Persónuleikalausar kosningar

Óskaplega er leiðinlegt að fylla út kjörseðilinn við kosningar til stjórnlagaþings. Fjórar tölur í fyrsta reit og síðan koll af kolli og maður man ekki lengur hvaða persóna stendur á bak við töluna þegar  neðar dregur á kjörseðilinn. Kosningin er persónuleikalaus og vekur upp minningar úr framtíðarskáldsögum þar sem einstaklingurinn er aukaatriði.

Umbúnaður þessara kosninga er allt annað en það sem kjósendur þekkja og skilja. Í stað þess að kjósa einstaklinga og fylgja hefðbundnum talningareglum um að sá sem fær flest atkvæði í fyrsta sæti er kosinn og sá sem fær flest atkvæði í fyrsta og annað sæti er kjörinn o.s.frv. var búið til kerfi sem er illskiljanlegt  öðrum en innvígðum. Hætt er við að það valdi  því að vilji kjósandans komi síður til skila en fengi kjósandinn að kjósa á grundvelli þeirra leikreglna sem hann þekkir og skilur.

Ég vona að þetta verði fyrstu og síðustu kosningarnar þar sem kjósandinn þarf að lúta lögmálum stjörnustríðsmyndanna þar sem Svarthöfði stjórnar,  en í framtíðinni geti kjósandinn kosið einstaklinga á grundvelli þeirrar germönnsku nafnhefðar sem við höfum tileinkað okkur í landinu í meir en þúsund ár.

 

Athugasemdir

[Einar Björn Bjarnason, 27.11.2010 kl. 13:28]

Gera eins og ég gerði, að mæta með útprentað blað með mynd - nafni og tölum.

Nota það svo til hliðsjónar.

Í þetta sinn kaus ég á grundvelli útgefinnar stefnu frambjóðanda, valdi tiltekna megináherslu og valdi fólk skv. því.

Síðan verður að koma í ljós hve margir af þeim sem fylgja þeirri tilteknu hugmynd, ná kosningu.

Kv.

[Jenný Stefanía Jensdóttir, 27.11.2010 kl. 17:21]

Sæll Jón,

Kjósendum hefði átt að vera gefið tækifæri að prenta út listann sinn sjálft, mæta með hann í kjörklefann.  Í kjörklefanum væri stimpill, sem staðfestir að kjósandinn sé að kjósa þennan fyrirfram útprentaða lista og jafnframt kæmi í veg fyrir hugsanlega misnotkun og/eða svindl.

Sammála þér að skráning þessara talna, var ekki skemmtileg.

[Haraldur Rafn Ingvason, 27.11.2010 kl. 22:36]

Óskaplega er skemmtilegt að fylla út kjörseðilinn við kosningar til stjórnlagaþings. Maður hefur nefnilega komist að því að þarna úti er mýgrútur af bráðvel gefnu fólki sem virðist hafa raunverulegan áhuga á að yfirfara grunnsáttmála þjóðarinnar og færa til betri vegar galla þá sem kunna að vera á honum. Maður hugsar með sér - loksins eitthvað af viti.

Síðan er fyrirkomulagið spennandi og jafnframt frábær prufukeyrsla á stóru persónukjöri - sem er það sem gæti tekið við eða staðið til hliðar við hefðbundið flokkakjör. Svolítið vesen vissulega, en lýðræði er vesen - hellings vesen og á að gera kröfur til kjósenda.

Ég vona að þetta verði fyrstu kosningarnar í nýrri kosningahefð sem byggir á því að einstaklingurinn hafi, í sem flestum málum, tæki í höndunum til að beita raunverulegu lýðræði s.s. við alþingiskosningar.   

[Jón Magnússon, 27.11.2010 kl. 23:30]

Já Einar þú vandar til verka í þessu sem öðru. Ég mætti bara með kjörseðilinn útfylltan nokkru fyrirfram.

[Jón Magnússon, 27.11.2010 kl. 23:31]

Já Jenný ég er alveg sammála þér, en það mundi eyðileggja þann grunn sem háskólaspekin, sem stjórnar þessum kosningum eru búinn að leggja til mikillar óþurftar.

[Jón Magnússon, 27.11.2010 kl. 23:34]

Ég er sammála þér með það Haraldur að það er mýgrútur af bráðvelgefnu fólki í framboði, fólki sem á erindi í þjóðmálabaráttuna. En ég er ósammála þér hvað fyirrkomulag kosninganna varðar. Talningareglurnar eru þannig að almennur kjósandi skilur þær ekki og ég tel að þær gefi ekki eins góða mynd af vilja kjósandans og venjulegar reglur varðandi persónukjör eins og t.d. viðgangast í prófkjörum flokkanna.

[Haraldur Rafn Ingvason, 28.11.2010 kl. 01:03]

Ég held nú að blessaður almenningurinn hafi verið búinn að ná því að atkvæðið efst á listanum væri það sem skipti mestu máli, hin gætu svo tikkað í kjölfarið. Hins vegar er þetta ákveðin tilraun og ef þetta kerfi þykir ekki virka vel (etv. vegna fjölda frambjóöenda) þá má taka upp eitthvað annað í staðinn næst.

Annars er ekkert nýtt að kosningakerfi séu óskiljanleg okkur þessum sauðsvörtu, sbr. uppbótarþingmenn - flakkara - í alþingiskosningum...

[Gunnar Waage, 28.11.2010 kl. 02:57]

Ég tek undir þetta, sjálfur gleymdi ég gleraugunum heima þannig að þetta var bara fremur furðulegt að standa í þessu, gekk þó ágætlega

Ég verð þó að segja að þetta hefur varla verið til þess fallið að auka þáttökuna. Miðað við efnið sem virðist ekki vera allt of mikið inn á áhugasviði yngra fólks, flækjustigið, sem reyndar er svo sem ekkert en liklega nóg til að fæla einhverja frá.

Ég held að sniðugast væri bara að hver kjósandi kysi 1 frambjóðanda, ekki meira.

En nú verður fróðlegt að sjá hvort Jóhanna túlkar þáttökuna með þeim hætti eftir á að þingið sé ómarktækt og engin ástæða til að tala tillögur þingsins til greina?

Það væri eftir henni en ekki mjög viturlegt þó. Það eru uppi raddir um að kosningaformið hafi gagngert verið gert óaðgengilegt og því ætlað að fæla frá.

Eitt er víst að þessi ríkisstjórn er tilbúin að leggja ýmislegt á sig til fá að klára sín mál án neinna vífillengja. Margt af því sem kemur út úr þessu þingi eins og tillögur um þjóðaratkvæðagreiðslur eða hert ákvæði er varða Strandríkisréttindin munu hefta og slökkva á ESB umsókn.

[Guðmundur Júlíusson, 28.11.2010 kl. 03:27]

Ég  er ósammála ykkur, þetta er og var ákaflega einfallt mál að gera, ef að ykkur skuli hafa fundist þetta flókið, bendi ég ykkur og þér Jón Magnússon, á að finna ykkur annan vettvang en pólítík!!!

[Jón Magnússon, 28.11.2010 kl. 16:34]

Ég held að þetta kerfi virki aldei vel Haraldur. Það er auk heldur óréttlátt.

[Jón Magnússon, 28.11.2010 kl. 16:35]

Já en Gunnar það var Samfylkingin og Vinstri græn sem óðu áfram með málið og það var dyggilega ýtt á eftir þeim af vinstri sinnuðu háskólaelítunni.

[Jón Magnússon, 28.11.2010 kl. 16:37]

Ég sagði ekki að það væri flókið Guðmundur ég sagði að það væri persónuleikalaust og ruglaði kjósendur.  Ég var ekki sérstaklega að vísa til mín ef þú hefur lesið það eitthvað vitlaust Guðmundur þá ættir þú að velja þér eitthvað annað viðfangsefni en að gagnrýna það sem aðrir segja.

[Gunnar Waage, 28.11.2010 kl. 17:44]

Mikið rétt Jón, vinstri menn fóru fram með þetta mál að það var fyrst og fremst popularismi. Nú þegar út í framkvæmdina er komið þá er lýðræði ekki endilega það þægilegasta sem getur hent þessa ríkisstjórn.

Við sjáum nú bara hve viðkvæmir menn eru fyrir ummælum forsetans á Bloomberg en þar er hann einungis að benda á þann eðlilega möguleika að Icesave málið fari fyrir þjóðaratkvæðagreiðslu.

Þegar verður búið að gangsetja hér eitthvert fyrirkomulag um þjóðaratkvæðagreiðslur sem krefst ekki aðkomu forseta þá þýðir það náttúrulega að dregið er úr starfshraða ríkisstjórna. 

Lýðræði er ekki endilega neitt þægilegt og einfaldar síður en svo afgreiðslu mála. Lýðræðið stuðlar að sátt.

Jóhanna og Steingrímur eru stjórnmálamenn sem þrátt fyrir allan fagurgala, eru bara af fráfarandi kynslóð (vonandi). 

[Jón Magnússon, 28.11.2010 kl. 20:32]

Já merkilegt hvað Steingrími var brugðið þegar hann gat átt von á því að fólkið fengi að segja hug sinn um nýjan Icesave samning. Versta við þau Jóhönnu og Steingrím er að þau virðast ekki hafa neina sýn á lausn verkefna ekki einu sinni frá degi til dags.