Tímabær umræða um ólögleg fíkniefni

Jón Steinar Gunnlaugsson fyrrverandi Hæstarréttardómari skrifar góða grein í Morgunblaðið í dag undir heitinu "Vöknum".  Þar er bent á nauðsyn þess að nálgast fíkniefnavandann með öðrum hætti. Þó það sé ekki orðað ótvírætt í greininni þá verður ekki annað skilið en að Jón Steinar sé að leggja til að einhver fíkniefni sem nú eru ólögleg verði lögleg.

Umræða um þessi mál er erfið vegna þess að víða er mikill harmur sem hefur fylgt fíkniefnaneyslu, afbrot og dauðsföll. Það á raunar við bæði um lögleg sem ólögleg fíkniefni. Jón Steinar hvetur til að einstaklingarnir beri í auknum mæli ábyrgð á sjálfum sér en refsivaldi ríkisins sé ekki beitt ótæpilega gagnvart þeim sem ánetjast eiturlyfjafíkn. Fyrir þeirri skoðun færir Jón sannfærandi rök.

Tímaritið Economist telur að lögleiða eigi algengustu ólögleg fíkniefni. Tímaritið hefur ítrekað bent á í ritstjórnargreinum það sama og Jón Steinar í grein sinni. Það er að sú stefna sem fylgt er í dag gerir fyrst og fremst glæpamenn ríka, dregur ekki úr neyslu, en gerir hana hættulegri en ella væri vegna mismunandi gæða, styrkleika og íblöndunarefna.

Economist hefur ítrekað bent á að almennt veigri menn sér við að taka til máls um eiturlyfjavandann þar sem að það séu svo sterkir hagsmunir sem vilji hafa óbreytta stefnu m.a. þeir sem hagnast á viðskiptunum.  Heimsviðskipti með ólögleg fíkniefni eru ef ég man rétt að verðmætum talið meiri en með vopn. Eiturlyfjahringir í Mexícó eru með einkaheri, flugskeyti og kafbáta.

Hlutfallslega flestir refsifangar eru í Bandaríkjunum vegna löggjafar í fíkniefnamálum. Fjórðungur allra fanga í heiminum er í Bandaríkjunum las ég í grein um daginn þó þar búi bara 5% jarðarbúa. Þetta gerist í landi hinna frjálsu. Bandaríkin ættu að íhuga hvernig þeim gekk að uppræta brennivínið meðan það var ólöglegt.  Skipulögð glæpastarfsemi var ekki til í Bandaríkjunum fyrir tíma áfengisbannsins. Hér er um enn verra vandamál að ræða, meiri peningar og auðveldari flutningsleiðir til neytandans.

Þær staðreyndir að stefnan í eiturlyfjamálum dregur ekki úr neyslu og gerir glæpamenn ríka ættu að duga til að ábyrgir aðilar í samfélagi þjóðanna tækju þessi mál til skynsamlegrar skoðunar.

Athugasemdir

[Sandkassinn (IP-tala skráð) 10.9.2013 kl. 11:35]

Það þarf að lögleiða öll eiturlyf, Kannabis, kókaín, meth, Heróín, allt heila klabbið. Þá verður algjört verðfall á þessu og þessi bransi hrynur. Þar með lýkur eiturlyfjastríðinu Í Suðurameríku og víðar.

Það hefur aftur á móti ekkert upp á sig að lögleiða eina tegund, það þarf að lögleiða þetta allt saman. 

[Ásgrímur Hartmannsson, 10.9.2013 kl. 17:51]

Löggæzlan græðir svo mikð á eiturlyfjalöggjöfinni eins og hún er núna, bæði sjálf embættin og allt heila systemið sem selur þeim græjur, að það er hæpið að eiturlyf verði gerð lögleg.

Þetta er mjög öflogt batterí núna, og það stynur hátt þegar einhver minnist á að lögleiða bara allt draslið og fara að tríta þetta eins og alkóhólisma.

Það eru ekki bara glæpamenn sem græða. En það eru bara almennir borgara sem tapa.

[H.T. Bjarnason (IP-tala skráð) 10.9.2013 kl. 19:39]

Eins og staðan er í dag, er fíkniefnamarkaðurinn á Íslandi frjáls. Með einu símtali get ég keypt nánast öll þau efni sem í boði eru hérlendis.

[Gunnar Th. Gunnarsson, 10.9.2013 kl. 19:57]

Ég hef heyrt að vín-iðnaðurinn berjist einnig hatrammlega gegn lögleiðingu kannabis, vegna þess að neysla þess dregur úr áfengisdrykkju.

[Bjorn Emilsson (IP-tala skráð) 10.9.2013 kl. 21:47]

Marijuana telst ekki lengur eiturlyf í Washington ríki.  Nú hafa verið leyfðir 61 útsölustaðir á marijuana í fylkinu, þar af 21 í Seattle.