Er frostlögur í tannkreminu þínu?

Tannkrem er nauðsynlegt til tannhirðu. Colgate tannkrem hefur mesta markaðshlutdeild hér á landi og viðurkennd gæðavara.

Framleiðendur Colgate tannkrems er annt um orðstí sinn. Þess vegna skiptir máli að gæði framleiðslunnar séu ótvíræð.  Það er hagsmunamál framleiðenda neysluvara að enginn vafi leiki á gæðum vörunnar. Annars hrynur salan.

Undanfarið hafa landsmenn verið uppteknir við að ræða um gallaða sílikonpúða og iðnaðarsalt sem notað hefur verið við matvælaframleiðslu. Fyrir nokkru var líka vakin athygli á að áburður sem hefði verið notaður hér innihéldi meira af ákveðnum eiturefnum en heimilt væri.

Nú hefur komið í ljós að tannkrem sem merkt er sem Colgate og framleitt í Suður Afríku, er ólöglegt og getur verið hættulegt. Í tannkreminu er m.a. frostlögur. 

Þegar svona gerist gagnrýna menn eftirlitsaðila, sem fólk telur að eigi að tryggja öryggi sitt. Slíkt allsherjar öryggi er ekki til og getur ekki orðið til. Kaupmaðurinn sem selur vörur og framleiðendur verða að gæta að því hvers konar vörur þeir eru að selja og hvers konar efni eru notuð til framleiðslunnar.  Ábyrgðin er þeirra og verður ekki frá þeim tekin. Neytendur verða alltaf að vera á verði og skoða vel hvað það er sem við kaupum.

Merkjavörur eru ekki endilega tryggingað fyrir gæðum vöru. Merkið getur verið falsað.

Myndbandið hér á eftir sýnir hvað kaupmenn gera í Bandaríkjunum þegar svona kemur upp. 

http://www.youtube.com/watch?v=MMPvHb68aNo

Athugasemdir

[Gunnlaugur I., 18.1.2012 kl. 09:48]

Sæll Jón.

Þessi saga þín minnir á að fyrir nokkrum árum kom upp mikið hneykslis mál í víniðnaðinum í Evrópu.

Reyndar var það fyrir algera tilviljun sem það varð uppvíst að vínframleiðendur aðalega í Austurríki og Ítalíu, höfðu blandað rauðvín sín í áraraðir með baneituðum rauðum frostlegi.

Það var ekki Evrópski eftirlitsiðnaðurinn sem hafði afhjúpað þá, þrátt fyrir áratuga eftirlit.

Heldur var það vegna þess að einn þeirra seku tók sig til og steig út úr hringnum og kjaftaði frá þessum skipulögðu en bíræfnu glæpum framleiðenda.

Þetta hafði nefnilega verið þegjandi leyndarmál þeirra í áratugi og þetta höfðu þeir gert til þess að flýta fyrir verkuninni og halda litnum betri og græða þar með svolítið meira.

[Jón Magnússon, 18.1.2012 kl. 12:57]

Þakka þér fyrir að minna á þetta Gunnlaugur. Þetta sýnir hvað eftirlitið er oft takmarkað og hvað fólk býr við falskt öryggi ef einbeittur brotavilji er fyrir hendi.

[Þórarinn (IP-tala skráð) 18.1.2012 kl. 13:49]

"Nú hefur komið í ljós..." - eins og þetta sé eitthvað alveg nýtt...? Þetta kom upp árið 2007 og nokkuð örugglega var þetta fölsuð vara sem eingöngu hafði verið dreift í fjórum ríkjum á austurströnd BNA.

Mér finnst þetta innlegg ekki til þess fallið að auka við gæði umræðunnar eins og hún hefur verið síðustu daga og vikur.

[Jón Magnússon, 18.1.2012 kl. 15:37]

Þú fyrirgefur Þórarinn ég vissi ekki af þessu fyrr en í gær. Ég bendi á að þetta sé vara sem framleidd er í Suður Afríku og það kemur fram að ég tel þetta ólöglega vöru þó ég hefði mátt segja það skýrar.

Hins vegar varðandi gæði umræðunnar Þórarinn. Þá spyr ég þig hvaða gæði ert þú að tala um? Ert þú að tala um að fréttamiðlar hafi fært okkur fréttir af cadmium magni í ábyrgð af einvherjum gæðum?  Ekki hef ég orðið var við það. Það má e.t.v. upplýsa það að íslenskar reglur varðandi lítið  cadmium magn í áburði voru að öllum líkindum settar sem tæknileg viðskiptahindrun á sínum tíma þegar Áburðarverksmiðjan var upp á sitt besta.

Ég gæti spurt fleiri spurninga Þórarinn varðandi þau mál sem hafa verið í umræðunni og bent á hvað umræðan hefur verið yfirborðsleg og oft röng. Ég fjalla um þetta vegna þess að það hvarflar yfirleitt aldrei að neinum að það sé neitt að varðandi pakka og merkavörur.  Mér finnst það gott innlegg í umræðuna. En hins vegar hefði ég átt að láta það koma skýrt fram að þetta séu falsaðar vörur en ekki framleiddar með leyfi eða á ábyrgð Colgate. Mér finnst miður að það komi ekki skýrar fram í færslunni.

[Þórarinn (IP-tala skráð) 18.1.2012 kl. 16:41]

Þakka þér fyrir svarið Jón, ég átti reyndar við að umræðan hefði verið á ansi lágu plani en það kom kannski ekki nógu vel fram. Upphrópanir og órökstuddar fullyrðingar fljóta fram í stríðum straumum og það var kannski það sem mér fannst örla á í þessari grein þinni (þegar auðvelt hefði verið að kynna sér málið ögn fyrst).

Því miður virðast fjölmiðlar hér á landi almennt ekki líta á það sem skyldu sína að færa okkur áreiðanlegar staðreyndir, heldur sýnist mér þeir fyrst og fremst keppast við að vera fyrstir að færa okkur "hneykslismál" og kjamsa síðan á þeim sem lengst og mest.

Salt-málið er gott dæmi um slíkt, þar sem engum (a.m.k. sem mér er kunnugt um) virðist t.d. hafa dottið í hug að tala við einhvern óháðan sérfræðing sem greint getur frá mismuninum á þessum tveimur tegundum salts frá þessum framleiðanda. Miðað við það sem ég hef kynnt mér þetta mál þá þykir mér alltof mikið gert úr því.

Falsaðar vörur eru vissulega vandamál og betra að hafa varann á sér. Málið er hins vegar að of mörgum (verslunum jafnt sem neytendum) virðist finnast það allt í lagi að styðja við slíka glæpastarfsemi ef það (á yfirborðinu) kemur sér fjárhagslega vel fyrir viðkomandi (ég þekki dæmi um slíkt hér á landi).

[Jón Magnússon, 18.1.2012 kl. 16:51]

Ég sé ekki annað en að við séum fullkomlega sammála nema hvað varðar neytendur og falsaðar vörur. Þó með þeirri undantekningu hvað varðar myndbönd blekhylki og þess háttar þar sem okurverði er haldið uppi af framleiðendum.  Ég er ekki að mæla því bót, en mér finnst sitthvað að vera með hættulegar mat- eða heilsuvörur eða geisladiska og mynddiska.

[Jóhann Kristjánsson (IP-tala skráð) 18.1.2012 kl. 17:43]

Það sem er nýtt í þessu er og vantar inn í færsluna er að umrætt tannkrem hefur verið til sölu hérlendis. Svona til að leiðrétta misskilninginn :)

[Jón Magnússon, 18.1.2012 kl. 22:42]

Það er alveg rétt hjá þér Jóhann.

[Þórarinn (IP-tala skráð) 18.1.2012 kl. 23:55]

Hafa skal það sem sannara reynist - ég hafði ekki heyrt af því að þetta hefði verið til sölu hér á landi. Ábyrgðin hlýtur í því tilviki að liggja hjá innflytjandanum, þ.e.a.s. þeim sem flutti inn meinta svikna vöru.

Á meðan aðilar á markaði (innflytjendur, verslanir og neytendur) telja sig hagnast af því að versla með svikna og falsaða vöru mun þessi glæpastarfsemi þrífast. Því betur komast svikin oftast upp um síðir og oftar en ekki kemur þá í ljós að meintur hagnaður var tálsýn. Skiptir þá engu hvort um var að ræða tannkrem, sokka, gallabuxur, úr, töskur, afrit af hljóm- eða mynddiskum eða hvaða varning annan.

[Jón Magnússon, 19.1.2012 kl. 23:13]

Því miður var það mér að kenna Þórarinn að setja það ekki í færsluna að þetta væri til sölu hér. Annars er erfitt við að eiga því að ekta Colgate tannkrem er framleitt víða um heim, en síðan koma fram falsanir. Innflytjendur vita iðulega ekki um fölsunina t.d. þegar keyptur er gámur með ýmsum vörum - En þá þurfa kaupmenn greinilega að vanda sig betur.

Í þessu skrýtna samfélagi sem við búum við í dag Þórarinn þá eru hlutir varðandi einkarétt iðulega svo öfugsnúnir sérstakri þökk sé Bandaríkjunum hvað það varðar að einkaleyfishafar hafa einkarétt á að okra á neytendum og það leiðir til þess að fólk reynir að bjarga sér með eftirlíkingum jafnvel þó að ólöglegar séu.