Ber Alþingi að ákæra Steingríms J. Sigfússon ráðherra?

Steingrímur J. Sigfússon ber umfram aðra ábyrgð á tugamilljarðatjóni skattgreiðenda vegna Sp/Kef. Hann hefur engar málsbætur og ætti að vera búinn að segja af sér.

Rifjum upp nokkrar staðreyndir:

Samkvæmt ársreikningi Sparisjóðs Keflavíkur fyrir árið 2008, sem undirritaður er 31. mars 2009, var eigið fé hans jákvætt um 5,4 milljarða króna.  Eiginfjárhlutfall var 7.06% og því rétt undir 8% lögbundnu lágmarkshlutfalli.  Þá hafði að sögn endurskoðanda verið tekið tillit til Hrunsins.

Í maí 2009 veitti Fjármálaeftirlitið sparisjóðnum heimild til að koma eiginfjárhlutfallinu yfir lögbundið lágmark, skv. 86. gr. laga um fjármálafyrirtæki.  Slíka heimild má veita til 6 mánaða og hana má framlengja  um aðra sex mánuði „séu til þess "ríkar ástæður“. 

Sparisjóður Keflavíkur fékk þannig að starfa í 12 mánuði með eiginfjárhlutfall undir lögbundnu lágmarki, sem gat eingöngu byggt á því mati að fjármálastofnuin væri lífvænleg og með velþóknun og fyrirgreiðslu þáverandi fjármálaráðherra og viðskiptaráðherra. 

Þann 22. apríl 2010 greip Fjármálaeftirlitið inn í starfsemi Sparisjóðsins í Keflavík og skipti honum upp í gamlan og nýjan.  Ekki liggur fyrir á hvaða forsendum ákveðið var að stofna nýjan sparisjóð eða hvaða hagkvæmnismat lá að baki. 

Stofnun nýja SpKef var gerð af svo mikilli vanhæfni að nýi sjóðurinn komst í þrot tæpu ári síðar eða í mars 2011.  Þeirri spurningu er að hluta til ósvarað hvað miklir fjármunir töpuðust við stofnun nýja sjóðsins – hver var rekstrarkostnaður og rekstrartekjur hans frá apríl 2010 og mars 2011, já og  hvert var tapið? 

Ákveðið var að SpKef myndi sameinast Landsbankanum.  Gerð var áætlun sem fjármálaráðherra blessaði (Steingrímur J) þar sem talað var um að framlag ríkisins vegna Sp/Kef þyrfti að vera 11 milljarðar.

Í fréttum í gær sagði núverandi fjármálaráðherra að kostnaður ríkisins vegna Sp/Kef væri 20 milljarðar og það væri nálægt því sem við hefði verið búist allan tímann. Spurning er þá hvort Steingrímur J. sagði þingi og þjóð ósatt. Alla vega ganga fullyrðingar Steingríms um tjón ríkisins við yfirtöku Landsbankans og sá raunveruleiki sem fjármálaráðherra kynnti í gær ekki heim og saman.

Eftir stendur að sjóður sem átti  rúmlega 5 milljarða eigið fé í árslok 2008 þegar tekið hafði verið tillit til hrunsins er orðinn að engu.  Ríkið hefur margsinnis vanmetið stöðu sjóðsins og það eftir að sjóðurinn starfaði á undanþágu með leyfi Fjármálaeftirlits og velþóknun Steingríms J. Eignir sjóðsins hafa rýrnað verulega á meðan á þessum farsa hefur staðið.  Verðmæti þeirra hefði verið betur tryggt ef sjóðurinn hefði strax verið settur í slitameðferð. Kröfuhafar hafa tapið verulegum fjármunum á þessum handabakavinnubrögðum ríkisins auk ríkisins sjálfs.

Eftir stendur að sá sem ber pólitíska ábyrgð á þessu tjóni ríkisins upp á tugi milljarða er Steingrímur J. Sigfússon sem gerði þessi mál að sínum. Ef til vill gæti Gylfi Magnússon fyrrum viðskiptaráðherra  og mótmælandi einnig borið ábyrgð á þessu tugmilljarða tjóni skattgreiðenda.

Ástæða er til að Alþingi gangi þegar í stað úr skugga um hvort ekki er full ástæða til að vísa máli Steingríms J. Sigfússonar ráðherra og Gylfa Magnússonar ráðherra til meðferðar fyrir Landsdómi þar sem margt bendir til  að þeir hafi brotið af sér í starfi sínu sem ráðherrar og  valdið þjóðinni miklu raunverulegu tjóni í Sp/Kef málinu.

Ef til vill væri ráð að endurvekja nefnd Atla Gíslasonar alþingismanns í þessu skyni.

Athugasemdir

[Kristján B Kristinsson (IP-tala skráð) 10.6.2012 kl. 00:12]

Hverjir eru möguleikar okkar, borgara þessa lands ef við viljum koma lögum yfir þessar gerðir?

[Halldór Guðmundsson (IP-tala skráð) 10.6.2012 kl. 13:02]

Væri ekki rétt að láta Landsdóm líta á það í leiðinni, hvort Steingrímur og Jóhanna ásamt fl. hafi brotið gegn 72. gr. stjórnarskrárinnar,"Eignarétturinn er friðhelgur,annars komi fullt verð fyrir" þegar þau árið 1990 samþykktu frjálst framsal á sameign þjóðarinnar kvótanum.Og eitt er víst að margir hafa selt frá sér kvóta og hagnast um miljarða á þessari gjöf Steingríms og Jóhönnu.

[Elle_, 10.6.2012 kl. 14:50]

Nákvæmlega.  Og svarið við fyrirsögninni er já, eins og ég skil það, Jón.  Og svo skulum við endilega taka ICESAVE nauðungina sem við vissulega skulduðum ekki - og hefði getað orðið milli 500 og 1000 MILLJARÐA tjón fyrir ríkissjóð - fyrir fyrst.

[Jón Valur Jensson, 10.6.2012 kl. 16:36]

Ég tek undir ábendingar þínar í þessu máli, kæri nafni.

Þetta er allt hið hroðalegasta mál fyrir ríkið og ráðherrann.

Að viðbættum 6 milljarða vöxtum, skv. frétt í Rúv fyrir helgina, er tjón ríkisins um 25.000.000.000 kr., þ.e. rúmar 78.000 kr. á hvert mannsbarn í landinu eða hátt i 400.000 krónur á hverja 5 manna fjölskyldu.

Ég hef fjallað um þetta mál í tveimur stuttum pistlum, hér: Steingrímur ákvað að spandera fé ríkisins og hér: Steingrímur J. Sigfússon í skammarkrókinn?

[Sindri Karl Sigurðsson, 10.6.2012 kl. 19:36]

Sæll.

Af hverju getur þjóðþingið komist upp með það að beygja stjórnarskránna í hinum ýmsu málum, s.s. vafasama skatt- og gjaldheimtu, samninga við önnur ríki, ESB aðlögun og svo framvegis?

Það virðist einnig vera sjálfsagt að vera með opinn tékka á hin og þessi mál, t.d. þetta sparisjóðamál.

Hefur hinn almenni borgari engan rétt á því að skjóta til dómsstóla málum sem greinilega eru á gráu svæði, stjórnarskrárlega séð, eða er það einungis Alþingi sem getur flengt sjálft sig?

[Jón Magnússon, 10.6.2012 kl. 20:58]

Kjósa alþingismenn sem gæta hagsmuna okkar.

[Jón Magnússon, 10.6.2012 kl. 20:58]

Þarna hjálpar fyrningin þeim Halldór.

[Jón Magnússon, 10.6.2012 kl. 21:00]

Sammála Elle nema það voru aðrir sem björguðu því. Það er alltaf verið að þakka Ólafi Ragnari það, en þá gleyma menn viljandi að Davíð Oddsson og margir fleiri börðust eins og ljón gegn nauðunginni og Ólafur lét undan þeim þrýstingi sem kominn var.

[Jón Magnússon, 10.6.2012 kl. 21:02]

Þakka þér fyrir þetta innlegg Jón Valur.  Það var athyglivert að hlusta á Steingrím í fréttum Stöðvar 2 í dag. Þar kennir hann Sjálfstæðismönnum og hruninu um. En gleymir því vísvitandi að Sparisjóðurinn starfaði í ár á undanþágu og síðan kom nýr í stað gamals og á öllu því ber Steingrímur alla ábyrgð á og það kom hruninu ekkert við. Eigið fé sparisjóðsins var 5 milljarðar í ársreikningi eftir hrun. Steingrímur reynri að hvítþvo sig með blekkingum. Ekki í fyrsta skipti og vafalaust ekki í það síðasta.

[Jón Magnússon, 10.6.2012 kl. 21:04]

Það er alveg rétt Sindri það er alvarlegt að ýmsar stofnanir skuli geta verið með opna fjárveitingu á skattgreiðendur eftir því sem þeim hentar.  Það þarf að kjósa þingmenn sem eru á móti ofursósíalismanum sem er að sliga allt þjóðlífið .

[Dómari (IP-tala skráð) 10.6.2012 kl. 22:03]

Allar svona vangaveltur eru algjörlega út í hött. Fyrst Landsdómur gat ekki dæmt Geir Haarde, er ennþá ólíklegra að hann muni dæma Steingrím J. Jafnvel þó að allir álíti hann sekan í þessu dæmalausa SpKef klúðri. Þetta yrði bara enn einn óþarfakostnaður fyrir Ríkissjóð og nokkrir vatn-dropar á myllu andstæðinga Steingríms. Þar að auki fengist aldrei nokkur króna út úr svona málaferlum, hvorki fyrir Ríkissjóð, eða stofnfjáreigendur.

[Sindri Karl Sigurðsson, 10.6.2012 kl. 23:17]

Jón það breytir ekki grundvallarspurningunni, þarf Alþingi sjálft að fara með ákæruvaldið og er það eðlilegt að svo sé?

[Þór Gunnlaugsson, 11.6.2012 kl. 10:41]

Sæll Jón

Ég er lengi búiðð að kljást við embættismenn og þingmenn að tala hreina íslensku þegar verið er að tala sem dæmi um 1300 milljarða snjóhengju á sama tíma og sagt er að nægt fé sé til fullrar endurgreiðslu á Icesafe.  Þá hef ég ekki fengið neinar undirtektir hver eigi að fara í skaðabótamál fyrir hönd þjóðarinnar við Breta vegna hryðjuverkalaganna almenningur eða ríkissjóður?? Engin svör fást.  

Þá hef ég marglesið Neyðarlögin til að reyna að átta mig á hvað sé fullnaðartrygging á innlánum fjármálastofnanna samkvæmt þeim lögum. Eru það bara innistæður á bókum eða er eitthver ps.á bak við að allir pappirar svo sem skuldabréf húsbréf og annað dót fylgi líka??  Þetta get ég bara alls ekki lesið úr þeim lögum og oft er það svo að íslenskufræðing þarf til að fá skilninginn hið minnsta án þess að ég sé að kasta rírð á lagasmíð.

[Jón Magnússon, 11.6.2012 kl. 12:13]

Dómari ég ítreka það einu sinni enn að ég vil að þeir sem tjá sig og sendi athugasemdir geri það undir nafni. Almennt hleypi ég ekki öðrum athugasemdum að.  Sjálfsagt yrði það rétt hjá þér að það yrði einn óþarfakostnaðurinn enn að rétta yfir Steingrími. Samt sem áður byggist okkar réttarkerfi á því að sækja fólk til saka ef það hefur til saka unnið þó ekkert hljótist af því nema kostnaðurinn. Ef það væri ekki gert þá væri almennt ekki refsað fyrir afbrot á Íslandi.

[Jón Magnússon, 11.6.2012 kl. 12:14]

Að sjálfsögðu væri æskilegt að breyta Landsdómslögunum Sindri og taka ákæruvaldið úr höndum Alþingis.

[Jón Magnússon, 11.6.2012 kl. 12:16]

Þakka þér fyrir þetta innlegg Þór. Ég vil benda þér á að Guðni Ágústsson og ég vildum á Alþingi strax eftir að Bretar beittu hryðjuverkalögunum að víð tækjum málið upp hjá NATO og Sameinuðu Þjóðunum og krefðumst skaðabóta vegna þess tjóns sem við urðum fyrir vegna löglausra og siðlausra athafna Breta.