minnast hennar í bænum sínum eða hafa helgistund þar sem nafn hennar er nefnt? 

Prestarnir í  Glerárkirkju hafa ekki haft minningarstund um þá sem drepnir voru í Ísrael í innrás Hamas í landið, það segir sína sögu um afstöðu þessara preláta hinnar íslensku þjóðkirkju.. 

Helgislepja miðað við þessar aðstæður og forendur sem og framganga prestanna í Glerárkirkju er fordæmanleg og fyrirlitleg.