Nýja stjórnarskráin

Margra kynlegra grasa kennir í tillögum stjórnlagaráðsins sáluga, en aðstandendur þess telja að þjóðin eigi að lögfesta það eins og Guð hafi sagt það, án þess að breyta um kommu eða punkt. 

Öllu málsmetandi fólki var ljóst, þegar það sá tillögurnar, að þarna var um framsetningu að ræða eins og oft er hjá fólki sem er í lögfræðilegum æfingabúðum iðulega án þess að eiga þangað erindi. 

Einfalt dæmi: 

Ákvæði núverandi stjórnarskrár um sveitarfélög gr. 78

"Sveitarfélög skulu ráða málefnum sínum eftir því sem lög ákveða. Tekjustofnar sveitarfélaga skulu ákveðnir með lögum svo og réttur þeirra til að ákveða hvort og hvernig þeir eru nýttir."

Stutt einföld framsetning, sem segir allt sem segja þarf. 

En það var að sjálfsögðu ekki nógu gott fyrir stjórnlagaráðið. 

Í stað þeirrar einu greinar sem er í stjórnarskránni um sveitarfélög koma fjórar greinar í tillögum stjórnlagaráðs og þegar betur er að gáð, þá tryggja þær hvorki sveitarfélögum eða íbúum þeirra neinn sérstakan rétt umfram það sem þessi eina hnitmiðaða grein núverandi stjórnarskrár gerir: 

Í greinum 105-108 í tillögum stjórnlagaráðs segir í 105 gr. að sveitarfélög skuli sjálf ráða málefnum sínum eftir því sem að lög ákveða og þau skuli hafa nægjanlega burði og tekjur til að sinna lögbundnum verkefnum. (Ekki er sagt hver eigi að tryggja þeim þessar tekjur) og að tekjustofnar sveitarfélaga skulu ákveðnir með lögum.

Í 106 gr. stjórnlagaráðs  segir að á hendi sveitarfélaga eða samtaka í umboði þeirra (hvaða samtök skyldu það nú vera) eru þeir þættir opinberrar þjónustu sem best þykir komið í héraði svo sem nánar skal ákveðið í lögum. 

Í 107 gr segir að sveitarfélögum skuli stjórnað af sveitarstjórnum (eins gott að taka það fram) og þá að rétti íbúa til að óska eftir atkvæðagreiðslu um málefni þess skal skipað með lögum. 

108 gr. mælir síðan fyrir um að samráð skuli haft við sveitarfélög um undirbúning lagasetningar sem þau varðar. 

Er eitthvað í tillögum stjórnlagaráðs, sem eykur á réttindi sveitarstjórna með þessum langhundi sem ráðið sullar saman umfram það sem kveðið er á um í 78. gr. núverandi stjórnarskrár? Vissulega ekki. Þarna er um að ræða hrófatildur, sem hróflað er saman af fólki oft velmeinandi fólki sem einskonar óskalista, sem er þó ekkert annað og meira en það sem sagt er í tveim línum og einni grein núverandi stjórnarskrár. 

Öllum má vera ljóst, að tillögur stjórnlagaráðs um sveitarstjórnir eru ekki innihaldsríkar og nauðsynlegar umfram það sem er í núverandi stjórnarskrá heldur þvert á móti og dæmi um það að þeir sem settu þetta saman gera sér ekki að fullu grein fyrir hvaða tilgangi stjórnarskrá á að þjóna.   

 

Athugasemdir

[Ásgrímur Hartmannsson, 16.10.2020 kl. 13:38]

Þetta var ástæða þess að ég var á móti nýju stjórnarskránni þegar hún vitraðist mér fyrst:

Hún var löng.  Í besta falli sömu hlutirner, nema verr orðaðir, og í versta falli allskyns hlutir sem hafa ekkert erindi í neina stjórnarskrá.  Ég meina: dýravernd?  Hvað hafa dýr með stjórn landsins að gera?

Auðvitað er ekkert hægt að tjónka við þetta blessaða fólk út af þessu.  Gjörsamlega blindað af ídeologíu.

[Guðmundur Ásgeirsson, 16.10.2020 kl. 17:31]

Mesta þversögnin í málatilbúnaði þeirra sem virðast ekki vita hvernig hægt sé að finna frumvarp stjórnlagaráðs (á heimasíðu ráðsins) er að fara eigi eftir átta ára gömlum niðurstöðum ráðgefandi þjóðaratkvæðagreiðslu um eina spurningu sem þá var á kjörseðlinum en ekki aðrar.

[Gudmundur Thorleifsson (IP-tala skráð) 17.10.2020 kl. 09:23]

Eins og ég hef oft sagt áður!  FYRSTA ATRIÐI ER AÐ FARIÐ SÉ EFTIR STJÓRNARSKRÁ, HÚN HAFI RAUNVERLEGT GILDI! BROT Á HENNI HAFI AFLEIÐINGAR.  Breitt innihald hennar er marklaust, sé hún einungis notuð sem sýndarplagg á hátíðis og tillidögum.

[Jón Steinar Ragnarsson, 17.10.2020 kl. 20:10]

Ég myndi segja að svona flausturslega og vanhugsað hafi verið staðið að flestum greinum hinnar "nýju"stjórnarskrár" vegna þess að allar greinar allar greinar hennar nema framsalshlutinn hafi ekki skipt máli.

Feneyjarnefndin gaf skránni hinsvegar falleinkun 2013 vegna of margra fyrirvara á framsalsákvæðinu. Vegna þessa var bæði ESB umsóknin og stjórnarskráin "sett á ís".

síðan hefur lítið verið þrýst á inngöngu í sambandið, en þess meira á stjórnarskrárbreytingar, sem eru forsenda inngöngu.

Það er fyrirsjáanlegt að aktívistar esb inngöngu þyrli þessu upp nú til að nýta sér kreppu og upplausn, enn og aftur.

Góð vísa er er ekki of oft kveðinn vegna takmarkaðs skammtímaminnis þjóðarinnar. Ég læt því hér fylgja frétt af vísi frá janúar 2009, sem skýrir hversvegna og hvenær þessi sirkus fór af stað. Það er engin önnur ástæða.

https://www.visir.is/g/2009864224d

[Jón Steinar Ragnarsson, 17.10.2020 kl. 20:23]

Þessi stúlka sem kemur þessu af stað núna segir að viðbrögð andstæðinga hjálpi mest til að halda markmiðinu á lofti. Umræðan sé aðalatriðið.

það er því best, að mínu mati, að þegja þessa dellu í hel og leyfa þeim að grafa undan sér með vandalisma og stóryrðum.

Flestir eru algerlega ignorant um hvers vegna þessu var þyrlað upp í upphafi og svör þeirra sem veita þessu brautargengi eru: Af því bara, auðlindir í þjóðareign og allskonar. (Raunveruleg tilvitnun).

[Grímur Kjartansson, 18.10.2020 kl. 01:35]

Það er líka óljóst hvað fólk er að styðja í undirskriftarsöfnuninni

"Ég myndi telja að fólk væri að skrifa undir drög Stjórnlagaráðs, og þau yrðu lögð til grundvallar," segir Katrín.

[Guðmundur Ásgeirsson, 19.10.2020 kl. 19:18]

Jón Steinar Ragnarsson.

Ástæða þess takmarkaða skammtímaminnis og ómarkvissa málflutnings sem þú vísar til er sennilega sú að þau sem eru mest áberandi í þessum kröfum voru ennþá börn árið 2012.

Þessi börn hafa hafa aldrei í sínu námi fengið neina fræðslu um stjórnarskránna, hlutverk hennar og inntak. Það ætti samt að vera hluti af námsefni í skyldumnámi.

[Þorsteinn Siglaugsson, 19.10.2020 kl. 22:25]

Hvernig væri að gera skoðanakönnun meðal leikaranna, lífstílsráðgjafanna og álitsgjafanna sem eru í auglýsingunum að heimta nýja stjórnarskrá og spyrja hvers vegna.

A: Af því að Ísland hefur enga stjórnarskrá

B: Af því að stjórnarskráin er gömul

C: Af því að börn forstjóra Samherja erfðu fyrirtækið

D: Hvað er stjórnarskrá?

Hver ætli niðurstaðan verði?