Stjórnarskrá og þjóðaratkvæðagreiðsla

Borgarahreyfingin birtir heilsíðuauglýsingar í dagblöðum þar er krafist er þjóðaratkvæðagreiðslu um nýja stjórnarskrá. Valkostirnir sem þessi stjórnmálasamtök  bjóða kjósendum er að kosið verið á milli tillagna stjórnlagaráðs og hugsanlegra tillagna Alþingis komi þær á annað borð fram. 

En hvað á að gera komi Alþingi ekki með tilllögur. Um hvað á þá að kjósa? Þess er ekki getið í auglýsingunni og sýnir hversu ómarkviss þessi krafa er.

Hugmyndir Borgarahreyfingarinnar, Þorvaldar Gylfasonar og annarra sporgöngumanna þeirrar aðferðarfræði sem viðhöfð hefur verið við vinnu að nýrri stjórnarskrá byggjast á öðrum sjónarmiðum en þeim sem viðurkennd eru varðandi stjórnarskrá og stjórnarskrárvinnu í öðrum löndum í okkar heimshluta.

Þorvaldur Gylfason og fleiri hafa ítrekað krafist þess að hér verði sett ný stjórnarskrá óháð því hvort um hana ríkir sátt í þjóðfélaginu. Þetta er krafa um að hugsanlega lítill meiri hluti beiti afli sínu af fullum þunga í fullri andstöðu við nærfellt  helming þjóðarinnar.

Þetta er röng hugsun og í fullri andstöðu við hugmyndir manna um breytingar á stjórnarskrá í öðrum lýðræðisríkjum í norðanverðri Evrópu. Hugsun Borgarahreyfingarinnar og Þorvaldar Gylfasonar er meir í ætt við  hugmyndir sem voru uppi í árdaga Sovétríkjanna sálugu en landa eins og Noregs, Svíþjóðar og Danmerkur svo dæmi séu tekin.

Í því sambandi er gott að benda á hvernig Svíar fóru að varðandi breytingar á sinni stjórnarskrá. Þar var unnin vinna sem stóð í mörg ár og var unnin af fagaðilum ásamt fulltrúum helstu hreyfinga í samfélaginu. Niðurstaðan var síðan lögð fram og að fengnum athugasemdum og ábendingum var haldið áfram vinnunni og henni síðan skilað með þeim hætti, að fullkomin sátt ríkti um þær víðtæku breytingar sem Svíar gerðu á sinnin stjórnarskrá. Hér er krafan hins vegar sú að ófullbúnar og oft vanhugsaðar tillögur stjórnlagaráðs verði knúnar fram strax með afli meirihlutans.

Svipuð vinna og unnin var í Svíþjóð hefði þurft að fara fram hér og svona vinnu verður að vinna til að vitræn niðurstaða náist um breytingar á stjórnarskránni og um hana takist víðtæk og nauðsynleg sátt. Þannig vinnubrögð eru sæmandi og nauðsynleg í lýðræðis- og réttarríki til að skapa þá nauðsynlegu umgjörð um grundvallarréttindi borgarana sem stjórnarskrá er umfram annað ætlað að setja.

Athugasemdir

[Ómar Ragnarsson, 11.10.2011 kl. 13:29]

Það sem þú segir um nauðsyn mikillar vinnu og undirbúnings að gerð stjórnarskrár stangast á við það viðhorf að slíkt sé alltof dýrt og notað hefur verið sam aðalröksemd gegn því að gera nýja stjórnarsrká.

Bjarni Benediktsson taldi fyrr á þessu ári að gerð nýrrar stjórnarskrár væri lítið mál, -  þingið ætti að snara sér í þetta og afgreiða það snöfurlega og ódýrt. Hvers vegna gerir þingið það þá bara ekki?  Er það kannski vegna þess að það hefur ekki getað gert það í 67 ár?

Þess má geta að skoðaðar voru tugir erlendra stjórnarskráa í tengslum við gerð frumvarps Stjórnlagaráðs og á margt í því frumvarpi á rætur að rekja til sænsku og finnsku stjórnarskránna.

Rökin gegn verki Stjórnlagaráðs eru oftast þau að þetta hafi verið of dýrt. Þín rök virðast vera að þetta hefði þurft að vera miklu dýrara.

Ég var að vona að efnisleg rökræða um efni frumvarpsins fengist.

En menn virðast frekar vilja ræða um flest annað en það.

[Jón Magnússon, 11.10.2011 kl. 19:20]

Vinnan okkar í sambandi við breytingar á stjórnarskránni er þegar orðin hlutfallslega miklu dýrari en sú faglega og góða vinna sem Svíar unnu þegar þeir endurskoðuð sína stjórnarskrá. Því miður fóru stjórnvöld hér í vitlausa vegferð og þess vegna eru hlutirnir komnir í nokkuð óefni Ómar. Það er ekki þér að kenna Ómar, en þú verður að fyrirgefa ef ég ætti að velja milli tillögu ykkar og stjórnarskrárinnar sem fyrir er þá mundi ég velja þá sem fyrir er. Samt vil ég ákveðnar breytingar á stjórnarskránni. En það er ekki hægt að bullukollast með stjórnarskrána kæri vinur.

[Sleggjan og Hvellurinn, 13.10.2011 kl. 20:12]

Ef alþingi kemur ekki með stjórnarskrá þá verður kosið milli núverandi stjórnarskrá. Liggur það ekki í augum uppi Jón?

 Þau tóku það ekki fram í auglýsingunni því þetta hlítur að vera Common Sense