Flokkur fyrir þig?

Píratar mælast enn næststærstir í skoðanakönnunum, sem er raunar furðulegt af því að flokkurinn hefur ekki staðið fyrir neitt sérstakt á þingi ef undan er skilið harkaleg andstaða við kristni og kirkju sem og opin landamæri á kostnað skattgreiðenda.

Þá hefur forustufólk Pírata verið berað að því að segja ósatt m.a. um menntun sína og vinnu, sem mundi valda meiri háttar hávaða í helstu fjölmiðlum ef aðrir ættu í hlut.

Sagt er að Píratar sæki helst stuðning sinn til ungs fólks og er það ills viti ef ungt fólk í landinu velur sér fyrirmyndir eins og þær sem þar skipa fremstu bekki. Sá metnaður og dugnaður sem komið hefur fram hjá ungu fólki á Íslandi undanfarin ár sem birtist m.a. í hugkvæmni í viðskiptum, samskiptum,  öllu sem varðar tölvur hvað þá heldur einstaka og frábæra tónlistarútrás auk margs annars er í hróplegu ósamræmi við geljanda, þjóðfélagslegaandúð og froðusnakk  forustufólks Pírata.

Mótmælaframboð eiga vissulega rétt á sér einkum ef þau standa fyrir skýra valkosti til breytinga en það gera Píratar engan vegin. Siðvæðing íslenskra stjórnmála,minni skattheimta og traust efnahagsstjórn eru miklvægastu málin í dag sem varða heill og hamingju þjóðarinnar. Þá baráttu leiða Pírtar engan vegin. Forustufólk þeirra hefur ekki sýnt hæfi til að gera það auk heldur þá veikleika að vita ekki hvaða menntun það hefur auk heldur hvar það vinnur.

Það er svo til marks um úrræðaleysi og hugmyndafræðilega örbirgð Samfylkingarinnar, Vinstri grænna og Bjartrar framtíðar að þessir flokkar skuli setjast niður undir forustu Pírata til að ræða stjórnarmyndun á grundvelli skoðanakannana.

Sem betur fer áttar þjóðin sig stöðugt betur á því hvílík vá það væri ef Píratabandalagið ætti að fara að stjórna landinu.

Þá væri nú heldur betur ástæða til að segja:"Guð blessi Ísland."

 

Athugasemdir

[Kolbrún Hilmars, 28.10.2016 kl. 17:27]

Píratar eru nú á pari við VG í skoðanakönnunum.  Skv. Gallup 1.4% hærri, skv. 365 miðlum 2% hærri.  Svo á auðvitað eftir að telja upp úr kjörkössunum.  Sennilega hefur VG betur.

[Guðbjörg Snót Jónsdóttir (IP-tala skráð) 29.10.2016 kl. 14:01]

Ég vona, að sitjandi stjórn haldi áfram, enda held ég nú, að Framsóknarflokkurinn fái meira út úr kosningunum heldur en skoðanakannanir sýna fram á, og hefur alltaf gert það, eins og margir hafa bent á. Ég vona líka, að Sjálfstæðisflokkurinn haldi vel sínu í kosningunum. Bjarni væri vel verðugur þess að verða næsti forsætisráðherra, og gaman væri að fá aftur forsætisráðherra með þessu nafni og úr sömu fjölskyldunni. Ég er ekki viss um, að Píratar uppskeri eins mikið úr kosningunum sjálfum eins og í skoðanakönnunum. Þegar ég var að lesa norrænu fjölmiðlana í morgun, og sá mynd af glaðbeittri Birgittu, og sagt var, að þetta gæti orðið næsti forsætisráðherra þjóðarinnar, þá varð mér um og ó, en hugsaði samt, að það væri svo sem engin furða, þótt það væri gert grín að okkur erlendis, ekki fyrir þær sakir, sem Jóhanna og Steingrímur og þeirra lið töldu upp, heldur fyrir það að vera þeir sérvitringar að kjósa svona flokk eins og Pírata, sem hvergi annars staðar myndi fá svona mörg atkvæði í könnunum. Útlendingar hljóta að halda okkur ákaflega skrýtna þjóð fyrir vikið, enda værum við það, ef þetta yrði raunin, sem ég vona, að Guð forði okkur frá í lengstu lög. Vesturíslensk frænka mín hafði samband við mig í morgun, og sagðist hafa verið að lesa um kosningarnar, og spurði mig, hvers konar flokkur þessir Píratar væru, og hvað þeir stæðu fyrir. Ég velti því fyrir mér, hvernig ég ætti eiginlega að fara að því að útskýra það fyrir henni. Það skilur þetta enginn heilvita maður. Við skulum vona, að kjósendur láti skynsemina ráða í kjörklefanum og kjósi ríkisstjórnarflokkana, svo að sitjandi stjórn geti haldið áfram að stjórna landinu. Mál er að linni þessum vitleysisgangi í kjósendum.