Hættustig og gapuxaháttur

Ríkislögreglustjóri hefur lýst yfir hættustigi á landamærunum vegna mikils fjölda hælisleitenda sem streyma til landsins. Í flestum löndum mundu stjórnvöld bregðast hratt við til að tryggja örugga stjórn á landamærunum svo hættustig verði fellt úr gildi. Þrátt fyrir að dómsmálaráðherra sé reiðubúinn til að gera breytingar þá fær hann ekki stuðning í ríkisstjórninni til að gera nauðsynlega og skynsamlega hluti. 

Hættustigi er ekki lýst yfir nema innflytjendamálin séu í alvarlegri stöðu. Það kemur þó sumum lukkuriddurum á Alþingi ekki við m.a. þingmönnum Viðreisnar og Pírata, sem héldu því fram í umræðum á Alþingi í gær, að Jón Gunnarsson dómsmálaráðherra væri með hræðsluáróður. Þetta fólk er annað hvort úr vitrænu sambandi við samfélagsástandið eða hefur ekki fylgst með fréttum í áravís og kemur á óvart þar sem einn þeirra sem þessa tuggu tugði á Alþingi er fyrrum fréttamaður á RÚV.

Í grein sem Bergþór Ólafsson þingmaður Miðflokksins skrifar í Morgunblaðið í dag bendir hann á, að við erum að taka á móti 66% fleiri hælisleitendum en Þjóðverjar gerðu árin 2015 og 2016. Það asnastrik Angelu Merkel var næstum búið að ríða þýsku velferðarkerfi og samélaginu á slig og eyðilagði það sem eftir lifði af pólitískum valdaferli hennar.

Þjóðverjar lærðu þá, að stefna opinna landamæra eða hálfopinna gengur ekki upp. Hún er ógn við velferð og öryggi borgaranna. 

Hér á landi er eins og stjórnmálastéttin fylgist ekki með fréttum og hafi engan skilning á því hvað er að gerast í okkar eigin landi og geti ekki áttað sig á hvernig nágrannalöndin hafa brugðist við í málefnum hælisleitenda. 

Jón Gunnarsson dómsmálaráðherra hefur átt við ramman reip að draga þegar hann hefur viljað koma vitrænum tillögum fram í hælisleitendamálum og skemmst er að minnast, að völdin voru tekin af honum af forsætisráðherra með samþykki formanns Sjálfstæðisflokksins, þegar hann ætlaði að framfylgja lögum um að flytja ólöglega hælisleitendur úr landi í samræmi við íslensk lög. 

Látum vera þó að einstakir þingmenn gerist gapuxar í umræðum á Alþingi, en þegar meirihluti ríkisstjórnar ákveður að bregða ítrekað fæti fyrir skynsamlegar og bráðnauðsynlegar tillögur dómsmálaráðherra, þá er ekki von á góðu. Þjóðina á skilið betri ríkisstjórn. 

 

 

Flóttamannabúðir

Meira en 3 þúsund beiðnir fólks um alþjóðlega vernd, þ.e. mismunandi löglegra og ólöglegra innflytjenda hafa borist á árinu 2022. Talsmaður Rauða Krossins í þessum málum segir að e.t.v. þufi að koma upp flóttamannabúðum (notaði fínna orð.) 

Neyðarkallið kemur ekki á óvart. Við erum með gölnustu stefnu í innflytjendamálum í allri Evrópu. Eðlilega eykst því straumur fólks hingað í stöðugt auknara mæli eftir því sem kostir þrengjast fyrir gervihælisleitendur í öðrum löndum.  

Í haust mótmælti hópur ungs fólks í Reykjavík vegna skorts á dagheimilisplássum fyrir börn vinnandi fólk. Að hluta til stafa erfiðleikarnir af fjölgun hælisleitenda. Sama er varðandi húsnæðisskortinn. 

Á sama tíma og Kína tekur ekki við hælisleitendum og Saudi Arabar telja að flóttamannavandi í Arabíu komi þeim ekki við og þá ekki heldur Japanir, þá er pólitíska elítan á Íslandi svo snargalin, að telja að við séum Guðs útvalin þjóð, til að taka við hvaða hlaupastrák sem vera skal á kostnað skattgreiðenda.  

Ríkisstjórnin stefnir að því lóðbeint með hælisleitendadekri sínu að gera lífskjörin í landinu verri og svipta Íslendinga aðgangi að  grunnþjónustu. 

Samþykkja kjósendur það að stjórnmálaelítan haldi áfram að skaða lífskjörin í landinu með þessari gölnu stefnu í málefnum útlendinga.  

 

Sænskir sósíalistar sýna sitt rétta andlit

Vel til fundið hjá sósíalistum í Svíþjóð, að halda lokafund kosningabaráttunnar í Rinkeby hverfinu í Stokkhólmi. Þar hamaðist forsætisráðherran að Svíþjóðardemókrötum og kallaði þá öllum hefðbundnum illum nöfnum. Hún minntist hins vegar ekki á, að í Rinkeby hverfinu eru fjölmargir íbúar, í tengslum við Hamas, Hezbollah, Abu Nidal o.fl. hryðjuverkasamtök Íslamista og fannst allt í lagi að vera í samneyti með þeim.

Sósíaldemókratar eiga mikið fylgi í Rinkeby hverfinu þar sem um 90% íbúa eru innflytjendur eða afkomendur innflytjenda. Svo margir Sómalar búa í þessu hverfi, að það hefur stundum verið uppnefnt litla Mogadishu. Óeirðir eru tíðar í hverfinu, mikið um glæpi og eignaspjöll. Ráðist var ítrekað á lögreglustöðina og þegar byggja þurfti nýja,  neituðu verktakar að fara inn í hverfið nema að fá lögregluvernd. 

Í þessu umhverfi virðist sósíalistum í Svíþjóð líða best enda eiga þeir mest fylgi þar sem innflytjendur eru flestir. 

Það er dapurlegt að horfa upp á þessa miklu hnignun og þjóðfjandsamlegu stefnu sænskra sósíalista. Vonandi bregðast kjósendur við með að kjósa þá ekki, en greiða þess í stað Svíþjóðardemókrötunum og Moderata Samlingspartiet atkvæði sitt. 

Svíþjóðardemókratar hafa heldur betur unnið til þess, að Svíar veiti þeim öflugt brautargengi. Þeir hafa verið rödd skynseminnar í innflytjendamálum og mátt þola útilokun stjórnmálastéttarinnar og fjölmiðla, en hafa samt aukið fylgi sitt í hverjum kosningum og vonandi gengur það eftir í dag. 

Svíþjóð þarf að skipta um stefnu í innflytjendamálum og huga að hagsmunum sænskra borgara, eflingu sænskrar menningar og þjóðlegra gilda. Raunar er brýn nauðsyn að Ísland geri það líka ef þeir vilja komast hjá að lenda í sama öngþveiti og Svíar.

Undir stjórn sósíalista þar sem innflytjendastefnu þeirra hefur verið framfylgt og ekki má segja frá neinu sem þá varðar, hefur glæpatíðni aukist gríðarlega, fjöldi nauðgana er hlutfallslega mest í Svíþjóð í veröldinni, mörg hverfi eru lokuð innflytjendahverfi og skotárásir eru orðnar daglegt brauð í þessu áður fyrirmyndarríki. 

Vonandi sjá sænskir kjósendur að það þarf gjörbreytta stefnu í innflytjendamálum, stefnu þar sem hagsmunir sænskra borgara eru í öndvegi.

 

Tjaldað til einnar nætur

Þegar nokkur sveitarfélög sömdu við ríkið um móttöku ólöglegra innflytjenda, töldu sveitarstjórnarmenn sig vera að gera góða samninga og peningar streymdu í bæjarsjóð. 

Þau lögðust á árar ásamt ýmsum öðrum skammtíma hagsmunaaðilum, við að troða sem flestum ólöglegum innflytjendum inn í landið og verja gjörsamlega galna stefnu um opin landamæri. 

Að því hlaut að koma að þessi stefna gengi ekki upp. 

Staðan er sú að þeir sem koma til landsins ólöglega eru komnir til að vera og er nánast aldrei vísað burt og jafnvel þó að dómar hafi fallið um að þeir séu hér ólöglega halda þeir samt styrkjum frá ríkinu, sem er ekkert annað en fráleit og siðlaus meðferð á almannafé.

Sveitarfélögn tjölduðu til einnar nætur og eru nú að uppskera eins og þau sáðu. Kostnaður við hælisleitendur er óendanlegur. 

Svo furðar fólk sig á því að það sé skortur á íbúðarhúsnæði, heimilislæknum, dagheimilum, skólum o.s.frv. og setur það almennt ekki í samband við þann fjölda, að hælisleitenda, sem streymir til landsins og allt fólk þarf almenna þjónustu. 

Hvernig stendur á því að það er ekki meirihluta vilji fyrir því á Alþingi að taka upp svipaða stefnu í innflytjendmálum og Danir hafa tekið upp. Af hverju viljum við hafa greiðustu leiðina fyrir innflytjendur til okkar. Hún þýðir bara það eitt, að við fáum ekki lengur við neitt ráðið svipað og bæjarstjórn Hafnarfjarðar hefur nú áttað sig á. 

Alþingi verður að breyta lögum um innflytjenda- og hælisleitendamál þannig að þau veiti ólöglegum innflytjendum eða svonnefndum hælisleitendum ekki greiðari leið til velferðarkerfisins á Íslandi en nágrannalanda okkar. 

Það verður fróðlegt að fylgjast með störfum Alþingis í þessum málum í vetur og sjá hvort meirihlutinn vill standa með þjóð sinni og velferð hennar eða halda áfram á þeirri braut opinna landamæra, sem kostar gríðarlega fjármuni og það er bara byrjunin með óbreyttri stefnu. 

 

 

 

Innviðir sprungnir

Með íslenska ríkisborgararétt

Alvarlegt kynferðisafbrot var framið í Stokkhólmi af karlmanni með íslenskan ríkisborgararétt eins og segir í fréttinni.

Hvað þýðir það, þegar fréttamiðlar segja að maður sem hafi gerst sekur um glæp, sé með íslenskan ríkisborgararétt. Almennt, að hann sé af erlendu bergi brotinn. Af hverju má ekki segja hvort svo er. Af hverju þarf alltaf að reyna að fela staðreyndir fyrir almenningi. 

Stundum getur þögn um mikilvæg atriði verið liður í að halda staðreyndum leyndum.  

Íslendingur grunaður um pyntingar og kynferðisbrot

Ég heiti Njálgur Bucksson

Lífseigt furðufyrirbæri í íslenskri stjórnsýslu er Mannanafnanefnd, sem starfar skv. lögum um mannanöfn. Þar segir m.a. að heimil mannanöfn skuli geta tekið íslenskri eignarfallsendingu eða hafa unnið sér einhverskonar hefð. 

Í dag var greint frá því að mannanafnanefnd hefði m.a. samþykkt nöfnin Buck og Worms auk ýmissa annarra nafna, sem vandséð er að hafi einhver tengsl við íslenska nafnhefð eða taki íslenskri eignarfallsendingu nema við skýrum það svo rúmt, að nöfn eins og Barthomolew, Schweitzer og Buckminster geri það líka.

Hvaða vitræna glóra er fólgin í því að viðhalda þessu miðstýrða nafnakerfi á Íslandi í dag. Væri ekki rétt að láta af stjórnlyndinu og láta foreldrum það eftir að ákveða  nöfn barna sinna. Margt annað er mikilvægara til verndar íslenskunni og aðlögun erlendra ríkisborgara að íslensku samfélagi.

Hver á að stjórna ferðinni?

Rishi Sunnak keppir um formannsstólinn í Íhaldsflokknum breska við Liz Truss. Bæði hafa lýst svipuðum sjónarmiðum varðandi hælisleitendur og nauðsyn aðgerða og breyttra vinnubragða. Þau eru sammála um að Bretar verði að stjórna ferðinni en ekki utanaðkomandi aðilar eða stofnanir af því að Bretar séu fullvalda ríki sem beri að taka ákvarðanir á þeim grundvelli.

Fjölskylda Rishi Sunnak flutti til Bretlands fyrir 60 árum og  þekkir hvað það er að vera innflytjandi. Sunnak setti fram greinargóða stefnu í þessum málum fyrir nokkru.

Við verðum að stjórna landamærununum segir Rishi Sunnak og takast á við flóð ólöglegra innflytjenda það er eitt mikilvægasta málið. Núverandi kerfi er ónothæft.

Ég mun koma á grundvallarbreytingum og þrengja skilgreiningu á því hverjir þurfa á alþjóðlegri vernd að halda í samræmi við samþykkt um flóttafólk frekar en skilgreiningar ECHR (Mannréttindadómstóll Evrópu). Þær breytingar munu koma í veg fyrir að hver sem kemur til landsins geti dvalið hér.

Mannréttindadómstóllinn er hindrun sem ég mun takast á við. Við ákváðum að fara úr Evrópusambandinu svo við yrðum fullvalda ríki. Mannréttindadómstóllinn getur ekki takmarkað möguleika okkar á að hafa fulla stjórn á landamærunum og við eigum ekki að leyfa honum það. Við þurfum að setja inn góðan skammt af heilbrigðri skynsemi inn í þetta flóttamannakerfi. /(Greinilegt að hann telur (og það með réttu) slíka skynsemi ekki að finna í úrlausnum Mannréttindadómstóls Evrópu)

Ég er sammála þeirri leið sem var valin af ríkisstjórninni með því að senda hælisleitendur til Rúanda meðan fjallað er um mál þeirra segir Sunnak, en sú leið verður að virka. Það gengur ekki að við eyðum peningum skattgreiðenda til að hýsa ólöglega innflytjendur á hótelum. Við verðum að hafa frelsi til að senda erlenda glæpamenn og þá sem uppfylla ekki skilyrði fyrir alþjóðlegri vernd heim til sín.

But basic human decency must be accompanied with hard-headed common sense. (Grundvallar mannlegu velsæmi verður að fylgja rökföst almenn skynsemi).

Sérkennilegt að engin íslenskur þingmaður (e.t.v. þrjár undantekningar) skuli tala með þessum hætti eða ljá þessum þanka lið eða gera sér grein fyrir að hér er um mikilvægt alvörumál að ræða, sem takast verður á við. Íslenska stjórnmálastéttin neitar að taka þessi mál til skynsamlegrar skoðunar og hefur nánast öll tekið upp Píratíska hugmyndafræði varðandi þessi mál þ.á.m. því miður stór hluti þingflokks Sjálfstæðisflokksins.

Þessvegna m.a. flæða milljarðarnir stjórnlaust úr íslensku ríkisfjárhirslunni.

Auðvitað ljúga þeir

Fésbókarfærsla vararíkisssaksóknara um hælisleitendur sem gera sér upp kynhneigð er af mörgum talin óviðurkvæmileg. Samtökin 78 eru meðal þeirra og ætla að kæra hann. Fróðlegt væri að vita hvað hann hefur gert á hluta samtaka og hvernig kæran hljóðar.

Ummælin voru: Auðvitað ljúga þeir. Flestir koma í von um meiri pening og betra líf. Hver lýgur sér ekki til bjargar? Þar fyrir utan er einhver skortur á hommum á Íslandi?

Vararíkissaksóknari hefur bent á rannsóknir lögreglu sem sýna að sumir,sem hafa fengið alþjóðlega vernd sem samkynhneigðir hafi síðan verið kærðir fyrir kynferðisbrot gagnvart konum. 

Hvað svo sem líður kynferðisbrotum gegn konum af hálfu þessara "samkynhneigðu karla" sem fengu alþjóðlega vernd vegna kynhneigðar, þá sýnir þetta að ummæli vararíkissaksóknara um að menn ljúgi sér til bjargar eiga rétt á sér. 

En svo kemur hortitturinn í færslunni. " er einhver skortur á hommum á Íslandi" Þetta hefur verið gert að aðalatriði. 

Segjum sem svo, að vararíkissaksóknari hefði verið að fjalla um þá sem koma frá íslömsku ríkjunum og þykjast vera kristnir og fá alþjóðlega vernd á þeim grundvelli en reynast síðan vera römmustu íslamistar. Það sama á við þá þ.e. að þeir eru að ljúga til að komast inn í landið eins og sumir þeirra sem segjast vera samkynhneigðir. 

Hefði svo vararíkisaksóknari bætt við " er einhver skortur á kristnu fólki á Íslandi."  Samskonar ummæli sem eiga við  í báðum tivikum, annarsvegar er verið að gera sér upp kynhneigð en hinsvegar trúarskoðanir ranglega. Hefði þá verið einhver grundvöllur fyrir þjóðkirkjuna að kæra vararíkissaksóknara? Að sjálfsögðu ekki og engum þar á bæ hefði dottið það í hug.

Svo illa vildi til að vararíkissaksóknari var á jarðsprengjusvæði þegar hann var að tala um að ekki væri skortur á hommum. En hefði ekki verið það hefði hann sagt það er nú heldur betur ekki skortur á kristnu fólki. 

Hvort sem það er vararíkissaksóknari eða aðrir í þessu teprulega samfélagi, þá þarf fólk jafnan að gæta orða sinna,en sérstaklega þegar vikið er að samkynhneigðum, enn betur þegar vikið er að múslimum og forðast eins og heitan eldinn að minnast nokkurn tímann á transara það virðist vera eitraðasta vilpan í vestrænni umræðu um þessar mundir. Svo eitruð að meira að segja mest lesni núlifandi bókarhöfundur heims er víða á bannlista fyrir að segja

"Það eru konur sem fara á túr".

En samtökin 78 innibyrða allt "öðruvísi" meira að segja BDSM og hefði því mátt ætla að þar á bæ léti fólk sér ekki bregða við ómerkilegan hortitt í umælum vararíkissaksóknara.

Sér er nú hver ósóminn

Fyrir skömmu samþykkti þingið í Georgíufylki í Bandaríkjunum, að kjósendur yrðu að framvísa persónuskilríkjum til að sanna á sér deili þegar þeir kæmu til að kjósa. Við höfum lengi búið við að þurfa að sanna á okkur deili þegar við komum að kjósa og finnst það ekkert óeðlilegt. 

Demókratar í Bandaríkjunum bregðast hins vegar ókvæða við berjast gegn og fordæma þessa lagasetningu í Gerorgíu og segja hana vera ómengaðan rasisma. Hvernig svo sem slík tenging verður réttlætt. 

Furðulegt að stjórnmálaflokkur eins og Demókratar geri allt til að koma í veg fyrir að kosningar fari fram með löglegum og eðlilegum hætti. 

En e.t.v. er það ekki furðulegt fyrst þeir kalla notkun persónuskilríkja rasisma og fordæma þá sem neita að viðurkenna að kynin séu þúsund eða fleiri og telja að öryggi borgaranna sé best borgið með því að leggja niður lögregluna. 

Vegferð þessa galna meirihluta Demókrataflokksins bíður vonandi versti kosningaósigur í kosningunum í nóvember þannig að þeir verði dæmdir til áhrifaleysis, jafnvel þó Joe Biden sé forseti, og það vonandi þangað til einhver skynsemdarhyggja nær aftur tökum á þessum stóra og fyrir margt löngu merkilega stjórnmálaflokki. 

Hinir ábyrgðarlausu

Þingmenn Flokks fólksins, Pírata, Samfylkingar og Viðreisnar telja, að þeir sem komu hingað ólöglega á tímum Kóvíd og þóttust ranglega eiga rétt á alþjóðlegri vernd, sbr. niðurstöðu kærunefndar útlendingamála, skuli samt fá verndina, sem þeir eiga ekki rétt á. Þingmennirnir hafa flutt frumvarp til breytinga á lögum um útlendinga til að þessir ólöglegu hælisleitendur fái að halda áfram að vera á framfæri skattgreiðenda.

Fólkið, sem um ræðir hefur verið á framfærslu íslenskra skattgreiðenda frá því það kom og er það enn þrátt fyrir að því hafi verið vísað úr landi. Það er eitt af því sem er óafsakanlegt í þessu kerfi, að skattgreiðendur skuli látnir halda áfram að borga fyrir fólk, sem á engan rétt á alþjóðlegri vernd eða vera í landinu yfirhöfuð. Eðlilegt væri að greiðslur til þeirra féllu niður sama dag og niðurstaða kærunefndar útlendingamála liggur fyrir. Kostnaður skattgreiðenda við hvern ólöglegan hælisleitenda er um 500.000 krónur á mánuði.

Þingmenn Flokks fólksins sjá ekkert athugavert við þessa sóun á almannafé, sem hefði t.d. mátt nýta til að draga úr fátækt í landinu eða annarra þjóðþrifa verkefna. Opnun landamæranna er eftirsóknarverðari kostur að þeirra mati.

Þegar ólöglegu hælisleitendunum er gert að fara úr landi, krefjast þingmenn ofangreindra fjögurra þingflokka þess, að þrátt fyrir að viðkomandi eigi engan rétt, þá skuli þeir samt fá hana og vera áfram í landinu á kostnað skattgreiðenda. 

Í greinargerð með frumvarpinu segir: 

"Hvað sem því líður telja flutningsmenn að umsækjendur, sem ekki hafa orðið við beiðni lögreglu um að mæta í PCR próf verði ekki taldir bera ábyrgð á töfum á máli sínu."

Hver ber þá ábyrgðina? Guð almáttugur eða austanvindurinn?

Hvernig geta þingmenn fjögurra stjórnarandstöðuþingflokka með mannvitsbrekkuna Þorgerði Katrínu Gunnarsdóttur, lögfræðing, formann Viðreisnar í forsvari sett frá sér annað eins bull?

Vegna Kóvíd ráðstafana var ekki hægt að koma ólöglegum hælisleitendum frá landinu nema þeir færu í PCR próf. Það neituðu þeir að gera til að ekki væri hægt að flytja þá burt. Þingmenn hins nýja fjórflokks segja, að samt beri ólöglegi hælisleitandinn enga ábyrgð.  

Þingmenn með sama hugsunarhátt og þeir sem flytja frumvarp þetta komu í veg fyrir að stjórnvöld gætu gripið til aðgerða m.a. þeirra að þvinga ólöglega hælisleitendur í próf eins og PCR próf eða sæta rannsókn varðandi aldur. Samt skulu skattgreiðendur einir  að bera alla ábyrgð og taka beri réttarvörslukerfi landsins úr sambandi vegna þessa fólks, sem átti aldrei neinn rétt en hefur kostað skattgreiðendur milljarða króna, að mati þingmanna hins nýja fjórflokks.

Flokkarnir fjórir reyna enn sem fyrr að fiska í gruggugu vatni, en með því gera þeir sig ómerkilega og vega að grunnstoðum þess réttarvörslukerfis sem við búum við en ekki bara það. 

Sama krónan verður ekki notuð tvisvar og þeir ólöglegu hælisleitendur sem þráast við að fara úr landi, taka upp pláss þeirra sem raunverulega eru í neyð. Til að kerfið virki fyrir þá sem eru í neyð verður að fara að lögunum og þingmenn þingflokkana fjögurra eru ekki að gera neitt annað en samsama sig með smyglhringjum sem koma ólöglegum hælisleitendum til landa Evrópu og þjálfa þá í að bregðast við spurningum stjórnvalda. Kristna fólkið í Miðausturlöndum sem býr við hvað verstu kjörin og mestu ofsóknirnar eru ekki í þeim hópi sem smyglararnir færa á milli landa, heldur aðallega hlaupastrákar um 90% ungir karlmenn og það er fyrir þennan hóp sem þingflokkar Viðreisnar, Flokks fólksins, Samfylkingar og Pírata vilja opna landamærin og láta skattgreiðendur halda áfram að greiða þeim meðlag upp á hálfa milljón á mánuði með hverjum einstaklingi og tryggja það að þúsundir komi í kjölfar þeirra.

Ef til vill á það best við þessa gæfulausu þingmenn að segja eins og Jón Hreggviðsson sagði forðum:

"Vont er þeirra ránglæti en verra er þeirra réttlæti."