Ríkisstjórnin ætlar ekkert að gera fyrir skuldara

Árni Páll Árnason félagsmálaráðherra sagði á Rás 2 í morgun aðspurður um hvað ríkisstjórnin ætlaði að gera fyrir skuldsett fólk, að það yrði að snúa sér til bankanna sinna. Með öðrum orðum þýðir það að ríkisstjórnin ætli ekkert að gera.

Stökkbreyttir höfuðstólar lána sem hafa hækkað vegna gengishruns og efnahagshruns eiga þá að mati ríkisstjórnarinnar að vera á ábyrgð fólks sem vildi fjárfesta í íbúðarhúsnæði.  Á sama tíma og verið er að fella niður milljarða skuldir þeirra sem ollu hruninu og þeir halda fyrirtækjunum sínum er verið að auglýsa þúsundir íbúða á nauðungarsölu. Það er vegna þess að höfuðstólar lánanna hafa hækkað gríðarlega á meðan verð eignanna hefur lækkað.

Ríkisstjórn sem vill ekki horfast í augu við skuldavanda heimilanna og gera nauðsynlegar aðgerðir til að koma í veg fyrir að stór hluti landsmanna verði eignalaus og skuldum vafinn verður að fara frá. Það var tímabært fyrir hrun að afnema verðtryggingu lána og það var réttlætismál við hrun að leiðrétta gengisbundnu lánin.  Svona óréttlæti gagnvart venjulegu fólki gegnur ekki.

Athugasemdir

[Jakob Þór Haraldsson, 10.2.2010 kl. 10:02]

Kæri Jón frá byrjun var mér ljóst að þessi ÖMURLEGA & stórhættulega ríkisstjórn ætlaði EKKERT að gera fyrir almenna skuldara.  Þeir tóku ekki í mál að koma fram með "smá leiðréttingu".  Þú segir m.a: "Árni Páll Árnason félagsmálaráðherra sagði á Rás 2 í morgun aðspurður um hvað ríkisstjórnin ætlaði að gera fyrir skuldsett fólk, að það yrði að snúa sér til bankanna sinna. Með öðrum orðum þýðir það að ríkisstjórnin ætli ekkert að gera."  Ég stakk upp á því fyrir rúmum 15 mánuðum að stjórnvöld myndu skipa bönkum að veita t.d. öllum þeim ábyrgðarmönnum sem lenda í að greiða skuldir annara 25-30% afslátt.  Mjög sanngjörn & eðlileg lausn, en ríkisstjórnin tók það ekki í mál - svo kalla spunameistarar Samspillingarinnar þessa ríkisstjórn Norræna velferðastjórnin...lol....lol..!  Sem betur fer sjá nú allir íslenskir stjórnmálaFLokkar að Samspillingin er "ekki stjórntækur FLokkur".

kv. Heilbrigð skynsemi (fun.blog.is)

[Árni Gunnarsson, 10.2.2010 kl. 11:51]

Báðir vitum við það Jón að stjórnvöld hafa verið valdalaus hér að kalla, um langa sögu. Flestar pólitískar ákvarðanir eru teknar á forsendum fjámagns og þar með fjármagnseigenda. Stjórnsýslan vinnur sín störf daglangt og náttlangt í þeirri trú að hennar sé valdið en þar er mikill misskilningur á ferðinni. Forrit tölvunnar sem heita hinum ýmsu nöfnum og eru uppfærð vikulega af töframönnum segja til um niðurstöður og bankarnir eru helgustu dómar þessarar þjóðar.

Fjármálaráðherra Íslands heitir ekki Steingrímur J. Og sjávarútvegsráðherrann heitir ekki Jón. Og Árni Páll er svo þriðji nafninn.

Þeir eru alnafnar og heita Exel. 

[Ingibjörg Guðrún Magnúsdóttir, 10.2.2010 kl. 16:17]

Innilega sammála þér Jón, ljótt að sjá hvernig Ríkistjórnin er að fara með heimili landsmanna á kostnað þeirra sem hruninu ollu.

[Brjánn Guðjónsson, 10.2.2010 kl. 19:56]

já, einkennilegt. sér í lagi þegar fólk sem skuldar Íbó, sem er stór hópur, hefur engan banka til að snúa sér til. mér vitanlega er Íbó ekki banki, heldur sjóður rekinn af Árna Páli & co.

ríkisstjórnin hefur algerlega brugðist þeim væntingum sem fólk gerði til hennar. hefur verið hvað duglegust í að svíkja loforð og hækka álögur. skjaldborgin einungis gjaldborg. forsætisráðherra í endalausu fríi og Joð í raun hinn tæknilegi forsætisráðherra.

hins vegar, færi ríkisstjórnin frá, sé ég ekki hvað betra gæti tekið við. það gerir málið enn súrara. kúlulánakóngar- og drottningar í hverju horni.

[Jón Magnússon, 11.2.2010 kl. 11:32]

Já Jakob en hvar eru tillögur hinna flokkanna varðandi skuldavandann. Skuldavandinn er vegna séraðstæðna á íslenskum lánamarkaði og það er það misgengi sem verður að leiðrétta. Athyglivert að Ögmundur Jónasson var spurður að þessu sama í gær hvað hann vildi gera varðandi skuldavanda heimilanna. Eftir að hafa sett á 5 mínútna ræðu til loka þáttarins tókst honum að segja ekki neitt og koma ekki með eina einustu tillögu. Svona eiga verkalýðsleiðtogar að vera.

[Jón Magnússon, 11.2.2010 kl. 11:35]

Alla vega virðist vald þeirra ráðherranna vera lítið og svo virðist sem forsætisráðherra fái helstu tíðindi í landsmálum í fréttum fjölmiðla. Það er verðugur þanki Árni og athugunarefni hvar valdið liggur í raun og veru í þjóðfélaginu.  Svo virðist sem huliðshönd haldi sinni verndarhendi yfir milljarðaskuldurunum og tryggi þeim áframhaldandi völd og áhrif í hrunadansinum.

[Jón Magnússon, 11.2.2010 kl. 11:36]

Þakka þér fyrir Ingibjörg. Það er satt að segja alveg óþolandi að horfa upp á þetta.

[Jón Magnússon, 11.2.2010 kl. 11:37]

Þetta er góð athugasemd Brjánn og fínt innlegg með Íbúðarlánasjóð. Þetta baráttumál fyrir réttlátu lánakerfi hefur því miður ekki ratað vel inn í sali Alþingis óháð flokkum. Athugaðu að verkalýðshreyfingin hefur aldrei verið til viðtals um að afnema verðtrygginguna.