Hvenær brýtur maður lög og hvenær brýtur maður ekki lög?

Sagt er að sá mikli heimspekingur, flakkari og listamaður Sölvi Helgason hafi eitt sinn reiknað tvíbura í afríkanska konu og hafi annar verið ljós á hörund en hinn hörundsdökkur. 

Svipaðir útreikningar eru nú á sveimi mismunandi áreiðanlegir eins og gengur. Rekstraraðilar Ásmundasalar hafa komist að þeirri niðurstöðu 5 dögum eftir að lögregla stöðvaði samkvæmi í salnum á Þorláksmessu, að það hafi ekki verið um nein brot á sóttvarnarlögum að ræða. Afsökunarbeiðni þeirra var því röng og þar af leiðandi aðgerðir lögreglu fráleitar og óafsakanlegar.

Fjármálaráðherra var þar af leiðandi að biðjast afsökunar á broti, sem enginn möguleiki var skv. því að hefði verið framið. Raunar hefur þeim sem skrifað hafa um það mál yfirsést, að það var ekki hlutverk fjármálaráðherra að sjá um sóttvarnir í Ásmundarsal og á þeim bar hann ekki ábyrgð. Þá mundi einhver vafalaust segja: "og þó.

Á sama tíma berast fregnir af því að sjálfur sóttvarnarlæknir og heilbrigðisráðherra hafi brotið eigin reglur og tilmæli við móttöku á heilfrystu bóluefni í morgun og sjáist það glögglega á ljósmynd, sem tekin var af því tilefni. 

Hvorki heilbrigðisráðherra né sóttvarnarlæknir hafa beðist afsökunar og geta vafalaust sagt eins og frambjóðandi Framsóknarflokksins á Vestfjörðum sagði forðum þegar deilt var um útlit stórhýsis sem verið var að byggja í Reykjavík og andstæðingur hans frambjóðandi Sjáflstæðisflokksins brá þá upp ljósmynd af byggingunni. Þá varð Framsóknarmanninum að orði: "Lygi er lygi jafnvel þó hún sé á ljósmynd". Þannig gæti sóttvarnalæknir einnig farið að en Guðni vinur minn Ágústsson fullyrðir að í honum séu rótföst Framsóknargen sem stuðlaberg í marga ættliði.

Vandi þjóðarinnar er því ekki minni en hann var þegar Jón Hreggviðsson viðhafði hin frægu ummæli: "Hvenær drepur maður mann og hvenær drepur maður ekki mann? Fari í helvíti sem ég drap mann. Og þó."

Athugasemdir

[Hörður Þormar (IP-tala skráð) 29.12.2020 kl. 17:40]

Í viðtali við Kastljós kvaðst Bjarni Benediktsson hafa verið að ræða við einhvern mann þegar lögreglan kom á vettvang. Hann viðurkennir að hafa ekki borið grímu. Hvers vegna? Það kom ekki fram, kannski hafði hann glas í hendi, sem erfitt er að dreypa á með grímu fyrir andliti. En það var hans "afbrot". Ekki kom heldur fram hvort hann virti tveggja metra regluna.

Bjarni er ábyggilega þægilegur í viðmóti og kumpánalegur við þá sem hann ræðir við, en hann verður að gæta þess, stöðu sinnar vegna, að vera öðrum til fyrirmyndar.

Ég efast um að Boris Johnson hefði komist upp með að bera ekki grímu við slíkt tækifæri, kannski Donald Trump.

[Halldór Jónsson, 29.12.2020 kl. 22:16]

Ég held að það séu meiri hagsmunir fyrir þjóðin fólgnir í því að Bjarni Ben verði áfram í ráðuneytinu heldur en að einhverjir lukkuriddarar úr stjórnarandstöðunni fara að mæta þar með sína speki  um meiri útgjöld allstaðar. Bjarni kann fjármálastöðuna og það er betra fyrir okkur öll að hann verði kyrr það sem stjórnin á eftir ólifað.

Hugsið ykkur ef Þórhildur Sunna, þessi á malbikunarjakkanum með nýfrjálshyggjudelluna sem hann heldur að Sjálfstæðisflokkurinn hafi sem stefnuskrá sína og svo tvístirnið Þorgerður Katrín og Logi Már, væru mætt til að taka við af Bjarna!

Þaðer martraðarígildi fyrir mig ef ég hugsa til þess að ungt fólk ætli hugsanlega að kjósa Pírata eða eitthvað af þessu liði? 

[Guðjón E. Hreinberg, 30.12.2020 kl. 00:42]

Hvernig svo sem öllum málum líðandi vikna er snúið; Enginn er að ræða vísindin. Enginn ræðir það hvort stjórnlög hafi verið brotin við virkjun sóttvarnalaga, því engin farsótt var sönnuð.