Neyðarástandið

Þýski heimspekingurinn Shcopenhauer sagði í bók sinni "Die Kunst Recht zu Behalten" eða listin að vera réttu megin, að það væri engin skoðun, svo vitlaus, sem fólk mundi ekki auðveldlega snúast til fylgis við ef hægt væri að sannfæra það um að hún væri almennt viðurkennd rétt. 

Viðreisn vill lýsa yfir neyðarástandi vegna hnattrænnar hlýnunar af mannavöldum. En hver er neyðin? Hvar eru vandamálin annarsstaðar en í ítrekuðum skýrslum loftslagsstofnunar Sameinuðu þjóðanna, IPCC, sem RÚV túlkar sem heilagan sannleika. 

IPCC hefur gefið út skýrslur um hamfarahlýnun síðustu áratugi. Ályktanir þeirra hafa ítrekað reynst rangar auk þess sem þar á bæ hefur staðreyndum verið hagrætt og þær jafnvel falsaðar eins og átti sér t.d. stað árið 2009. Reynt var þá og reynt er enn að þagga þær staðreyndir niður og IPCC heldur áfram í sama farinu enda löngu komið út fyrir eðlilega vísindalega nálgun og hefur breyst í pólitíska áróðursstofnun. 

Allt fárið í kringum hnattræna hlýnun,sem er ötullega studd t.d. af Indlandi og Kína sem hafa verið að auka stórkostlega framleiðslu á gróðurhúsalofttegundum síðustu 30 ár snýst að meginstefnu um að koma gríðarlegum fjármunum frá Vesturlöndum til mengunarlandanna eins og t.d. Kína og Indlands.

Í bók sinni "An appeal to reason a cool look at global warming" segir Nigel Lawson fyrrum fjármálaráðherra Breta, að það séu framkvæmdaaðilar í Indlandi og Kína sem hafi grætt þúsundir milljóna dollara á að byggja verksmiðjur, sem hafi þann eina tilgang að framleiða gróðurhúsalofttegundir, svo að viðskiptaaðilar Carbon aflátsbréfa á Vesturlöndum borgi fyrir að draga úr losuninni. Þetta er eitt dæmi en þau eru mörg enda eru stórkapítalistarnir orðnir helstu talsmenn aukinnar skattheimtu og greiðslna Vesturlanda til mengunarsóða í svokölluðum þróunarlöndum og hirða síðan vænar summur eftir að auðtrúa almúginn á Vesturlöndum hefur fallist á að skattleggja sjálfan sig í átt til fátæktar til að þjóna hagsmunum kauphallarfursta og ofurmilljarðamæringa.

Pólitíska viðfangsefnið hér á landi ætti að vera að spurt yrði spurninga eins og þeirra, hvort það sé afsakanlegt eða rétt, að við greiðum yfir 50 milljarða á næstu árum til einhvers sem á að hafa áhrif á loftslagið í heiminum? Er afsakanlegt að skattleggja fólk í þessu skyni á grundvelli einhvers sem er ekki brýnast að bregðast við hvað sem öðru líður? Er afsakanlegt að við skattleggjum neytendur með því að hækka vöruverð vegna aðgerða í loftslagsmálum? Hvernig er hægt að vinna gegn fátækt með slíkri stefnu? Hvernig er hægt að auka og bæta lífsgæðin í landinu með slíkri stefnu?

Þetta eru allt spurningar sem stjórnmálamenn ættu að gaumgæfa og taka afstöðu til sem og kynna sér málin áður en þeir taka þátt í margradda áróðri fjölþjóðafyrirtækja og helstu mengunarsóðanna. Áttar fólk sig virkilega ekki á því hvað er að gerast þegar svo lítið og einfalt dæmi sé tekið, þegar Landsvirkjun er orðið að Carbon sóðafyrirtæki og græðir milljarða á því að selja aflátsbréf. 

Telur fólk að það sé virkilega einhver vitræn glóra í að skattleggja okkur í átt til fátæktar vegna meintrar hnattrænnar hlýnunar og gera raunverulegum framleiðslufyrirtækjunum stöðugt erfiðara fyrir en það gæti leitt til stórfellds efnahagshruns á Vesturlöndum í nánustu framtíð og aukið raunverulega fátækt.

 

 

 

Hlýjasta árið til þessa var 1934 

Athugasemdir

[Jón Steinar Ragnarsson, 19.9.2021 kl. 11:14]

Það er ekki allt sem hlýnunartrúarbrögðin básúna samkvæmt niðurstöðum IPPC. Vil benda á bók Michal Shellenberger Apocalypse never. Hann er gamall umhverfisaktívisti af fyrstu gráðu, sem trúir því að jörðin sé að hlýna, en ofbýður áróðurinn og staðleysurna í kollegum sínum og fjölmiðlum. Í bókinni hrekur hann þessar mýtur hverja af annarri með rökum og tilvísunum í þeirra eigin rannsóknir og niðurstöður. M.a. nýtir hann sér skýrslur IPPC óspart. allar tilvísanir fylgja þessu verki og ekkert skáldað í eyður né byggt á persónulegu eða ógrunduðu áliti.

Mæli eindregið með þessari yfirveguðu og vísindalegu samantekt fyrir þá sem vantar vopn í viðspyrnunni gegn hlýnunarkirkjunni.

[Ómar Geirsson, 19.9.2021 kl. 11:47]

Blessaður Jón.

Ég er mikið sammála þess kjarna sem þú bendir á í pistli þínum, sem eru þær ógöngur sem fá öflug stórfyrirtæki og hagsmunaaðilar hafa komið baráttunni gegn lofslagsvánni í.

Allar aðgerðir á Vesturlöndum miðast að því að auka vandann, því þrátt fyrir almenna viðleitni einstaklinga og fyrirtækja til að draga úr mengun, minnka útblástur, til dæmis með því að hugsa framleiðsluferla uppá nýtt, mótvægisaðgerðum, þróa nýja tækni og svo framvegis, þá er markvisst grafið undan þeirri viðleitni með sköttum og regluverki sem annars vegar gera vestræn smá og meðalfyrirtæki ósamkeppnisfær við framleiðslu mengunarlanda, sem og að framleiðsla er markvisst flutt til slíkra landa.

Ef mönnum er alvara með tali sínu þá láta þeir ekki löndin sem menga framleiða megnið af því sem framleitt er í heiminum í dag.

Önnur birtingarmynd þessara afla er að fjármagna vitleysu um loftslagsvána og staðreyndir þar um. Því miður fellur þú í þá gryfju Jón að vitna í bull þaðan ættað.

Hvaðan fékkstu þá flugu að árið 1934, þó KK hafi sungið tregasöng um afleiðingar þess á sléttum USA, hafi verið hlýjasta árið til þessa??, og hvernig dettur þér í hug að menn komist upp með að falsa vísindaleg gögn í dag, jafnvel þó þeir væru svo heimskir að reyna það??

Fyrir utan hvernig dettur þér í hug að menn séu yfir höfuð að reyna slíka hluti??

Fyrir föður, afa og langafa, er slíkt ekki gáfulegt, það eru jú afkomendur okkar sem sitja í súpunni.

Kveðja að austan.

[Jón Magnússon, 20.9.2021 kl. 10:16]

Ómar við erum almennt mikið sammála. Það er ekki um það deilt að hlýjasta árið til þessa mælt á sömu mælistöðum var árið 1934. 

Vandinn er sá, að það er stöðugt verið að fjölga mælistöðum í borgum sem sýna hærra hitastig en mælar í dreifbýli. Þessvegna erum við nú með ósamanburðarhæfar tölur að ræða. Fölsun á vísindalegum gögnum liggur fyrir hvað IPCC varðar m.a. á bráðnun í Himalayafjöllum. Það hefur verið kallað Climategate en er ekki uppfinning mín. Spurðu svo sjálfur hvernig datt þeim í hug að vera svona vitlausir að reyna þetta. Þá er einnig spurning hvernig dettur þeim í hug að birta ár eftir ár helvítisspár, sem standast engan veginn. Þeir eru búnir að gera það í 30 ár. 

[Ómar Geirsson, 20.9.2021 kl. 16:39]

Nei Jón, það deilir enginn um það, það er rangt.

Þó kvikasilfursmælar í USA mæli það ár mjög heitt, og líklegast það heitasta fram að hitabylgjunni sem hófst um og uppúr 2010, þá er heimurinn stærri en Bandaríkin, þú ert að vitna í umræðu heimska hægrisins sem heldur að jörðin sé flöt, og það flatlendi nái ekki mikið út fyrir USA.

Gúglaðu Jón, þá sérðu hvað þetta er innilega rangt, fyrir utan að það er augljóst að skarpir pistlar þínir byggjast á þekkingu sem hlýst aðeins af því að fylgjast með, þá veistu að hitamet á norðurslóðum falla óhugnanlega hratt, svo ekki nemur hluta af stigi, heldur er hvert met mörgum gráðum hærri en það fyrra.

IPCC falsar ekki gögn, þeir geta farið rangt með, þá leiðrétta þeir sig.

Ásakanir þar um eru sama eðlis og þegar kommarnir lugu hinu og þessu í kaldastríðinu, fengu friðarhreyfingar til að beina spjótum sínum að meintum vígbúnaði Vesturvelda þegar öllum átti að vera ljóst að Varsjárbandalagið æfði ár eftir ár leifturárásir á Vestur Þýskaland, árásir sem síðan áttu að dreifa úr sér um megnið af Vestur Evrópu.

Það bull féll um leið og múrinn, þessi friðarhreyfing dó um leið og fjárstreymið að austan.

Þekking mannsins byggist á ákveðinni aðferðafræði, þú og ég notum afraksturs hennar á hverjum degi.

Þannig séð er það fyndið að sjá hatur Íslamista gegn vestrænni menningu og tækni, þegar þeir geta ekki lyft litla fingri í þeirri baráttu án þess nýta sér þá sömu tækni sem er afurð hinnar vestrænu menningar.

Vísindin líða ekki fals, það er bara svo Jón, og innst inni veist þú það mæta vel.

Atlagan að IPCC er úr sama ranni og þeirra auðfyrirtækja sem hafa yfirtekið vörnina gegn lofslagsvánni, í engu frábrugðin öðrum dæmum sem sagan þekkir um slíka atlögur gegn staðreyndum og heilbrigðri skynsemi.

Á meðan blæðir framtíð barna okkar út.

En ég er sammála þér Jón um að við erum mjög oft sammála.

Það eru skrýtnir tímar sem gera Hriflung og jarðbundinn rebel íhaldsmann að samherjum.

Og mér finnst einhvern veginn að tímarnir séu að verða ennþá skrýtnari.

Kveðja að austan.