Verðtrygging lögleg

Dómur Hæstaréttar Íslands í máli nr. 160/2015 kveður á um það að verðtrygging neytendaláns sé ekki ólögmæt samkvæmt íslenskum rétti að teknu tilliti til þess regluverks sem við höfum samþykkt sem EES þjóð.

Þar með liggur fyrir að verðtrygging neytendalána er gild og sú ætlan margra að hægt væri að fá henni hnekkt með dómstólaleið er röng. Ég hef verið og er andvígur verðtryggðum neytendalánum  og taldi að dómstólaleiðin væri til þess fallin að draga kraft úr baráttunni fyrir breyttri löggjöf sem tæki af tvímæli um að verðtryggð neytendalán yrðu gerð ólögleg. Mér finnst samt miður að ég skyldi hafa haft rétt fyrir mér varðandi væntanlega niðurstöðu Hæstaréttar í málinu en fannst það raunar nokkuð borðleggjandi allan tímann og var gefið bágt fyrir af mörgum að hafa þá skoðun.

Ríkisstjórnin lofaði að afnema verðtryggingu af neytendalánum og nú skiptir máli að þeir sem vilja réttlátt lánakerfi á Íslandi þar sem lánakjör verða sambærileg og á hinum Norðurlöndunum einhendi sér nú í baráttu gegn óréttlátri verðtryggingu.

Í því sambandi mega neytendur ekki láta svikalognið sem verið hefur undanfarna mánuði blekkja sig. Framundan er verðbólguholskefla ef fram heldur sem horfir- Nýr forsendurbrestur. Áður en það verður skiptir öllu máli að ná fram nauðsynlegum breytingum á lánakjörum fólksins í landinu.

Okurþjóðfélagið getur ekki gengið lengur þar sem fjármálafyrirtæki og lífeyrissjóðir hafa bæði axlabönd og belti í samskiptum sínum við fólkið í landinu. Það verður að koma réttlæti strax með afnámi verðtryggingar á neytendalánum þar með talið lánum til fasteignakaupa. Á því er ekki hægt að gefa afslátt.

Athugasemdir

[Rafn Haraldur Sigurðsson (IP-tala skráð) 13.5.2015 kl. 20:42]

Verkalýðsfélögin mættu huga að því að setja í kröfugerð sína að launin verði vísitölutryggð eins og lánin

[Hilmar (IP-tala skráð) 13.5.2015 kl. 20:55]

Helstu persónur og leikendur í óstöðugu fjármálalífi Íslendinga er ekki almenningur, heldur banka, lífeyris- og stjórnmálamenn.
Verðtryggingingin leysti alla fyrrgreinda niður úr snörunni, að bera ábyrgð á rekstri landsins, og færði hana yfir á almenning.

Afnám verðtryggingar færir þessa ábyrgð aftur til þeirra sem eiga að bera hana, þeirra sem taka afdrifaríkar ákvarðanir sem varða okkur öll.
Og þess vegna verður verðtryggingin ekki afnumin.

Afnám verðtryggingar, og bundnir vextir til fimm eða tíu ára, myndu skapa spennu á milli banka og lífeyrissjóða annars vegar, og ríkis og sveitarfélaga hinsvegar.
Ríkið gæti ekki lagt í þensluskapandi framkvæmdir, án þess að hafa veruleg áhrif á útlánavilja bankanna. Þeir myndu þurfa að draga úr útlánum, til að auka ekki á spennu og verðbólgu. Bankar og lífeyrissjóðir verða sumsé neyddir til þess að gera sitt til að halda verðbólgu í lágmarki.

Með afnámi verðtryggingar, er því hægt að skapa ríkinu þá stöðu, að geta raunverulega staðið fyrir þensluaukandi aðgerðum á samdráttartíma, að jafnaði þegar bankar halda að sér höndum. Og á hinn bóginn, bindur þetta hendur ríkissins að vaða í framkvæmdir í uppsveiflu, þegar bankar hafa vilja og getu til að lána.

Þetta er sumsé valið á milli þægindalífs stjórnmála, banka og lífeyrissjóða vs hagsmuna almennings.
Og við vitum fullkomlega hvernig sú barátta endar.

[Kristinn (IP-tala skráð) 13.5.2015 kl. 21:09]

Já; Þú segir nokkuð...Í svona stóru máli, svona smá grein frá þér.

Þetta minnir á Eyjafjallajökull og allan skandalan sem hann gerði um árið stuttu eftir Hrun. Smár jökull með með stórt nafn :)

https://www.youtube.com/watch?v=tEEXY6HrQ6Y

Vinsamlega útskýrðu dóminn betur ef þú getur, þetta er nefnileag ekki smá-mál heldur stór-mál

[Sigurður Hjaltested (IP-tala skráð) 13.5.2015 kl. 23:42]

Já satt segir þú Jón.

Því miður fyrir Íslenska þjóð, þá er landflótti að færast

í aukanna og færri verða hér eftir til að draga vagninn.

Ungt fólk í dag sér engva möguleika á því að reyna að búa

hér og sér möguleika fyrir mannsæmandi líf í öðrum

löndum en hér. Á sama tíma flyst hér til lands, fólk

sem tilbúið er að vinna baki brotnu fyrir lág laun og

yfirleitt frá fátæktarsvæðum Evrópu.

Ísland er komið í "fátækragildru" með aðstoð

verðtryggingar.

Það þarf ekkert að vera mikið menntaður til

að sjá í hvað stefnir.

En við getum þó glaðst yfir því, að aðeins

1% af þjóðinni, á yfir 70% af auðlindum og

hagnaði þessa lands, þannig að það fólk og þeirra

börn, þurfa ekki að kvíða fyrir kaupum á íbúð,

lífsviðurværi og ellidögum þó meirihluti

þjóðarinnar þurfi þess.

Já, það er gott að búa á Íslandi,

en fyrir hverja..???

[Bjarni Gunnlaugur (IP-tala skráð) 14.5.2015 kl. 09:14]

Úr því að ekki stendur vilji til að breyta peningaútgáfuvaldinu og draga það frá bönkunum þá er næst besti kosturinn að hafa innlán verðtryggð en banna verðtryggingu á útlánum.    Slíkt ætti að trygga að bankarnir forðist verðbólgu.

Þannig væri hægt að nýta verðtryggingu sem hemil á peningútgáfu.

[EINAR S. HÁLFDÁNARSON (IP-tala skráð) 14.5.2015 kl. 14:02]

Jón, ég átta mig ekkert á þessu með verðtrygginguna hjá þér. Raunvextir af íbúðalánum er ekkert meiri á Íslandi en mörgum löndum í Evrópu. Ellilífeyrisþegar eru ekkert ofseldir af ávöxtun lífeyrissjóðanna af íbúðalánum og við sem borgum vextina þurfum ekkert að gráta; það hef ég aldrei gert í það minnsta.

[Már Elíson, 15.5.2015 kl. 20:51]

Mér þykir vænt um þetta blogg þitt, Jón. Algerlega eins og tala úr mínum munni.

- Eru neytendur ekki líka að að reyna að koma yfir sig þaki...Borga og borga en eignast aldrei neitt ?

Þetta verður, í beinu framhaldi af þessum og komandi verkföllum, algert uppnám /uppþot hjá þjóðinni ef greiðslubyrði verður ekki aukin. Harðduglegt ungt fólk vinnur myrkranna á milli til að reyna að ná endum saman (fyrir fjármagnseigendur / lífeyrissjóði)er á hröðum flótta frá þessum þrældómi og píski og hefur orðið óbeit á stjórnmálum, stjórnmálamönnum, græðgisvæðingunni, Sikiley norðursins og Íslandi, og kemur kannski aldrei til baka. - Og til hvers ? - Það mun aldrei eignast neitt hér og það er líka til kalt og heitt vatn í útlöndum ásamt fjöllum, fossum og fjörðum.

Takk fyrir góðan pistil, Jón.

[Jón Magnússon, 17.5.2015 kl. 12:22]

Ég er að benda á dóminn og ítreka það sjónarmið mitt að það verði að ná fram afnámi verðtryggngar á neytendalánum á Alþingi en dómstólar geri það ekki.