Er nauðgun aukaatriði?

Fróðlegt er að fylgjast með málatilbúnaði sporgöngumanna Julius Assange vegna nauðgunarákæru á hendur honum í Svíþjóð og kröfu Svía um að hann verði framseldur til að svara til saka. Vegna þeirrar kröfu var Julius handtekinn í Bretlandi, en látinn laus gegn tryggingu, sem greidd var af nokkrum vinstri sinnuðum auðmönnum. Nú hefur "sómamaðurinn" Júlíus hlaupist undan ábyrgð þrátt fyrir að hafa skriflega samþykkt að gefa sig fram yrði framsal heimilað. 

Julius Assange lætur vini sína sitja uppi með greiðslu tryggingarinnar. Hann svíkur loforð sem hann gaf þegar hann var leystur úr fangelsi gegn greiðslu tryggingar. Lygi og svik Julius Assange er afsakað af sporgöngumönnum hans sem telja að hann sé hafinn yfir lög og rétt.

Af hálfu sporgöngumanna Júlíusar hefur verið gert lítið úr ákærunni og þeim konum sem kærðu Júlíus. Vinstri sinnaðir stjórnmálamenn hafa jafnvel birt nöfn þeirra. Sjálfur hefur Júlíus neitað sök. Þrátt fyrir það hefur Júlíus verið dæmdur af þremur aðskildum óháðum dómstólum í Bretlandi til að sæta framsali til Svíþjóðar.

Nauðgun er hræðilegur glæpur sem hefur áhrif á líf brotaþola alla ævi. Með sama hætti er það hræðilegt að verða saklaus fyrir nauðgunarákæru og það hefur líka alvarleg áhrif iðulega alla ævi þess sem fyrir slíku verður. Þess vegna skiptir máli að slík mál séu afgreidd hratt og örugglega til að hið sanna sé leitt í ljós fyrir óháðum dómstól. En sporgöngumenn Assange telja hann yfir þetta hafinn.

Júlíus er þekktur fyrir að hafa verið forgöngumaður Wikileaks vefsins sem aðallega hefur birt stolin skjöl frá Bandaríkjunum. Hatursmenn Bandaríkjanna á Vesturlöndum og víðar sameinast um og  gera allt til að afsaka framferði Júlíusar og búa til sögur sem eiga að afsaka gunguskap hans varðandi það að svara til saka fyrir óháðum sænskum dómstóli. 

Sjálfur segir Júlíus að verði hann framseldur til Svíþjóðar muni hann verða framseldur þaðan til Bandaríkjanna og telur vafamál að hann sleppi lifandi frá því. Er það líklegt? Er einhver glóra í svona draugasögu? Eru Bretar ekki bestu vinir Bandaríkjanna? Af hverju ættu þeir þá ekki að framselja Júlíus frekar en Svíar?

Svíar hafa verið þekktir fyrir að vera skjól ýmissa flóttamanna undan réttvísinni í Bandaríkjunum t.d. liðhlaupa hermönnum. Er líklegt að þeir mundu ganga erinda Bandaríkjanna gagnvart Júlíus Assagne?

Óneitanlega er oft sérstakt að skoða út frá hvaða hugmyndaheimi róttækir vinstri menn í Evrópu og Suður Ameríku líta á málin. Meint brot gegn kynfrelsi kvenna, nauðgun, er afsökuð, af því er virðist eftir hver í hlut á.

Er þá nauðgun afsakanleg þegar sjóræningjar og meintar alþýðuhetjur og óvinir Bandaríkjanna eiga í hlut? Ríkisstjórn landsins sem veitir Júliusi hæli virðist líta svo á og margir vinir hans m.a. hér á landi.

Rafael Correa hinn vinstri sinnaði forseti Equador er sérstakur vinur Íran og Venesúela og annarra sem eru óvinir Bandaríkjanna. Þess vegna er Julius Assange velkominn á þeim grundvelli einum að "my enemy enemies are my friends" óháð því hvað hann hefur gert.

Það eru nöturleg örlög Julius Assange að verða skjólstæðingur Correa forseta, sem hefur bara á þessu ári lokað 14 fréttamiðlum af því að þeir gagnrýndu hann. Gefur Assange sig ekki út fyrir að vera málsvari tjáningafrelsis og upplýsingafrelsis. Þá er í góðu samræmi við hugsjónirnar að ganga í lið með gjörspilltum forseta sem takmarkar tjáningafrelsi og hefur verið sakaður um peningaþvætti og veita eiturlyfjahringjum skjól auk Írönskum fjármagnsflutningum og nú Assange. Flottur félagsskapur það.

Afsakanir Júlíus Assange eru óneitanlega holar og ómarktækar. Þarna er maður sem þorir ekki að bera ábyrgð á gerðum sínum og gerir allt til að þyrla upp rugli til að komast hjá því og gengur býsna vel.

Það sem kemur mest á óvart og er alvarlegt í þessu máli er að vinstri sinnaða "gáfumannasamfélagið" hér á landi og víðar sem á það helst sameiginlegt að hata Bandaríkin, skuli hafna því að nauðgunarákæra sé alvarlegt mál og konurnar sem kæra Július eigi rétt á því að málið verði leitt til lykta fyrir óháðum dómstól.

Ekki heyrist nú í feministum eða hetjunum á Alþingi sem helst hafa fjallað um kynfrelsi kvenna og fordæmt brot gegn konum. Af hverju ekki? Telja þessir aðilar eins og vinstri sinnaða "gáfumannasamfélagið" að Julius Assange sé hafin yfir lög?

Mannréttindi eru algild og það er engin undanþeginn að virða þau.

Athugasemdir

[Tómas Ibsen Halldórsson, 26.8.2012 kl. 21:30]

Þakka þér fyrir góðan og þarfan pistil Jón.

[Halldór Carlsson (IP-tala skráð) 26.8.2012 kl. 21:34]

konurnar kærðu Assange aldrei fyrir nauðgun - þær kærðu hann raunar formlega ekki fyrir neitt, og þessi skrif þín eru innihaldslaus flaumur af lýsingarorðum.

ég mæli með því að þú kynnir þér málið

[Jón (IP-tala skráð) 26.8.2012 kl. 22:33]

"Af hálfu sporgöngumanna Júlíusar hefur verið gert lítið úr ákærunni og þeim konum sem kærðu Júlíus. Vinstri sinnaðir stjórnmálamenn hafa jafnvel birt nöfn þeirra."

JA hefur ekki verið ákærður, saksóknari (Marianne Ny) vill tala við hann. Það voru ekki vinstri sinnaðir stjórnmálamenn sem opinberuðu nöfnin heldur sænsk borgaraleg blöð, Expressen ef ég man rétt, fyrir margt löngu. Í Svíþjóð segja menn fullum fetum að ef gefin verður út ákæra verði henn vísað frá umsvifalaust. Konurnar kærðu ekki JA fyrir nauðgun heldur vildu þær að hann færi í HIV-próf. Í meðförum lögreglu og saksóknara breyttist það af einhverri ástæðu í nauðgunarkæru. Þetta er eitt allsherjar klúður hjá saksóknurum og lögreglu sem eru að reyna að bjarga andlitinu. 

[Jón Magnússon, 26.8.2012 kl. 23:11]

Þakka þér fyrir Tómas.

[Jón Magnússon, 26.8.2012 kl. 23:16]

Miðað við það sem kemur fram í ensku framsalsdómunum þá er verið að tala um nauðgun Jón einhver. Þar er m.a. vísað til hluta sem falla undir það hugtak skv. íslenskum hegningarlögum og ekki hef ég trú á að sænsk lög séu frábrugðin að þessu leyti. Það hvort Assange er sekur eða saklaus er ekki atriði í mínum pistli og ef þú lest það sem ég segi um mann sem er ranglega borinn sökum um kynferðislega misneytingu eða nauðgun þá skiptir hann máli að hreinsa hendur sínar.  Ekki Assange og það er það óafsakanleg að maðurinn skuli ekki þora að svara til saka fyrir óháðum sænskum dómstól. Ekki Jón einhver fella dóma á grundvelli málsatvikalýsinga sem eru eins og þær eru. Á ekki réttlætið að hafa sinn framgang. Erum við ekki sammála um það?  Ef við erum það þá ert þú sammála því sem ég er að segja í pistlinum nema þú hafir aðra skoðun á forseta Equador. 

[Jón (IP-tala skráð) 26.8.2012 kl. 23:40]

Sænska lögreglan og sænskir dómstólar geta klúðrað málum stórkostlega. Sjá hér

http://en.wikipedia.org/wiki/Thomas_Quick

Þess má geta að verjandi Quick er lögmaður kvennanna tveggja.

[Hrólfur Þ Hraundal, 26.8.2012 kl. 23:49]

Gott mál og áglætlega rökstutt.  Sá sem sækist eftir vinfengi við Correa dæmir sig sjálfur.  Sá sem ekki nauðgar hreinsar sig af ákærunni en leggur ekki á flótta. 

[Grímur (IP-tala skráð) 27.8.2012 kl. 06:34]

Flott hjá þér

Loksins eitthvað á prenti sem kemur ekki beint frá Kristni Hrafnssyni og öðrum í áróðursmaskínu lekandasantakanna.

Lestur á grein eftir Ana Palacio í Mbl í dag ætti líka að vera skyldulesning

[Guðmundur Brynjólfsson (IP-tala skráð) 27.8.2012 kl. 12:19]

Þarfur og góður pistill, Jón Magnússon.

 Maður hefði haldið að saklaus maðurinn þyrfti ekki að óttast það stórlega að svara spurningum sænskra dómara. Ekki hef ég heyrt af því að dómstólar þar í landi séu hættulegir - eins og t.a.m. dómstólar þeir sem vinur hans Ekvador forseti reynir að stjórna eftir bestu getu í því ágæta landi.

 Mér hefur lengi blöskrað blind aðdáun manna á þessum Assange - mér finnst maðurinn frekar ómerkilegur (svona eins og hann og hans málatilbúnaður blasir við í fjölmiðlum) og elska hans á tjáningarfrelsinu undarleg, sérstaklega í ljósi þessa "yndislega" félaga sem hann hefur nú leitað skjóls hjá.

[Anna Sigríður Guðmundsdóttir, 27.8.2012 kl. 13:05]

Þetta er undarlegur pistill hjá þér Jón Magnússon. Þarf ekki að kæra fólk, til að réttlætanlegt sé að framselja þá milli landa og heims-sambanda? Það er útúrsnúningur í þessu máli, að gera lítið úr alvarleika nauðgunar.

Ekki skil ég hvernig þú getur réttlætt svona óréttlæti. Trúir þú öllum vestrænum risa-fjölmiðlum í blindni?

M.b.kv.

[Jón Magnússon, 27.8.2012 kl. 13:37]

Jón einhver sem þorir ekki að upplýsa nánar hver þú ert. Það geta allir klúðrað málum jafnt sænska lögreglan sem aðrir. Málið snýst ekkert um það. Pistillinn minn fjallar ekkert um það. Það fjallar um það að réttlætið nái fram að ganga. Julius Assange og félagar hans telja það greinilega slæmt.

[Jón Magnússon, 27.8.2012 kl. 13:37]

Þakka þér fyrir Hrólfur sammála þér.

[Jón Magnússon, 27.8.2012 kl. 13:38]

Þakka þér fyrir Grímur. Já ég var mjög ánægður að sjá þessa grein eftir hana í Mogganum í dag. Hún er að benda á það sama og ég að fólk hvorki Julius Assange né aðrir geta búið sér til eigið réttlæti og hundsað leikreglur lýðræðis- og réttarsamfélagsins.

[Jón Magnússon, 27.8.2012 kl. 13:39]

Þakka þér fyrir innleggið Guðmundur. Þú bendir einmitt á kjarnann í málinu.

[Jón Magnússon, 27.8.2012 kl. 13:42]

Þú lest þetta með skrýtnum gleraugum Anna ef þú telur að ég sé að gera lítið úr alvarleika nauðgunar. Þvert á móti ég er einmitt að fjalla um alvarleika málsins eins og kemur fram í pistlinum. Þess vegna legg ég áherslu á að réttlætið nái fram að ganga. Ég er ekki að dæma Júlíus þennan fyrir það sem hann er sakaður um í Svíþjóð. En ég get ekki sætt mig við að hann og vinstri sinnuðu sporgöngumenn hans og málsvarar á launum eins og Sveinn Andri Sveinsson og Kristinn Hrafnsson afflytji mál og standi uppi með "Órettarríki Julians Assange" eins og Ana Palacio fyrrverandi utanríkisráðherra Spánar kallar það í góðri grein í Morgunblaðinu í dag.

[Sigurður Þórðarson, 27.8.2012 kl. 14:18]

Snýst deilan Jón ekki líka um að hann er að reyna að komast hjá aftöku? Áhrifamenn í USA hafa sagt hann réttdræpann hvar sem til hans næst.

Hef reyndar ekki séð Moggann í dag og kannski eru komnar nýar upplýsingar fram?

[Ingibjörg Axelma Axelsdóttir, 27.8.2012 kl. 15:37]

Julian*

[Jón Magnússon, 27.8.2012 kl. 16:55]

Sigurður hann hefur gengið um götur London frá því að þetta mál kom upp og hann mætti hingað til lands á sínum tíma eftir að Wikileaks birti stolnar upplýsingar um Bandaríkjamenn og mætti m.a. í boði Birgittu Jónsdóttur í bandaríska sendiráðið.  Er honum meiri hætta búin núna en þá?  Ég held ekki? Óttast einhver um að honum verði stolið af CIA í Stokkhólmi? Þetta er allt tilbúningur í þessum manni Sigurður. Það eru engin haldbær rök sem styðja það sem hann heldur fram um þá hættu sem honum sé búin í Svíþjóð.

[Jón Magnússon, 27.8.2012 kl. 16:56]

Rétt hjá þér Ingibjörg.

[Grímur (IP-tala skráð) 27.8.2012 kl. 20:31]

Það væri nú fróðlegt ef Assange dýrkendur gætu komið með einsog eitt staðfest dæmi um það að Svíar hafi framselt fólk til USA?

Ég vill minnast að meðan Víetnam stríðið var og hét þá hafi Svíþjóð verið vinsælasta landið hjá bandarískum liðhlaupum sem vildu komast hjá fangelsisvist í heimalandinu

[Jón Magnússon, 27.8.2012 kl. 22:55]

Alveg rétt Grímur. Einnig að þeir bentu á þessi sérstöku tengsl Svía og Bandaríkjanna umfram tengsl Breta og Bandaríkjamanna. Það er alveg ótrúlegt hvernig fjölmiðlunin hefur vaðið áfram leidd í tómu bulli af þessu liði í kring um Assange. Ég er ánægður að sjá það að fleirum en mér er ofboðin vitleysan. Það sést á grein fyrrverandi utanríkisráðherra Spánar í dag í Mogganum. 

[Sigurður Þórðarson, 28.8.2012 kl. 16:08]

Ef einræðisherrann í Ekvador vill hýsa þennan Assange þá er honum kannski það ekki of gott?  Mér skilst að hann sé með heilt kvennastóð sem hann vill kannski deila með Júlíusi. Mér þótti verra með terroristana sem sökktu hvalveiðiskipunum okkar og hældu sér af því í fjölmiðlum fengju að spranga um óáreittir í svokölluðum vinaríkjum eins og Svíþjóð.

[Anna Sigríður Guðmundsdóttir, 28.8.2012 kl. 18:11]

Jón. Þetta snýst um aðgerðir í þessu spunamáli, en ekki persónuna Julian. Finnst þér ekkert óeðlilegt við það, að engin nauðgunarkæra er til í þessu máli? Mín "skrýtnu" augu sýna mér ekkert réttlátt við svona ofríkis-vinnubrögð Svíþjóðar og Bretlands. Ég vona að þú getir útskýrt fyrir mér hvernig réttlætanlegt er að framselja fólk milli ríkja vegna nauðgunar, þegar engin nauðgunarkæra er til staðar.

M.b.kv.

[Jón Magnússon, 30.8.2012 kl. 12:44]

Mér fannst það líka Sigurður, en þeir mundu ekki fá að gera það í dag. Julian sem ég því miður uppnefndi sem Júlíus (Þó það sé ágætt nafn í sjálfu sér) á að hlíta sama réttarfari og aðrir. Sjóræningjar hvort sem er á hafi úti eða í tölvum eiga ekki að hafa sérstakt réttarfar fyrir sig að eigin geðþótta.

[Jón Magnússon, 30.8.2012 kl. 12:47]

Ef Englendingur væri sakaður um nauðgun á útihátíð á Íslandi þá mundu íslensk stjórnvöld krefjast þess að fá hann framseldan til að yfirheyra hann í þágu rannsóknar málsins og gefa síðan út ákæru ef ástæða þætti til þess eða fella niður kæruna. Erum við ekki sammála Anna um að þannig eigi að fara að í réttarríki?  Það er einmitt þetta sem sænska lögreglan er að gera varðandi Julian Assange hún vill að hann mæti til skýrslutöku og þurfi að hlíta ákæru ef til kemur.  Er það ekki réttmæt krafa?