Stjórnarsáttmáli og verðtrygging

Það er röng staðhæfing í stjórnarsáttmálanum að skuldavandi heimila sé tilkominn "vegna hinnar ófyrirsjáanlegu höfuðstólshækkunar verðtryggðra lána sem leiddi af hruni fjármálakerfisins."

Höfuðstólshækkanir verðtryggðu lánanna voru að öllu leyti fyrirsjáanlegar og á það benti ég í þingræðu sama dag og neyðarlögin svokölluðu voru samþykkt í október 2008 og krafðist að sett yrðu neyðarlög fyrir heimilin í landinu þar sem verðtryggingin yrði tekin úr sambandi þá strax.

Það þurfti engan spámann til að sjá fyrir höfuðstólshækkanir verðtryggðra lána, lækkun fasteignaverðs og lækkun launa við hrun fjármálafyrirtækjanna. Það gerist alls staðar á öllum tímum þegar slík kreppa dynur yfir. 

Norræna velferðarstjórnin gerði ekkert af viti varðandi skuldavanda heimilanna og þess vegna er sá skuldavandi eitt brýnasta vandamálið að leysa til að stuðla að jafnræði neytenda og fjármagnseigenda sem og koma hjólum efnahagslífsins í gang.

Brýnast er að afnema verðtryggingu á neytendalánum þegar í stað. Ekki bíða til áramóta og láta málið þæfast í nefnd. Það er ekki flókin lagabreyting að afnema verðtryggingu á neytendalánum.

Hitt er flóknara að færa niður höfuðstóla og í þá vegferð verður að fara af mikilli varfærni og nákvæmni til að hún nýtist sem best og kosti skattgreiðendur sem minnst. 

Það er hins vegar ekki ásættanlegt að leiðrétting verðtryggðu höfuðstólanna sé miðuð við árin 2007-2010. Væri ekki rétt að taka líka höfuðstólshækkunina á verðtryggðu lánunum frá því að Landsfundur Sjálfstæðisflokksins samþykkti árið 2011 að afnema verðtryggingu á neytendalánum og færa niður höfuðstóla.  Frá þeim tíma hafa höfuðstólar verðtryggðu lánanna hækkað meir en 100 milljarða.

Það er alltaf dýrt að vera vitur eftir á.  Það er gæfa þjóða að eiga stjórnmálaleiðtoga sem eru vitrir þegar á þarf að halda og hafa þekkingu og menntun til að takast á við verkefnin af skynsemi strax.

Vonandi erum við að fá slíka leiðtoga.

Athugasemdir

[Ómar Ragnarsson, 22.5.2013 kl. 22:59]

Það er rétt hjá þér að þetta var fyrirsjáanlegt. Og ekki bara það. Strax 2003 vöruðu vísustu menn þáverandi Framsóknarráðamenn við afleiðingunum af húsnæðislánasprengingunni samfara tilbúinni þenslu með stórfelldum framkvæmdum og lánum.

Það mátti líka öllum vera ljóst 2006 að krónan var allt  of hátt skráð með tilheyrandi neyslu og stjórnlausum lántökum, fjórföldun skulda heimilanna, og að efnið í snjóhengjuna streymdi inn í landið vegna hárra vaxta.

Samanlagt erum við Íslendingar því að verða einhverjir vitrustu menn eftir á sem um getur. 

[S i g u r ð u r S i g u r ð a r s o n, 22.5.2013 kl. 23:42]

Auðvitað er þetta rétt athugasemd hjá þér, Jón. Ég er þó ekki viss um að þetta hafi verið með vilja sett svona inn heldur vona frekar að einhverjum hafi skjöplast í textagerðinni. Hún verður mörgum að fótakefli eins og lögmenn vita mætavel. Þar af leiðandi er mikilvægt fyrir ríkisstjórn og ráðherra að vanda vel til þess sem ritað er eða sagt. Og jafnvel enn mikilvægast að þegja þess á milli. Ekki blaðra út í það óendanlega eins og fráfarandi ráðherrar áttu vanda til.

[Sandkassinn (IP-tala skráð) 23.5.2013 kl. 17:40]

Menn úr vissum flokkum var nú bara ekki hlustað á meðan mesta brjálæðið gekk yfir. Sem betur fer er sú tíð um garð gengin.

[Jón Magnússon, 23.5.2013 kl. 21:01]

Nú erum við hjartanlega sammála Ómar. En því má bæta við að það var raunar árið 2002 sem Guðmundur G. Þórarinsson, ég og fleiri bentum sérstaklega á að löggjöfin varðandi fjármálastofnanir væri orðin allt of losaraleg og nauðsynlegt væri að skilja á milli eða setja múra á milli viðskiptabanka og fjárfestingabanka. Vandamál stjórnmálamanna á Vesturlöndum er að þeir eru almennt illa upplýstir og fylgjast lítið með vitrænni umræðu af því að þeir eru svo uppteknir á kjósendamarkaðnum.

[Jón Magnússon, 23.5.2013 kl. 21:02]

Nógu langan tíma tók textagerðin samt félagi Sigurður. En vonandi er þetta rétt skýring hjá þér.

[Jón Magnússon, 23.5.2013 kl. 21:03]

Það er því miður alveg rétt Gunnar.

[Halldór Jónsson, 23.5.2013 kl. 23:59]

Þetta er auðvitað rétt. Norræna velferðarstjórnin var bara ónýt til að taka á nokkru máli. hún bara reifst innbyrðis um allt sem engu máli skipti