Hin heilögu landamæri

Obama Bandríkjaforseti og David Cameron forsætisráðherra Bretlands hafa farið hamförum vegna þeirrar ógæfu, þegar farþegaflugvél var skotin niður fyrir mistök yfir Úkraínu.  Þeir hafa reynt að nýta sér þetta hörmulega slys til að ná sér niðri á Rússum og knýja á um hertar refsiaðgerðir gegn þeim.

Cameron hefur m.a. krafist þess að Frakkar hættu vinnu við og afhendingu orustuskipa sem þeir eru að smíða fyrir Rússa.  Franska forsætisráðherranum var nóg boðið og benti á að Bretar ættu þá frekar að taka á rússnesku oligörkunum sem væru hvergi fleiri en í London í stað þess að gera kröfur um að Frakkar stæðu að aðgerðum sem mundu kosta þúsundir manna atvinnuna. 

Sumir fjölmiðlar bjuggu til vandamál úr því að uppreisnarmenn í Úkraínu komu líkum úr flugvélinni fyrir í kældum vögnum í stað þess að láta þau liggja óhreyfð á víðavangi í ofsahita. Þessar fréttir voru rugl frá upphafi til enda, en  til þess fallnar að valda óþægindum og sorg hjá nánum ættingjum þeirra sem höfðu misst ástvini sína í þessu hörmulega slysi. Einnig til að reyna að koma höggi á Rússa. Þetta sýnir hversu gagnrýnislausir fréttamiðlar á Vesturlöndum eru orðnir og hvað illa þeir vinna fréttir og taka við tilbúnum áróðursfréttum leyndra eða augljósra ríkisstofnana í Bandaríkjunum.

Hatrammur áróður gegn Rússum byrjaði nokkru eftir að þeir veittu Snowden hæli. Snowden var hundeltur af útsendurum Obama fyrir að bera sannleikanum vitni. Í framhaldi af niðurlægingu Obama og Cameron í Sýrlandsdeilunni,  þegar þeir vildu ganga í lið með Al Kaída liðum og ISIS og hefja lofthernað gegn löglegum yfirvöldum í Sýrlandi en fengu ekki stuðning þjóðþinga sinna og þeim fannst þeir niðurlægðir af Putin harnaði áróðurinn gegn Rússum til muna. Áróðurinn gegn Rússum náði þá m.a. til Íslands þar sem Rússar voru allt í einu orðnir sekir um að vera mestu hatarar samkynhneigðra í heiminum þó það sé fjarri öllum sanni.

Þegar uppreins í Úkraínu heppnaðist fyrir tilstyrk Bandaríkjanna og Evrópusambandsins bjuggu þeir Cameron og Obama til þá kenningu að landamærum mætti ekki raska hvergi í heiminum óháð því hvernig þau væru tilkomin. Slík stefna hefur iðulega leitt til styrjalda sem hefði mátt komast hjá hefðu stjórnendur haft sögulega þekkingu, yfirsýn og víðsýni. En þeir Obama og Cameron virðast ekki búa yfir slíkri þekkingu eða hæfileikum. 

Þegar Sovétríkin féllu og járntjaldið féll vonaðist ég til að Vesturlönd og fyrrum kommúnistaríki gætu náð saman til að skapa betri heim. Eftir árásirnar á tvíburaturnana bauð Putin fram alla þá aðstoð sem Rússar gætu veitt. Því miður tóku Vesturlönd ekki í þá útréttu sáttarhönd. Tveir lítt hæfir Bandaríkjaforsetar og forsætisráðherrar Bretlands hafa valdið gríðalegu tjóni í alþjóðamálum og komið í veg fyrir alla vega tímabundið að hægt væri að skapa alþjóðlegt skipulag og frið í heiminum því miður. Engum öðrum verður frekar um það kennt.    

Athugasemdir

[Ómar Ragnarsson, 23.7.2014 kl. 13:56]

Talaði einhver um viðskiptaþvinganir gagnvart Bandaríkamönnum þegar þeir skutu niður íranska farþegaþotu yfir Persaflóa á sínum tíma?

[Jón (IP-tala skráð) 23.7.2014 kl. 14:07]

Mér finnst það nokkuð sérstakt að kalla það "ógæfu" að skjóta niður farþegavél með næstum 300 manns um borð.

[Þorsteinn Sch Thorsteinsson (IP-tala skráð) 23.7.2014 kl. 23:55]

Sæll Jón

Þetta er mjög góð grein hjá þér og er ég sammála öllu sem þú segir hérna. En þar sem að stjórnvöld í Bandaríkjunum hafa gefið það út hvað eftir annað að þau búi yfir öllum sönnunargögnum þeas. þeirra eigin gervihnattamyndum og öðrum gögnum af þessum atburðum, verður athyglisvert að sjá hvort stjórnvöld í Bandaríkjunum opinberi nokkurn tímann þessi gögn, þar sem að Rússar hafa nú þegar afhent öll sönnunargögn og annað af þessum atburðum.      

[Snorri Hansson, 24.7.2014 kl. 02:05]

Fyrrum ráðandi Úkrainu vildi leita leiða til að bæta fjárhaginn. Hann leitaði bæði  til Rússa og ESB. Hann valdi síðan tilboð Rússa . Það olli sprengingu innan pólitíkur ESB og þeir fengu USA til hjálpar.

Eftir það hefur lygin verið allsráðandi í vestræðum fjölmiðlum og framkoma vestrænna stórpólitískusa til skammar. Stríðið við austurhlutann er þeirra klúður.