Þjóðin hefur ekki áhuga á tillögum stjórnlagaráðs. Aðförin að stjórnarskránni IX

Ég hef ítrekað hvatt fólk til að taka þátt í ráðgefandi þjóðaratkvæðagreiðslu sem fer fram í dag og segja NEI við að tillögur stjórnlagaráðs verði lagðar til grundvallar nýrri stjórnarskrá.

Félgsskapur nokkurra sem sátu í stjórnlagaráðinu, og tala jafnan í nafni þjóðarinnar, sem ber rangnefnið "SANS" hefur hamast í langan tíma og dreift röngum og villandi upplýsingum um aðförina að stjórnarskránni. Reynt hefur verið að blekkja fólk til fylgis við ófullburða tillögur stjórnlagaráðs. Sama hafa nokkrir fjölmiðlar gert í mismiklum mæli.

Í ráðgefandi  þjóðaratkvæðagreiðslu eins og þessari þá eru það ekki aðrir en þeir sem greiða viðkomandi hugmynd atkvæði sem eru stuðningsmenn hennar. Aðrir hafa ekki áhuga á henni. 

Verði niðurstaða ráðgefandi þjóðaratkvæðagreiðslu að færri en helmingur kjósenda á kjörskrá greiði atkvæði með því að tillögur stjórnlagaráðs verði lagðar til grundvallar varðandi nýja stjórnarskrá þá þýðir það að þjóðin hefur ekki áhuga á tillögunum og þeim hefur þá verið hafnað.

Verði þetta niðurstaðan; þá þýðir það líka að þjóðin lýsir vannþóknun á aðförinni að stjórnarskránni.

Vafalaust hefði meiri hluti landsmanna frekar viljað eyða þeim 1.3 milljarði króna sem farið hefur í aðförina að stjórnarskránni til vitrænni hluta eins og t.d. kaupa á nauðsynlegum tækjum á Landsspítalann Háskólasjúkrahús.

Athugasemdir

[Ketilbjörn (IP-tala skráð) 20.10.2012 kl. 14:34]

Nefndu það ekki Jón. Loka varð lífslokadeildinni á St Jósep vegna óvildar Steingíms og Indriða. Samtök góðgerðarfólks tóku svo að sér að bjarga málum og stækkuðu Kópavogsdeildina sem þau áður reistu um helming

Karl

[Arnór Valdimarsson (IP-tala skráð) 20.10.2012 kl. 17:01]

"Þið eruð ekki þjóðin" sagði ISG. Hún hafði rangt fyrir sér.

Það kemur síðan í ljós þegar talið verður upp úr kjörkössunum hvort þú hafir rétt fyrir þér og hvar áhugi þjóðarinnar lyggur í þeim 6 spurningum sem lagðar voru fram.

En hjartanlega sammála þér með að allir eigi að mæta og nýta lýðræðis rétt sinn og kjósa.

[Ómar Ragnarsson, 20.10.2012 kl. 18:11]

Samkvæmt þessari skýringu hafði þjóðin ekki áhuga á sambandsslitunum 1918 af því að aðeins 43,8% tóku þátt í kosningum þar um og því langt innan við helmgur kjósenda á kjörskrá sem greiddu atkvæði með þeim.

[Óli Már Guðmundsson, 20.10.2012 kl. 22:18]

Í lýðræðisþjóðfélagi hélt ég að það gilti að ef meirihluti þeirra sem kjósa styðja tillöguna sem kosið er um,sé hún gild. En kannski gildir annað viðmið í sjálfsæðisflokknum.

[Jón Magnússon, 20.10.2012 kl. 23:01]

Rétt Karl af því að stjórnmál snúast um að forgangsraða og þegar vitlaust er forgangsraðað eins og þetta stjórnlagaráð og rugl í kring um stjórnarskrána þá er annað mikilvægara sem situr á hakanum.

[Jón Magnússon, 20.10.2012 kl. 23:02]

Að sjálfsgöðu eiga allir að mæta. En mjög dræm þátttaka eins og í þessari skoðanakönnun sýnir að hún er ekki marktæk. Hvað segjum við um skoðanakannanir dagblaða þar sem bara 40% aðspurðra tjáir sig. Telur einhver þær sýna raunsanna mynd af vilja kjósenda. Ekki ég.

[Jón Magnússon, 20.10.2012 kl. 23:06]

Þú ert að bera saman allt annað ferli og allt annað þjóðfélagsástand og mjög takmarkaðan kosningarétt. Þetta sýnir hvað langt er seilst til fanga ágæti Ómar til að reyna  að afsaka að þjóðin vill ekki tillögurnar ykkar. Þrátt fyrir að þið hafið verið með skefjalausan áróður í marga mánuði nánast einhliða og fólki með andstæðar skoðanir hafi verið rutt út af fjölmiðlum eins og t.d. Útvarpi Sögu þá hefur samt minni hluti kjósenda áhuga á þessu. 

[Jón Magnússon, 20.10.2012 kl. 23:07]

Við erum að tala um skoðanakönnun Óli Már og þar sem þjóðaratkvæðagreiðslur eru til staðar eins og stjórnlagaráð leggur til þá eru jafnan ákvæði um lágmarksþáttöku og lágmarksfjölda þeirra sem segja já.