Jón Magnússon

Í dag sýknaði Landsréttur Pál Vilhjálmsson í meiðyrðamáli, sem Aðalsteinn Kjartansson blaðamaður ýmist á Heimildinni eða öðrum álíka miðlum höfaði gegn honum. 

Niðurstaða Landsréttar var í aðalatriðum: 

Þó að ummæli Páls væru beinskeytt og óvægin yrði að líta til þeirrar staðreyndar að Aðalsteinn hafði stöðu sakbornings þegar ummælin féllu og væri þekktur blaðamaður og þurfi þeir sem sinna slíkum störfum að vera undir það búnir að þola óþægilega og hvassa gagnrýni og aðfinnslur við störf sín. Páll hafi með umdeildum færslum sínum verið þátttakandi í almennri umræðu um mikilvæg samfélagsleg málefni sem erindi áttu við almenning og naut af þeim sökum rúms tjáningarfrelsis á meðan stefndi mátti sem blaðamaður og opinber persóna gera ráð fyrir að þurfa að þola hvassa og óvægna gagnrýni í kjölfar eigin skrifa.

Þegar litið er til alls framangreinds verður lagt til grundvallar að áfrýjandi (Páll)  hafi mátt vera í góðri trú um að nægilegt tilefni væri til hinna umþrættu ummæla og að þau hafi, þegar litið er til hinnar hvössu umræðu sem málið hefur vakið, ekki gengið svo langt að nauðsyn beri til þess í lýðræðislegu samfélagi, þar sem tjáningarfrelsi er í hávegum haft, að ómerkja þau. Af sömu ástæðum verður heldur ekki fallist á að með ummælunum hafi áfrýjandi skaðað mannorð stefnda að því marki að hann hafi með þeim bakað sér skyldu til greiðslu miskabóta honum til handa. Samkvæmt þessu verður áfrýjandi sýknaður af kröfum stefnda í málinu.

Athyglisverður dómur og sigur tjáningarfrelsisins einkum þegar haft er í huga hversu hvöss og óvægin mörg ummæli Páls voru í garð Aðalsteins og félaga hans. t.d. sem dæmi: 

 "Aðalsteinn Kjartansson á Stundinni eiga aðild að, beina eða óbeina, að byrlun Páls skipstjóra Steingrímssonar og stuldi á síma hans".

"Leikritið um að Aðalsteinn ynni á Stundinni, en ekki RÚV, var hluti af samráði um að byrla og stela til að ná í fréttir."

"Aðalsteinn er þrautþjálfaður í blekkingum".

"Aðalsteinn var sendur á Stundina til að taka við þýfinu og koma í umferð."

"Nýr vitnisburður, og gögn sem styðja þá frásögn, sýna fram á að blaðamennirnir hafi tekið þátt í að skipuleggja byrlunina, verið með í ráðum þegar í upphafi."

"Það átti bara eftir að byrla skipstjóranum og stela síma hans þegar Aðalsteinn flutti blaðamennsku sína af RÚV yfir á Stundina."

"Blaðamennirnir voru vel meðvitaðir um að hafa framið alvarlegt lögbrot og kappkostuðu að eyða sönnunargögnum."

"RSK-miðlar nýttu sér skotleyfið áður en það var gefið út. Þeir misnotuðu andlega veika konu til að byrla og stela."

Þrátt fyrir þessi óvægnu ummæli telur Landsréttur samt rétt,að láta tjáningarfrelsið hafa sigur umfram þöggunartilraunir blaðamannsins Aðalsteins. 

Nú þegar svo afdráttarlaus dómur hefur verið kveðinn upp í þessu meiðyrðamáli verður ekki annað lesið úr dómnum, en að fullt tilefni hafi verið til þessara skrifa þar sem Aðalsteini og félögum er ítrekað borin á brýn glæpsamlegt atferli. Stundum hafa slíkir dómar orðið tilefni til nýrrar umfjöllunar um mál og vissulega væri það vel, að aðförin að Páli Steingrímssyni skipstjóra yrði rannsökuð í þaula. Þessi dómur gefur tilefni til að málið sé tekið til nýrrar skoðunar af ákæruvaldinu og síðast en ekki síst, að útvarpsráð og útvarpsstjóri reki þá óværu sem hefur hreiðrað um sig innan stofnunar Rúv miðla af höndum sér. 

	Landsréttur sýknar Pál af kröfum Aðalsteins
Ábyrgðarmaður færslu Tilkynna um óviðeigandi tengingu við frétt

Mikið væri gaman að vera fluga á vegg á leiðtogafundi NATO sem hefst í kvöld. Hvað skyldu þær eðalfraukur Þorgerður Katrín og Kristrún Frosta hafa að segja um heimsmálin?

Miðað við fyrri yfirlýsingar má ætla að þær láti Trump heyra það fyrir að ráðast á Íran og styðja Ísrael. Þær sögðu að með aðgerðum sínum væru Bandaríkin að hella olíu á eld og stigmagna átökin.  

Svo er Kaja Kallas, sem fer með utanríkismál Evrópusambandsins og áður forsætisráðherra Eistlands. Hún hefur heldur betur verið digurbarkaleg í yfirlýsingum gagnvart Bandaríkjunum og Ísrael og talað af svipuðum gapuxahætti og Þorgerður Katrín. 

Fróðlegt verður að fá fréttir af framgöngu þeirra þriggja á NATO fundinum.

Það hefur verið fróðlegt að fylgjast með Kristrúnu Frosta forsætis- og Þorgerði Katrínu utanríkis-,frá því að þær tóku við ráðherradómi. Báðar hafa þær verið herskáar þegar stríðið milli Úkraínu og Rússa ber á góma og vilja refsa Rússum, senda hergögn og búnað til Úkraínu. Þegar Úkraínumenn leggj til atlögu innan Rússlands,fagna þær því og tala aldrei um, að það geti leitt til stigmögnunar stríðsins. Þær stöllur reyna umfram allt að spyrða sig saman við ráðherra Evrópusambandsins og vera meðal herskáustu þjóða Evrópu.

Þorgerður Katrín hefur verið með mikil undarlegheit gagnvart Ísrael og m.a. sakað Ísrael um þjóðarmorð þrátt fyrir að hún eigi að vita þó ekki væri nema menntunar sinnar vegna að svo er ekki, en þrátt fyrir það lét hún taka saman doðrant í utanríkisráðuneytinu til að styðja kröfu Suður Afríku um að Ísrael yrði sakfellt fyrir þjóðarmorð. Ekki gáfulegt það og fjarri því að vera gott innlegg gagnvart bestu vinaþjóð okkar. 

Þegar gripið er til varnaraðgerða gagnvart hættulegasta ríki og ríkisstjórn heims, Íran,þá vara þær Þorgerður og Katrín við stigmögnun stríðsins og krefjast samninga við Írani þrátt fyrir að þeim sé báðum ljóst að Íransstjórn er sönn að sök um að hafa svikið og logið við samningaborðið í rúman áratug. Var þá ekki eðlilegra að lýsa yfir stuðningi við réttmætar varnaraðgerðir Ísrael og Bandaríkjanna til að koma í veg fyrir frekari hryðjuverkaárásir þessa þursaríkis. Nei það datt þeim ekki í hug.

Furðulegt að það skuli hafa farið framhjá þessum konum, að besti bandamaður sem Ísland á og hefur átt frá lýðveldisstofnun eru Bandaríkin. Okkar hagsmunir felast í því að vera í sem bestum tengslum við þau og fráleitt að utanríkis- og forsætisráðherrar skuli ekki lýsa yfir óskilyrtum stuðningi við réttmætar hernaðaraðgerðir Bandaríkjanna og Ísrael gegn Íran. 

Þjónkun við Evrópusambandið glepur. Þær vilja samsama sig með þeim aumingjadómi og úrræðaleysi, sem þar viðgengst. Vafalaust finnst þeim gaman að sitja með strákunum í Brussel á endalausum fundum um ekki neitt.

Er ekki kominn tími til að þær Kristrún og Þorgerður marki utanríkisstefnu í samræmi við hagsmuni Íslands, en láti skálaglamrið í Brussel lönd og leið. Þar er hvort eð er engin sem mundi koma okkur til hjálpar ef á okkur yrði ráðist.    

Kolbrún Berþórsdóttir skrifar iðulega ágæta pistla. Stundum bera fyrirframskoðanir hennar eða tilraunir til að halda sig á kratískri línu með "góða fólkinu" þó ágætið ofurliði eins og sést í pistli hennar í Mbl.

Þar fjallar hún réttilega um ofstæki og ofbeldi fámenns hóps Palestínuvina, sem hikar ekki við að vanvirða þjóðhátíðardaginn með hrópum og köllum.

Eftir að hafa sagt sannleikann um Palestínuvinina, þurfti pistlahöfundur að sýna jafnvægislist kratískrar meðalmennsku og vísaði þá til hópsins "Þvert á flokka". Í tilraun til að viðhalda trúnaði "góða fólksins" skjöplast pistlahöfundinum svo alvarlega að hún verður viðskila við sannleikann og dregur ályktanir á röngum forsendum. 

Í fyrsta lagi segir hún að fámennur hópur hafi verið á Austurvelli þegar mótmælafundur "Þvert á flokka" var að byrja. Þetta er rangt mótmælafundurinn var vel heppnaður og meira fjölmenni á fundinum en almennt á mótmælafundum á Austurvelli og tíu sinnum fleiri en á fundum Palestínuvina.

Í annan stað að hópurinn segi ranglega,að meirihluti þjóðarinnar fylgi okkur. Í þessu tilviki vill svo vel til að tvær nýlegar skoðanakannanir sýna yfirgnæfandi meirihluta við þau sjónarmið, sem samtökin "Þvert á flokka" berjast fyrir. 

Þá heldur hún því fram að þessi hópur segi að landamærin séu galopin, en svo sé vitanlega ekki. Nú vill svo til að ég var ræðumaður á þessum útifundi þar sem mér sýndist yfir 1000 manns vera mætt og talaði um að öflugur lögreglustjóri á Suðurnesjum hefði tryggt landamæragæslu tímabundið og þessvegna hefði hann þurft að taka pokann sinn. Staðhæfing pistlahöfundar er röng. En við viljum mun öflugri landamæragæslu sem er annað mál.

Þá heldur pistlahöfundur því fram að okkur sé sérstaklega uppsigað við múslima. Þetta er líka rangt. Okkur er ekki uppsigað við múslima. Hins vegar verður að segja sannleikann um landnám þeirra í Evrópu og hvaða vandamál fylgja. 

Samtökin þvert á flokka berjast fyrir varðveislu íslenskrar tungu og menningar og vilja m.a. herta landamæragæslu til að þeim meginmarkmiðum verði náð. Við mætum með íslenska fánann á fundi,sem gunnfána fyrir þær hugsjónir sem við berjumst fyrir. Þær eru ekki rasískar, þær tengjast ekki litharhætti eða trúarbrögðum. Í hverju fellst þá ofstækið sem pistlahöfundurinn bregður okkur um? Raunin er að það er ekki til staðar heldur eðlileg málefnaleg þjóðfélagsbarátta.

Ég get verið sammála pistlahöfundi um, að það sé óráð að kæra utanríkisráðherra fyrir landráð. Það var verulega misráðið, en því fer fjarri, að það fólk sem að því stendur sé ofstækisfólk eðlilegra að kalla það einlæga þjóðvini, sem ég á fulla samstöðu með að öðru leyti en því að mér finnst misráðið að ætla að færa stjórnmálabaráttuna inn í réttarsali.