Kvöldstemmning

Í blíðviðrinu í gærkvöldi fannst mér og frú Margréti tilvalið að fá okkur göngu í Nauthólsvík. Gangan var hin skemmtilegasta í kvöldstemmningunni.

Öskjuhlíðin, sem mér skilst að sé jafn hátt og Himmelbjerget hæsta fjall Dana, hefur orðið til muna fallegri á síðustu áratugum og betri til útivistar. Sama má segja um nánast allt umhverfi Nauthólsvíkur. Að sjálfsögðu ber einnig að minnast orða skáldanna um að ekkert sé fegurra en vörkvöld í Reykjavík og/eða vorkvöld í vesturbænum. En það á líka við um kvöldstemmningu sumur, haust og vetur í höfuðborginni. 

Fyrst minnst er á Himmelbjerget, þá komu dönsku stráin upp í hugann. Dönsk strá voru keypt til að prýða umhverfi bragga sem borgarstjórinn í Reykjavík ákvað að gera upp og prýða að innan sem utan. Ekki var hjá því komist að berja augum braggann dýra og stráin dýru. Þarna blasti dýrðin við. Dýrðin sem kostaði Reykvíkinga um einn milljarð. 

"Hann Einbúi gnæfir svo langt yfir lágt að lyngtætlur lýta á hann hissa" orti enn annað skáld,en það sama verður ekki sagt um þennan lágreista bragga og stráin dýru. Þarna kúrði bragginn lágreistur og hnípinn í rekstrarlegum vanda.

Skelfing merkilegt að einhverjum skyldi detta í hug að endurgera bragga fyrir á annað hundrað milljónir sem síðar urðu að um það bil milljarði. "Snillin" getur ekki leynst neinum sem berja þetta afrek augum. 

Þegar "snilli" borgarstjóra í braggamálinu var afhjúpuð, þá lagðist borgarstjóri í rúmið og fór í veikindaleyfi til að þurfa ekki að svara fyrir þetta frekar en annað góðgæti,sem honum finnst erfitta að svara fyrir. Það kom í hlut samstarfsfólks að verja vitleysuna og þau gerðu það. Líka Viðreisn sem kom þó ekki að málinu fyrr en eftir á. Viðreisn greip til heiftarlegra varna enda dýrseldur flokkur. 

Í kvöldkyrrðinni velti ég því fyrir mér hvort reykvískir kjósendur mundu hugsa til þessa máls við næstu kosningar og veita þeim sem að þessu bulli standa og verja fá makleg málagjöld í næstu kosningum. 

Hvað sem öðru líður og þó þetta sé allt dapurlegt og beri vott um óafsakanlegt stjórnleysi og spillingu, þá er samt ekki annað hægt en að brosa út í annað yfir því, að nokkrum skuli hafa dottið í hug að eyða nokkur hundruð milljónum sem urðu að milljarði í vitleysu eins og þessa. Það fólk veit greinilega ekki hvað ráðdeild og sparnaður þýðir enda auðvelt að klúðra hlutum þegar fólk telur sér heimilt að fara illa með annarra fé.  

 

 

Athugasemdir

[Ómar Ragnarsson, 8.8.2021 kl. 19:23]

Himmelbjerget er 157 metra yfir sjávarmáli en Öskjuhlíð 61 metri. 

Á eyjunni Mön er Möns klint sem rís lóðrétt 143 metra upp úr sjó, þrefalt hærra en hið rómaða Krýsuvíkurbjarg. 

[Halldór Jónsson, 9.8.2021 kl. 00:19]

Það er þarna annar braggi sem er svartmálaður með neglt fyrir glugga með svörtum spýtum.

Er það minnihlutinn sem  fær að forvalta hann sem sinn ptívatbragga með symbólskt útlit fyrir hina pólitísku íhaldsstemningu un það að Dagur sé kannski ekki að kveldi kominn? 

[Grímur Kjartansson, 9.8.2021 kl. 10:05]

Síðuhöfundur og fleiri muna sjálfsagt eftir galdrafyrirtækinu OZ og fleiri .com fyrirtækjum þar sem endalaus aukning á hlutafé bara gufaði upp.
Nú heitir þetta söluefni stafrænir ferlar sem allt á að leysa jafnvel hjá Landspítalanum samkvæmt grein í Morgunblaðinu í dag
Dóra Björt fékk 10 milljarða hjá Degi í Stafræna Reykjavík  en líkt og hjá OZ þá þarf þetta verkefni ekki að skila neinum afurðum, OZ var alltaf i fréttum að ræða við Nokia og fleiri um hugsanlega samning um einhverja afurð sem átti eftir að hanna.

En megin markmið Stafrænar Reykjavíkur virðist vera að upphefja "verkefnið"  á öllum hugsanlegum miðlum nútímans

[Helgi Viðar Hilmarsson, 9.8.2021 kl. 10:45]

Ég mætti ykkur á göngu einmitt þetta kvöld við braggan og við heilsuðumst. Ég sá að það var heilmikil stemming hjá ykkur, en bragginn fékk hins vegar enga athygli frá mér.