Leiðrétting og mótmæli

Á sama tíma og ríkisstjórnin kynnir langþráða leiðréttingu á stökkbreyttum höfuðstólum verðtryggðra lána er boðað til mótmælafundar á Austurvelli til að mótmæla einhverju.

Leiðrétting höfuðstólanna sem hækkuðu svo mikið í efnahagslegum ólgusjó banka- og gengishruns á árunum 2008 og 2009 var sjálfsögð, en hefði verið einfaldari og deilst með réttlátari hætti hefðu stjórnendur þessa lands samþykkt að taka verðtrygginguna úr sambandi strax við bankahrunið eins og ég lagði til eða þá fljótlega á eftir.

En betra er seint en aldrei. Ríkisstjórnin er nú að framkvæma það sem lofað var fyrir kosningar og er að því leyti ólík ríkisstjórn Jóhönnu Sigurðardóttur, sem lofaði og sveik.

Einhverjir munu gagnrýna þessa millifærslu fjármuna, sem með einum eða öðrum hætti kemur frá skattgreiðendum hvað sem hver segir. En þeir hinir sömu hefðu þá frekar átt að gagnrýna það þegar ríkið tók á sig hundraða milljarða skuldbindingar með því að ábyrgjast allar innistæður á innistæðureikningum í bönkum langt umfram skyldu.

Hefði skuldaleiðréttingin ekki verið gerð á óréttlátum ímynduðum virðisauka verðtryggingarinnar, en bara borgað fyrir þá sem áttu, en þeir sem skulda látnir liggja óbættir hjá garði þá yrðum við áfram þjóðfélag sem ekki gætti neins réttlætis.

Með aðgerðum ríkisstjórnarinnar er staðfest algjör skömm og svik þeirra Jóhönnu Sigurðardóttur og Steingríms J. Sigfússonar og skjaldborgar þeirra um skuldsett heimili.

Í stað þess að fagna því jákvæða sem ríkisstjórnin er að gera, þá finnst sporgöngufólki Samfylkingar og Vinstri grænna rétt að mótmæla við Alþingishúsið, jafnvel því sem Alþingi kemur ekkert við og hefur ekkert með að gera. 

Lánleysi mótmælandanna sem koma saman til að mótmæla einhverju af því bara er í besta falli grátbrosleg við þessar aðstæður.

Athugasemdir

[Kjartan Sigurgeirsson, 10.11.2014 kl. 20:49]

Kastljós kvöldsins var vægast sagt sorglegt, þar sátu hvor á móti öðrum Sigmar spyrill og Sigmundur Davíð að munnhöggvast um hlut sem hvorugur virtist hafa hið minnsta vit á, þ.e. greiðslujöfnunarreikninga.  Á tali Sigmundar virtist það vera að kasta peningum út um gluggann að greiða fyrst inn á greiðslujöfnunarreikninga því þeir séu ekki til þess gerðir að greiða af þeim og forsætisráðherrann virtist ekki vita neitt meira um fyrirbrigðið. 

En skemmst er frá því að segja að Greiðslujöfnun á verðtryggðar skuldir er ekki neitt sem Á.P.Á. fann upp og ekki heldur Jóhanna. Greiðslujöfnun var fyrst sett á verðtryggðar skuldir í byrjun níunda áratugs síðustu aldar þegar mismunur var hvað mestur í þróun Lánskjaravísitölu og Launavísitölu. Í sem stystu máli virkar þetta þannig að ef hækkun Lánskjaravísitölu er meiri en hækkun Launavísitölu safnast mismunur á svokölluðu greiðslumarki og hækkun höfuðstóls á greiðslujöfnunarreikning. Þegar hallinn er á hinn veginn snýst þetta við og mismunur lækkar greiðslujöfnunarreikning, sem er allan tímann vaxtareiknaður og verðbættur eins og aðrir hlutar lánsins, þannig að greiðsla inn á jöfnunarreikningi minnkar í raun höfuðstól lánsins eins og greitt sé beint inn á hann.

Ég held að nánast allir greiðslujöfnunarreikningar sem stofnuðust á níunda áratugnum hafi tæmst áður en lánstímanum lauk eða mjög fljótlega eftir lok umsamins lánstíma.  Það er alls ekkert lögmál að Lánskjaravísitala hækki meira en Launavísitala, yfirleitt eru þær mjög nálægt pari og mér segir svo hugur um að ef þróun vísitalna heldur áfram á þann veg sem verið hefur að undanförnu verði ekki langt að bíða þess að skuldarar fari að greiða inn á greiðslujöfnunarreikninga sína.

En það var augljóst að bæði „Ísland í dag“ og Kastljós hömruðu á bullinu í stjórnarandstöðunni án þess að nenna að kynna sér málin, því spyr ég fyrir hvern eru eiginlega þessir fréttaskýringaþættir?  Það er allavega ljóst að þeir eru ekki til að leiða sannleikann í ljós.

[Jón Magnússon, 11.11.2014 kl. 00:18]

Sammála Kjartan.

[Deane Júlían Scime (IP-tala skráð) 11.11.2014 kl. 00:44]

They are not giving anything they are returning what was stolen,but at the wrong time.Trying to create an angelic image but with priorities in wrong order.