Hver á að stjórna?

Svo virðist, sem Þórólfur Guðnason sóttvarnalæknir sé glöggskyggnasti stjórnmálamaður þjóðarinnar um þessar mundir. Raunar er hann ekki stjórnmálamaður, en einhver verður að gegna því hlutverki þegar ríkisstjórn tekur sér frí frá því að stjórna og skrifar upp á allt sem sóttvarnar- og landlæknir segja eins og Guð hafi sagt það. 

Þórólfur bendir réttilega á, að nú sé töluvert óþol í þjóðfélaginu gagnvart C-19 aðgerðum ólíkt því sem var í byrjun ársins. Þá bendir hann á, að það þurfi að taka tillit til heildarhagsmuna og leggur því til, að komið verði á samstarfsvettvangi til að vega og meta heildarhagsmuni, en aðgerðir í sóttvarnarmálum verði ekki eingöngu í samræmi við það sem hann sjálfur leggur til.

Ríkisstjórnin hefði átt að koma slíkum samráðsvettvangi á laggirnar strax í byrjun, en hefur fundist þægilegt að vera í vari sérfræðinga og geta komið sér hjá að stjórna. En nú ofbýður sóttvarnarlækni stjórnleysi og glámskyggni ríkisstjórnarinnar og telur óhjákvæmilegt að benda á  augljósa staðreynd.  

Sóttvarnarlæknir er þó ólíkur hefðbundnum stjórnmálamönnum að því leyti, að honum þykir nóg um hvað völd hans eru mikil og gerir því tillögu um valddreifingu. Þá verða þessi ummæli hans heldur ekki skilin með öðrum hætti en honum þyki nóg um stikkfrí leik ríkisstjórnarinnar og fari fram á, að hún fari að sinna skyldum sínum sem ríkisstjórn. 

Athyglisvert að sóttvarnarlæknir skuli setja fram þessar tillögur og þær eru honum til mikils sóma.

 

 

Athugasemdir

[Guðbjörn Guðbjörnsson, 5.8.2020 kl. 07:33]

Nákvæmlega það sama og ég hugsaði þegar ég las þessi orð sóttvarnarlæknis.

Ég hef um nokkurra mánuða hríð gagnrýnt að ríkisstjórnin sýni ekki hver stjórnar í landinu.

Þarna er ég alls ekki að segja að ekki eigi að hlusta á sóttvarnarsjónarmið, heldur hitt að til viðbótar þarf að hlusta á öll sjónarmið í jafn stóru máli.

Þetta virðast allir hafa gripið nema ríkisstjórn Íslands.