Egill Helgason réttlætir árásir og skemmdarverk

Egill Helgason starfsmaður Ríkisútvarpsins og Eyjunnar telur réttlætanlegt að ráðast að fólki og skemma eigur þess. Sá er munurinn á Agli Helgasyni og Hallgrími Helgasyni skáldi og rithöfundi, að Hallgrímur réðist að bifreið forsætisráðherra í tímabundinni geðsveiflu og baðst afsökunar og  telur það óhæfuverk, en Egill Helgason telur slík verk réttlætanleg.

Í bloggfærslu sinni á Eyjunni þ. 9.12.s.l. réttlætir Egill  fólskulegar árásir óeirðamanna á bifreið Karls Bretaprins þegar hann ásamt konu sinni voru á leið í leikhús. Í færslunni segir Egill

" Maður hefur lengi furðað sig á langlundargeði fólks í Bretlandi. Óvíða í Evrópu er jafnmikill ójöfnuður – óvíða hefur auðræðið náð slíkum tökum. En nú er ungt fólk farið að mótmæla. Og kannski er einmitt ágætt að hinn gagnslausi prins fái smá málningu á lúxusbílinn."

Fjölmiðlar á Bretlandi, jafnt sem leiðtogar stjórnar og stjórnarandstöðu hafa fordæmt atlöguna að krónprinsinum og talað um hana sem fólskulega og óafsakanlega.  En hinn "virti" þáttastjórnandi á Íslandi Egill Helgason telur hins vegar réttlætanlegt að ráðast á fólk m.a. vegna þess að það eigi peninga og sé gagnslaust að hans mati.

Er það virkilega svo að stjórnendur Ríkisútvarpsins telji það eðlilegt að hafa Egil Helgason áfram í vinnu þegar fyrir liggur að hann er andvígur því að virt séu mannréttindi fólks en telur þvert á móti eðlilegt og réttlætanlegt að á fólk eða eigur þess sé ráðist. 

Egill Helgason er greinilega ósammála viðmiðunum réttarríkisins um mannréttindi og mannhelgi. Það er því ekki tilviljun hvernig Egill Helgason hefur stjórnað pólitískum viðræðuþætti sínum.

Athugasemdir

[Hrólfur Þ Hraundal, 12.12.2010 kl. 13:33]

Ég efa að uppalandi og kynnir þeirra stjórnlagaþingsmanna sé meira að gagni en Karl Bretaprins.  Ætli sá fengi hrós sem skvetti málningu á bílinn hans.

[Brynjar (IP-tala skráð) 12.12.2010 kl. 14:39]

Að þú skulir nenna að þessu.

[Jón Magnússon, 12.12.2010 kl. 15:05]

Nei Hrólfur ég er ekki viss um að hann yrði jafn hrifinn ef þetta beindist að honum sjálfum. En Egill telur sig umkominn að dæma um það á hverja má ráðast og á hverja má skvetta málningu. 

[Jón Magnússon, 12.12.2010 kl. 15:07]

Nú skil ég ekki alveg Brynjar hvað það er varðandi það að nenna. Að sjálfsögðu nenni ég að benda fólki á það að maður sem situr í stól hlutleysisins í RÚV skuli telja rétt að saklaust fólk verði fórnarlömb vegna stöðu sinna eða auðæva.  Finnst þér ekki ástæða til að benda á slíkt?

[Flosi Kristjánsson, 12.12.2010 kl. 19:21]

Það er svolítið sérstakt að horfa upp á það að maður sem kominn er á sextugsaldur skuli tala eins og strákpjakkur í menntaskóla! Egill nýtur þess náttúrlega í þaula að "sjokkera" grandvara borgara.

[Jón Ríkharðsson, 12.12.2010 kl. 19:58]

Þetta er góður pistill hjá þér nafni. Ekkert réttlætir það að málningu sé skvett á bíla og að fólk verði fyrir barðinu á svona skrílslátum. Þeir sem gera svona hluti geta vart talist til siðaðra manna, allavega ekki á því augnabliki sem þeir fremja svona þvælu.

Ekki vil ég heldur að skvett sé málningu á bíl Egils Helgasonar, jafnvel þótt hann sé þessarar skoðunar, ef hann þá á nokkurn bíl.

Það er mjög alvarlegt mál að þáttastjórnandi hjá RÚV hagi sér með þeim hætti sem Egill gerir. Vissulega á hann að fá alvarlegt tiltal frá sínum yfirmönnum.

[Elle_, 12.12.2010 kl. 20:40]

Egill hefur ekki virt nein mannréttindi að ég viti, Jón, og hef löngum sagt að hann ætti að vera rekinn úr RUV OKKAR LANDSMANNA.  Hann hefur misbeitt veru sinni þar á okkar kostnað með endalausum Evrópuáróðri og Evrópusambandssinnum í flokkum þar.  Og ofan á það kallaði hann menn andvíga ICESAVE kúguninni gegn okkur ÖFGAMENN.  Ætli hann sé ekki sjálfur ÖFGAMAÐURINN??

[Gústaf Níelsson, 12.12.2010 kl. 22:26]

Af einhverjum ástæðum hefur Egill Helgason, í skjóli Rúv, breyst í makráðan og grunnhygginn plebba, sem telur sér allar leiðir færar. Ég er líkt og fjöldi annarra löngu hættur að nenna að lesa eftir hann eða horfa á Silfrið hans. Hins vegar horfi ég alltaf á Kiljuna, komi ég því við, og þykir hún með bestu þáttum í sjónvarpi nú um stundir. Það er vegna þess að gestir hans flestir eru áhugavert fólk og skemmtilegt.

[Jón Magnússon, 12.12.2010 kl. 23:48]

Já það er sjálfsagt rétt Flosi, en maður eins og hann sem vill láta taka sig alvarlega verður að gæta lágmarks háttvísi. Hann ætti að fara að eins og Hallgrímur Helgason og biðjast afsökunar á þessu og draga þetta til baka. Geri hann það ekki þá á hann sér litla málsvörn.

[Jón Magnússon, 12.12.2010 kl. 23:53]

Já Jón mér finnst það lágmarkið að hann fái alvarlegt tiltal, en hann verður líka að draga ummælin til baka og biðjast afsökunar á því að segja að það sé í lagi að ráðast á fólk og eigur þess ef það er ríkt og gegnir ekki sérstöku hlutverki að hans mati. Með sama mælikvarða mættu þeir sem telja Egil Helgason vera vondan þáttastjórnanda ráðast að honum. En þannig á það ekki að vera. Það eiga allir að njóta mannhelgi.  Hugsun lýðræðissinna sem vilja búa í vestrænu réttarríki byggir á því að grunngildi mannréttinda séu virt gagnvart öllum líka Agli Helgasyni og Karli Bretaprins. Egill Helgason ætti að hyggja að því en þess þó frekar Páll Magnússon útvarpsstjóri.

[Jón Magnússon, 12.12.2010 kl. 23:55]

Hann hefur alla vega hagað sér þannig frá bankahruninu Elle að það er ekki afsakanlegt að hann stjórni pólitískum umræðuþætti. Hann hefur ráðist á einstaklinga og málefni án grunnþekkingar á viðfangsefninu.

[Jón Magnússon, 12.12.2010 kl. 23:58]

Ekki veit ég það svo gjörla Gústaf hvort Egill hefur breyst í makráðan plebba. Mér hefur líkað vel við Egil, en það er eins og eitthvað hafi komið fyrir hann og mér virðist hann ekki allskostar vera með sjálfum sér nema í Kiljunni en þar nýtur hann sín oft. En jafnvel þó hann stjórnaði þessum þáttum sínum með aðdánalegum hætti þá gæti það ekki afsakað stuðning við öfgar og skemmdarverk.

[Valgeir , 13.12.2010 kl. 10:53]

Síðan hvenær breyttust stúdentamótmæli í skrílslæti. Málningaskvettur í árásir. 

Þarna var verið að mótmæla þreföldun á skólagjöldum námsmanna.  Ég man nú ekki betur en að einn núverandi ráðherra Samfylkingarinnar  hafi sjálfur tekið þátt í mótmælum á sínum yngri árum og jafnvel nokkrir sjálfstæðismenn sem voru í námi ytra.  Það voru kölluð stúdentamótmæli, en ekki skemmdarverk á sendiráði eða árás á sendiráðsstarfsmenn. 

Annars eru þessar árásir á Egil alveg furðulegar, og um leið má spyrja sig hverju sætir?   Eru umfjallanir hans um önnur mál það óþægileg að hvert einasta orð hans er skoðað með það að markmiði að bola honum úr starfi?  Skoðanir sem birtast ekki einu sinni á vef rúv eða í sjónvarpsþætti Egils á rúv.  Það er málfrelsi - með sömu rökum ættu Alþingismenn ekki að tjá egin skoðanir á málum.

Hann er ekki að hvetja til þess að ráðist sé á einn eða neinn.  Hann er að furða sig á langlundargeði Breta gagnvart fyrirbæri eins og konungsfjölskyldunni .   Það verður seint sagt að hún sé málsvari friðar svo ekki sé nú minnst á lítila manninn, svona í sögulegu samhengi.