Frestur er á illu bestur en dugar ekki alltaf.

Fjármála- og efnahagsmálaráðherra mun fljótlega mæla fyrir tillögum ríkisstjórnarinnar um heimild sumra skattgreiðenda til að fresta greiðslu gjalda sinna. Tillögurnar eru nauðsynlegar en duga ekki til. 

Þegar Donald Trump tók þá glórulausu ákvörðun að loka á ferðir flugvéla frá Evrópu til Bandaríkjanna varð ljóst, að kreppan vegna Kórónuveirunnar mundi dýpka verulega. Tekjur fjölmargra fyrirtækja og einstaklinga munu því óhjákvæmilega dragast verulega saman eða í sumum tilvikum verða að engu. 

Við slíkar aðstæður hefur það áhrif á allt þjóðfélagið og nánast allir rekstraraðilar verða fyrir verulegu áfalli. Þá skiptir máli að ríkisstjórnin geri ráðstafanir sem dugi. Þá þarf meira að koma til en frestur á greiðslu opinberra gjalda og markaðssetning Íslans fyrir ferðafólk.

Tvennt skiptir þar máli umfram annað sem ríkisstjórnin getur gert. Í fyrsta lagi að afnema eða lækka verulega skatta á fyrirtæki og einstaklingsrekstur m.a. með tímabundnu afnámi tryggingargjalds og ýmissa annarra rekstrartengdra gjalda á fyrirtæki. Einnig að afnema tímabundið svonefnda græna skatta og kolefnisjöfnunarskatta. 

Annað sem ríkisstjórnin getur gert til að auka verðmætasköpun í landinu er að heimila verulega auknar fiskveiðar við landið og þá er verið að tala um aukningu umfram tilmæli Hafrannsóknarstofnunar auk þess, sem að krókaveiðar yrðu gefnar frjálsar tímabundið. 

Líkur eru á að verðbólga hækki nokkuð í svona árferði með falli krónunnar og þá mælir neysluverðsvísitalan verulega hækkun án þess að raunveruleg verðmætasköpun standi á bakvið þá hækkun heldur öðru nær. Við þær aðstæður er nauðsynlegt til að vernda heimilin í landinu með því, að afnema tímabundið afleiðingar hækkunar vísitölunnar. Á sama tíma þarf að fara fram á það við bankakerfið í landinu að lækka vexti almennt bæði á almennum skuldabréfum til almennings t.d. til húsnæðislána og til atvinnurekstrarins. 

Grípa þarf til þessara aðgerða strax. Síðan getur þurft að grípa til frekari aðgerða ef kreppan vegna veirunnar dregst á langinn og dýpkar enn.  

Mikilvægt er að fara að ólíkt Trump í þessu efni og taka fumlausar, velígrundaðar og skynsamar ákvarðanir, sem eru líklegar til að styðja við bakið á þeim sem mest þurfa á að halda og koma í veg fyrir að almenningur í landinu þurfi að liggja óbættur hjá garði. 

Athugasemdir

[Jón Steinar Ragnarsson, 13.3.2020 kl. 13:20]

Mér finnst það heldur mikil einföldun að tala um Trump sem alráðan einræðisherra í bandaríkjunum. Hann er bara að fara að ráðum sóttvarnarsérfræðinga og þar er hann með ráð upp á hundruð manna.

Annars finnst mér þetta orðið svolítið yfirdrifið almennt. Það er ekki að sjá að þetta sé hættulegri flensa en hver önnur og dauðsföll af henni eru brotabrot af árlegum umgangspestum. Áhættuhópurinn er nálægt áttræðisaldrinum og þá með veikindi fyrir.

Trump er bara að gera það sem honum er ráðlagt. Þú ert farinn að hljóma eins og Glóbalistinn Björn Bjarnason, sem sér Trump allt til foráttu vegna þjóðernisstefnunnar. Svolítil þversögn í því hjá BB, vegna þess að þessi "faraldur" er einmitt afurð fjölþjóðahyggjunnar (Glóbalismans)

[Halldór Jónsson, 13.3.2020 kl. 14:36]

Var aflýsing Norðuvíkings í ætt við þannig "fumlausar, velígrundaðar og skynsamar ákvarðanir,"? 

Verður ekki hægt að semja um þetta við Pompeo. Eða er þetta gambítur hjá Gulla til að fá okkur flokkuð með farþega leyfi frá Bretlandi sem ekki er í Schengen?  

[Halldór Jónsson, 14.3.2020 kl. 21:27]

Trump tók einu réttu ákvörðunina og hnykkti á henni í dag.

https://medium.com/@tomaspueyo/coronavirus-act-today-or-people-will-die-f4d3d9cd99ca

[Jón Magnússon, 15.3.2020 kl. 11:58]

Að sjálfsögðu er Trump ekki einræðisherra Jón og tekur það sem að honum er rétt af ráðgjöfum hans. En þessi ráðstöfun að setja flugbann á Evrópu var þó þannig að hún getur ekki verið komin frá neinum sérfræðingum. Þannig var engin góra í því að leyfa flug frá Bretlandi og banna það frá öðrum löndum Evrópu. En það hefur raunar verið leiðrétt.  En þú fyrirgefur nafni, að mér finnast þessar krampakenndu ráðstafanir eins og Trump og Dana sem og Norðmanna að loka landamærunum vera út í hött og þjóni litlum tilgangi í baráttunni við þennan vágest.

[Jón Magnússon, 15.3.2020 kl. 11:59]

Nei Halldór ég tel að það hafi verið mistök að hætta við Norður Víking.

[Jón Magnússon, 15.3.2020 kl. 12:01]

Já Halldór við erum greinilega ekki sammála um það hvort það er skynsamlegt að grípa til svona víðtækra takmarkana. Ég tel svo ekki vera ekki frekar en lokun landamæra Danmerkur og Noregs vegna veirunnar. Þeir ættu frekar að loka landamærunum vegna svonefndra hælisleitenda.