ASÍ forustan berst gegn hagsmunum launþega.

Forusta ASÍ hefur orðið viðskila við raunverulega verkalýðsbaráttu. Heildarhagsmunir launþega eru í dag aðrir en þeir hagsmunir sem forusta ASÍ hefur gert að inntaki í starfi sínu.

Hagsmunir launþega er að fá sem mest gæði fyrir laun sín. Þess vegna skiptir máli að verð á nauðsynjum sé sem hagstæðast fyrir launþega. Það skiptir líka álíka máli fyrir launþega að verð á lánum sé lágt.

ASÍ forustan heldur úti verðkönnunum á matvælum öðru hvoru, sem er góðra gjalda vert. En það er ekki nóg að mæla hitastigið á matvælamarkaðnum eins og ASÍ myndast við að gera. Það þarf líka að berjast fyrir og móta tillögur til raunlækkunar vöruverðs í landinu. Það er mikilvægasta kjarabót launþega í landi verðtryggingarinnar.

Hagstæð lán eru líka forsenda góðra kjara launþega. Þar hefur ASÍ forustan ekki bara brugðist, heldur vinnur gegn hagsmunum launþega. ASÍ forustan stendur dyggastan vörð allra um verðtrygginguna sem þýðir óhagkvæmustu lán til neytenda sem til eru í Evrópu og Norður Ameríku. 

ASÍ hefur ekki ljáð máls á því að neysluskattar séu teknir út úr vísitölu neysluverðs til verðtryggingar.  Þess vegna bitna auknir neysluskattar með tvöföldum þunga á launþegum. Hækka matarverð og hækka lán í leiðinni.  Þá berst ASÍ forustan nú fyrir því að launþegar á Íslandi þurfi að þola hækkun lána sinna vegna t.d. uppskerubrests á korni í IOWA í Bandaríkjunum, en lánastofnanir fái meira í sinn hlut vegna þess.

Ekki má gleyma því að forseti ASÍ drap á dreif tilögum um að verðtryggingin yrði tekin úr sambandi með neyðarlögum í október 2008. Hann var formaður nefndar til að fjalla um málið á vegum Jóhönnu Sigurðardóttur og niðurstaða hans og Jóhönnu var sú að frekar skyldu heimilin tekin af fólkinu en að gæta sanngirni á óvissu og erfiðleikatímum.  

Hætt er við að gengi krónunnar gefi eitthvað eftir á næstunni. Það mun hækka verðtryggðu lánin. Þá er framundan veruleg hækkun matvæla vegna verulegrar hækkunar á kornveði. Hækki eldsneytisverð líka verður hér ný verðbólguholskefla. Hún bitnar þyngst á launþegum sem eru með verðtryggð lán. ASÍ forustan virðist neita að horfast í augu við þessar staðreyndir.

Stefna forustu ASÍ gagnvart heimilunum í landinu er álíka og stjórnenda flutningaskips sem byrjar að leka úti á rúmsjó og meðan hásetarnir rembast af öllu afli við að stöðva lekann og ausa þá bora yfirmennirnir stöðugt fleiri göt á skipið. Slíkum stjórnendum yrði kastað fyrir borð til að skipið sykki ekki.  Það þurfa launþegar líka að gera gagnvart forustu ASÍ meðan hún rekur helstefnu gegn heildarlífskjörum launþega í landinu.

Athugasemdir

[Bragi, 30.8.2012 kl. 23:35]

Verðtryggingin er barn síns tíma sem hentaði vel í vanþróuðu pólitísku hagkerfi þar sem vaxtafrelsi ríkti ekki einu sinni. Hún lagaði þann óstöðugleika sem var fyrir hendi þá.

Nú er öldin önnur og veldur hún óstöðugleika í formi hærri verðbólgu og vaxta en ella þyrfti, sem leiðir síðan út í einn meiri óstöðugleika innan raunhagkerfisins.

Stöðugleikinn sem við þráum öll er í augsjón. Það sem stöðvar að hann verði að veruleika er auðvitað, eins og svo oft áður, pólitískur vilji vanþróaðra íslenskra stjórnmálamanna.

[Helgi (IP-tala skráð) 30.8.2012 kl. 23:47]

Sæll.

Fínn pistill hjá þér. Ég er ekki alveg sammála þér varðandi verðtrygginguna en látum það liggja á milli hluta. Það sem þú segir um lágu vextina á lánum er einnig tvíeggjað sverð - það er hins vegar of langt mál að fara út í það hér. Rætur núverandi kreppu liggja í ríkisafskiptum og lágum vöxtum. Gaman væri ræða það hér seinna :-)

Það er merkilegt hvernig örfáum innan ASÍ hefur liðist að beita samtökunum fyrir sinn persónulega vagn. ESB t.d. logar stafna á milli en samt á að fara þangað inn. Icesave þurfti einnig að samþykkja af einhverjum undarlegum ástæðum.

Ég er ákaflega ánægður að þú skulir vera óhræddur við að senda gagnslausum fyrirbærum eins og ASÍ og umboðsmanni alþingis pillur. Þegar einstaka stjórnvaldi leyfist að gera það sem því dettur í hug án þess að ráðuneyti eða umboðsmaður alþingis geri nokkuð er orðið tímabært að leggja eitthvað niður og spara pening.

Enn ítreka ég hneykslan mína á að málshöfðun þín gegn Persónuvernd vegna SÍ skyldi ekki vera tekin til efnislegrar meðferðar. Þetta mál verður viðkomandi dómara til ævarandi skammar. Hver á að vernda borgarana gegn ágangi hins opinbera ef ekki dómstólar?

[Jón Magnússon, 31.8.2012 kl. 16:44]

Þakka þér fyrir Bragi. Það er svo einfalt að slaka á í hagstjórninni og láta neytendur borga brúsann með verðtryggingunni. Það erum við búin að gera allt of lengi.

[Jón Magnússon, 31.8.2012 kl. 16:45]

Þakka þér fyrir innleggið Helgi. Það er í sjálfu sér ekki við dómarann að sakast heldur frekar lögin. Það mátti búast við þessari niðurstöðu af því að heimildir einstaklinga til að ná rétti sínum í svona málum er mjög takmarkaður. En þetta hafði þó þá þýðingu að Persónuvernd hefur ekki leyft Seðlabankanum að fara alveg niður í kok aftur.