Enginn hlutur heimill nema helvíti

Helsta frétt RÚV í gærkvöldi var fordæming á lögreglukonu fyrir að hafa borið þrjá krossfána á lögreglubúningi sínum á mynd sem tekin var af henni fyrir tveim árum. Fréttastofan taldi þetta langt utan siðferðilegra marka og í fréttinni var rasistastimpli og fleiru klínt á þessa lögreglukonu.

Að sjálfsögðu gætti fréttastofan þess, að tala ekki við lögreglukonuna. Hún var fórnarlambið, sem átti þess ekki kost að bera hönd fyrir höfuð sér. Þá kom ekki fram, að fréttastofan hefði gert sérstaka úttekt á þeim fánum sem lögreglukonan bar og almennt um gildi þeirra, en studdist við ummæli Þórhildar Sunnu Ævarsdóttur þingkonu Pírata. 

Varðstjóri í lögreglunni var dreginn upp af fréttastofunni til að vitna með skilningi RÚV eins og lautinant Valgerður forðum í Hjálpræðishernum um veginn af drottins náð sbr. kvæði Steins Steinars. Af hverju var talað við hann en ekki lögreglustjóra? Ef þetta var svona merkilegt eða mikilvægt mál, agabrot, rasismi, fasismi eða eitthvað í þá áttina var þá ekki eðlilegt að tala við lögreglustjóra en draga ekki upp utangátta og illa undirbúinn varðstjóra. Var ekki líka eðlilegt að tala við lögreglukonuna og eftir atvikum formann Lögreglufélagsins?

Í lok fréttarinnar kom fram af hverju fréttastofan hafði gert þetta að aðalfrétt. Þórhildur Sunna Ævarsdóttir Pírati hafði tekið málið upp á Alþingi og taldi mikilvægt að nefnd þingsins eyddi tíma í að ræða um tveggja ára gamla mynd af fánum á búningi lögreglukonu. RÚV þurfti að sjálfsögðu að styðja baráttu þessarrar "geðþekku" þingkonu þar sem undirskriftarsöfnuninni um nýju stjórnarskrána var lokið. 

Það er engin furða þó að fólkið í landinu sé vanhaldið af eðlilegum fréttum, þegar fréttastofa RÚV er upptekin við það dögum, vikum og mánuðum saman að afflytja fréttir og stunda pólitískan áróður og gæta ekki þeirra lágmarkskrafna í fréttamennsku að virða mannréttindi þeirra sem um er fjallað, en frétt RÚV í gær var tvímælalaust meiðyrði og brot á persónuvernd lögreglukonunnar sem í hlut á. En það er e.t.v. í lagi að mati fréttamanna RÚV, sem eftir því sem best verður séð sjá ekki að aðrir en öfgavinstrafólk og hælisleitendur eigi nein slík réttindi. 

Athugasemdir

[Benedikt Halldórsson, 22.10.2020 kl. 11:37]

Sammála þér Jón. Takk fyrir að orða það sem ég held að stór hluti þjóðarinnar hafi fundið fyrir. Það var einfaldlega hræðilegt að sjá Þórhildi Sunnu háttsettan og valdamikinn þingmann traðka á lögreglukonu - án nokkurrar samvisku. 

Í sama fréttatíma lýgur hún að þjóðin vilji "nýju stjórnarskrána" - og höfðar til samvisku þingmanna að samþykkja hana. 

[Kristinn Bjarnason (IP-tala skráð) 22.10.2020 kl. 15:50]

Er engin leið að loka ríkissjónvarpinu?

[Jón Magnússon, 22.10.2020 kl. 19:58]

Þakka þér fyrir Benedikt.

[Jón Magnússon, 22.10.2020 kl. 19:59]

Engin lögleg Kristinn. Meirihluti Alþingis skyldar fólk til að borga til þessarar áróðursstöðvar. 

[Jósef Smári Ásmundsson (IP-tala skráð) 22.10.2020 kl. 20:19]

Er ekki bara óþarfi hjá lögreglumönnum að bæta við merkingum á lögreglubúninginn? Og æra óstöðuga? En burt með skylduásriftina að RÚV. Algjör tímaskekkja.

[Gunnlaugur I., 23.10.2020 kl. 00:26]

Þórhildur Sunna er helsta frenja þeirra Pírata. Hún þolir illa íslenska fánann og önnur merki með krossi á, hún sér fasisma og rasisma í hverju horni. Sjálf gengur hún samt undir nafni og svörtum merkjum alþjóðlegra sjóræningja. Sem hafa á samviskunni morð og gripdeildir, ofbeldi og þrælahald.

[RAGNHILDUR H. (IP-tala skráð) 23.10.2020 kl. 01:28]

Hann var ekki betri hlutur  Dómsmálaráðherra ,ekki varði hun löggæsluna ..tilnbuin að trua öllu án skoðunar !