Ómerkir spámenn

Í dag byrjar gleðileikur loftlagskirkju Sameinuðu þjóðanna (SÞ). Kommúnistinn Guterres aðalritari SÞ mun segja þáttakendum, enn einu sinni, að jörðin sé að farast. Raunar ætti hún að vera farin fyrir löngu skv.spám kardínála loftslagskirkjunnar.

Íslenska ríkið sendir að venju fámenna sendinefnd ekki nema 84 segir forsætisráðherra. Hvað skyldi nú hálfsmánaðardvöl í Dubai á lúxushóteli og ferðir fram og til baka kosta fyrir 84. Eins og fyrri daginn þurfum við ekki að spara. Fjármálaráðherra sér um sína.

1989 lýsti yfirmaður umhverfismála hjá SÞ því yfir að það væru þrjú ár sem við hefðum til að vinna eða tapa baráttunni um loftslagið.  

Al Gore spáði árið 2006 að fyrir 2016 yrði ekki hægt að koma í veg fyrir hamfarahlýnun og bráðnun íshellu heimskautanna, ef bruni kolefnaeldsneytis yrði ekki minnkuð gríðarlega. Því miður hefur hún aukist. Ekkert hefur samt gerst 

Í júlí 2009 sagði Karl Bretakóngur að við ættum 96 mánuði eftir með sama áframhaldi á bruna jarðefnaeldsneytis. Þegar það rættist ekki, þá uppfærði hann spána og sagði í júlí 2019 að við ættum ekki nema 18 mánuði eftir þ.e til janúar 2021. Mikill spámaður Kalli kóngur. 

Gréta Túnberg sem varð svo fræg fyrir að skrópa í skólanum, að Evrópuþingið fékk hana til að messa um loftslagsmál. Þar sagði hún að húsið væri að brenna og komið að hruni. Sama boðskap hafði hún fram að færa um haustið á þingi SÞ og kommúnistinn Guterres fagnaði henni sem spámanni aldarinnar. 

Hugsið ykkur dómgreind stjórnmálamanna í Evrópu og á þingi Sameinuðu þjóðanna að fá 16 ára stúlku, sem ekkert hefur lært og hefur enga sérstaka hæfileika eða þekkingu til að messa yfir sér og hvað þá að taka hana í Guða tölu eins og Guterres gerði.

Allir spádómarnir eru sama marki brenndir. Þeir eru rangir. Samt er enn siglt upp með loftslagsráðstefnu SÞ í 28 sinn og engum af þeim 70 þúsund sem á ráðstefnunni sitja munu spyrja óþægilegra spurninga. Það kæmi þeim illa að gera það. Þannig er tjáningarfrelsið á tímum hinna nýju trúarbragða. 

Ekki skal dregið í efa að æskilegt er að draga úr útblæstri kolvísýrings og það hafa Evrópuríkin gert á þessari öld. 

Á sama tíma hefur Kína þrefaldað útblástur sinn. Þeir úr loftslagskirkjunni, sem er í raun annt um málsstaðinn ættu því að beina sjónum sínum að Kína og mæta í mótmælagöngur á torgi "hins himneska friðar" í Peking. Gréta Túnberg ætti að leiða þær mótmælastöður sé henni annt um sannleikann og framtíðina. En það mun hún ekki gera vegna þess að það hentar ekki í kommúnistaríki þar sem Gréta Túnberg hefur lýst því yfir að loftslagsváin sé samkeppnisþjóðfélaginu, kapítalismanum að kenna.

Þá gengur ekki að mótmæla í Kína heldur andskotast í Evrópu þar sem stjórnmálaleiðtogarnir eru með aðgerðum sínum í loftslagsmálum og annarri fíflsku að eyðileggja lífskjör almennings og dragast aftur úr öðrum heimshlutum.

Sennilega er komið að því sem Steinn Steinar sagði í ljóði sínu Passíusáslmur nr. 51 að breyttum breytanda.

Aðalritari Sameinuðu þjóðanna ekki meir ekki meir nú er nog komið og meira en það af fáránleika og fíflsku.

 

 

 

Athugasemdir

[Guðjón E. Hreinberg, 30.11.2023 kl. 23:05]

Það væri gaman að vita hversu margir lesendur glottu yfir orðinu "gleðileikur" ... mér finnst það allavega vel viðeigandi.

[Hörður Þormar, 30.11.2023 kl. 23:42]

Hér vitnar pistilhöfundur í nokkra "ómerka spámenn", svo sem Guterres, Al Gore, Karl Bretakóng og telpukrakkann Grétu Thunberg sem hafa spáð hamfarahlýnun á næstu árum. Er ekki kominn tími til að vitna í alvöru vísindamenn?

Ég ætla að gera tilraun til þess og birta, enn einu sinni, einn af mörgum sjónvarpsþáttum  Haralds Lesch um loftslagsmál. Enda þótt þátturinn sé á þýsku þá ættu flestir þeir sem láta loftslagsmál sig einhverju varða að geta kraflað sig fram úr þýddum texta á ensku (eða íslensku) og gagnrýnt hann, þyki þeim ástæða til. Þætti mér áhugaverðara að sjá slíka umfjöllun heldur en sífellt stagl um Al Gore og Grétu Thunberg.

Harald Lesch er stjarneðlisfræðingur. Hann hefur stjórnað þáttum um vísindi af ýmsu tagi í sjónvarpi í meira en 20 ár, þ.á m. um loftslagsmál:                                                               Missverständnisse zum Klimawandel aufgeklärt | Harald Lesch           

[Jón Magnússon, 1.12.2023 kl. 09:34]

Takk Guðjón. 

[Jón Magnússon, 1.12.2023 kl. 09:34]

Menn eiga að rökræða um þetta mál en ekki taka hlutina sem trúarsetningar.